Malintang

Malintang

Di Luhak Tanah Data

Oleh: Bahren*

Alah lamo indak ka Padang

Ka Padang andak mambali banang

Dimulai carito di kambang

Carito tantang nagari malintang

            Jikok disabuik tantang Malintang

Ado duo daerah nyo nan gadang

Daerah Mandahiliang jo daerah lawang

Itu lah daerah nyo nagari Malintang

Baa bana kisah carito, tantang nagari kini nangko. Nan tasabuik dalam judulnyo iyo banamo Malintang dalam luhak Tanah Data. Bakisah malah Mak Datuak Rusli nan bagala Datuak Majo Sindo. Di Mandahiliang liau bakisah tantang nagari nan kito baco. Tujuah puluah ampek umua liau wakatu itu, wakatu manyurah ka Zuriati, nan datang dari Padang. Sambilan baleh di bulan Mei tahun duo ribu tujuah tapek nyo wakatunyo.

Apo bana kisah nan diurai, danga kan malah elok-elok, simak kan molah baik-baik. Takalo panduduak batambah rami juo, dari daerah asa niniak muyang kami. Ado lah bara diantaronyo niniak kami ko, pai mambukak lahan nan baru. Antah kok hari molah na elok, atau kutiko kolah nan baiak, nan tatampuah jalan nan gadang, limbak nan dari pado itu, ado sabuah jalan nan mambalintang indak doh jauah dari labuah nan gadang nantun. Di sakitaran jalan nan mabalintang tadi mambuek pamukiman jo mambukak lahan lah niniak muyang kami, untuak manjadi tampek tingga langko sarato tampek batani sarato bacocok tanam. Dek lah rami daerah tu kini mako dibari lah daerah nan mambalintang jalan tadi jo sabutan Malintang inggo kini.

Ado pun dareah nan dihuni dek niniak kami nan basuku Mandahiliang dibari namo lah daerha nantun sasuai jo suku nan maunyi daerah tadi. Mako banamo lah Mandahiliang. Ado pulo daerah nan banyak tumbuah batang lawang (cinnomomun) dibari namo lah nenek muyang kami daerah nantun jo Lawang. Sasuai bana jo padoman niniak kito nan bapaham Alam Takambang Jadi Guru, tamasuak dalam pambarian namo, bapadoman kapado alam.

Lanjuik bakisah mak Datuak Rusli nan bagala Datuak Majo Sindo. Curito nan bak kian alah ditarimo dek baliau sajak dari jaman saisuak, dari niniak sarato rang tuo-tuo dahulunyo. Kisah lain nan indak kalah sero tantangan nagari Malintang nangko dari bana asa niniak moyang nyo. Bakisah liau Mak Datuak, dari carito nan ambo danga niniak kami rang Malintang ado nan asa nyo dari Supayang ado pulo nan datang dari Agam. Kalau dibaco suku nan ado, di nagari malintang nangko, ado nan basuku Kutianyia, ado basuku Kampuang Dalam, ado basuku Parik Cancang, ado pulo suku Payobada, Mandahiliang jo suku Malayu langkok jo suku Piliang.

Baitu bana curito Mak Datuak Majo Sindo dan bisa kami kabakan. Jikok nyo ado curito nan salah, salah nan datang dari kami, Mukalum lah kami manusia tampek salah jo gawa bakumpuanyo. Jikok nyo ado carito nan bana, kabanaran nan datang dari tuhan, Allah ta;ala kayo sungguah tampik sagalo ilimu bahimpumnyo. Ka pambaco saklian maaf dipintak ka tuhan ampun dipinto.

            *(Dosen Sastra Minangkabau FIB Unand)