HOME LANGKAN PEPATAH


  • Sabtu, 5 Oktober 2019
MAMBALI NAK PELO, MAMAKAN NAK LAMANG
Pepatah

MAMBALI NAK PELO

MAMAKAN NAK LAMANG

Oleh: Rona Almos (Dosen Sastra Minangkabau FIB Unand)

 

Pepatah peritih di ateh alah indak asiang di talingo awak nan mandanganakan. Pepatah yang iko paling acok digunkona untuk manyidia urang-urang nan pilik. Sabalum masuak ka apo bana mukasuik dari pepatah di ataeh talabiah dahulu dijalehkanlah apo bana makna masing-masing kato yang ado dalam pepatah tasabuik.

Patamo ado kato mambali. Mambali iolah mandapekkan sesuatubarang  malalui panukaran jo pitih. Salanjuiknyo ado kato nan kaduo  kato pelo.  Pelo ko samo jo ubi. Bagi sabagian masyarakaik  Minangkabau yang tingga di daerah Kabupaten Agam mereka labiah acok manggunokan kato pelo dibandiang kato ubi. Pelo ko punyo namo latin yaitu ipomoea batatas. Pelo ko iyolah tinaman nan manjala, manyimpan baka buahnyo di dalam tanah. Batang pelo bantuak nyo bulek dan indak bakayu sarato babuku. Panjang batang pelo bisa inggo 3 meter. Samantaro warna batang pelo ijau tuo. Bantuak pelo lonjong dan indak rato. Warna pelo kuniang, putiah dan ado juo yang bawarna ungu. Samantaro kulik dari pelo ko sangaiklah tipih. Limbak nan dari pado itu bagian daunnyo, pelo mampunyo ujuang yang runciang sarato bawarna ijau.

Kato katigo iolah kato nak. Nak dalam bahaso Minang bararti hendak  dalam bahaso Indonesia. Kamudian lanjuik kakato nan kaampek yaitu kato mamakan. Kato mamakan dalam bahaso Minangkabau samo artinyo jo kato memakan. Nan tarakhir ado kato lamang. Lamang adolah makanan nan tabuek dari katan dan dimasak jo santan dalam buluah apo. Makanan iko sangaiklah lamak. Lamang di masak dalam rueh buluah apo, namun sabalumnyo diisi jo guluangan jo saalai daun pisang. Di dalam guluangan daun pisang kolah katan bacampuan jo santan dibaka sampai masak. Bakaiktan jo lamang di Minangkabau dikenal jo tradisi malamang. Tradisi malang di satiok daerah Minangkabau babeda-beda pulo ragam jo macamnyo. Diantoarnyo ado tradisi malamang manjalang bulan puaso Ramadhan. Dalam prakteknyo tradisi malamang ko pasti akan banyak malibaikkan orang. Kegiatan ko dikarajoan sacaro gotong royong. Pado kegiatan ko masyarakaikt ado nan mancari buluah, ado nan mancari kayu baka sarato nan indak kalah pantiangnyo sakalompok urang nan manyiapkan bahan-bahan lamang nan ka dimasak. Tradisi samacam ko sangaik arek kaitannyo jo peran Syekh Burhanuddin nan barasa dari Pariaman.  

Salain rason yo nan sangaik lah lamak, harago  sabatang lamang yo labiah maha dibanding harago pelo. Pepatah mambali nak pelo, mamakan nak lamang dapek dijalehkan apo bilo ado urang nan ingin makan lamang, namun hanyo mangaluan pitih seharago pelo tantulah niaik tu sulik untuk di capai. Pepatah di ateh ditunjukkan kapado orang nan pilik. Aratinyo, orang nan pilik tu ingin mandapekkan hasia nan banyak atau pun untuang nan gadang  namun, indak namuah mangaluakan atau bakorban agak talabiah.

            Sainggo ado mamangan adaik nan lain nan saharusnyo dikarajoan jikok nak mandapekkan hasia nan samparono tu. Nak Kayo kuaik mancari. Papatah nan sarupo ikolah handaknyo nan salalu dipakai dek anak kamanakan kito. Supayao inyo indak tamasuak urang-urang nan sarupo judul pepatah awak nan di ateh. Semoga.


Wartawan : Rona Almos
Editor : bahren

Tag :# Langkan # Pepatah # Minang