HOME LANGKAN TINGKOK

  • Rabu, 16 Oktober 2019
Malalo
TINGKOK

Nagari Malalo

di Luhak Tanah Data

Oleh: Bahren*

 

            Tasabuik maso daulunyo, tasabuik Rajo Pagaruyuang basarato jo rombongan nyo. Mangakoh Rajo jo rombongan, iyolah bajalan nak manuju Koto Barusarato Kubuang Tigo Baleh. Baitu bana kisah tasabuik, tasabuik dek baliau A.M. Datuak Nan Kayo  di Guguak Malalo kutiko ditanyo dek Zuriati baa bana nagari ko banamo Malalo. Anam puluah ampek umua liau wakatu batamu di rumahnyo sakitaran tanggal suo pulua di bulan Mei wakatu itu tahu duo ribu tujuah tapeknyo.

            Lanjuik bakisah jo bacarito liau Mak Datuak Nan Kayo. Manjalang sampai di tampek tujuan rombongan rajo Pagaruyuang nantun tantu sajo malewati daerah-daerah nan alun punyo namo. Ciek di antaro daerah nan dilalui dek rombongan tadi, mako batanyo lah salah surang di antaro rombongan nan ado “Ka maa lalu?”, itulah kato-kato nan acok di katoan dek urang di daerah kami kini ko.  Mako lamo lanbek dek urang tadi dibari namo lah tampek nyo batanyo kama lalu tadi dek Rajo jo Robongan tadi jo Malalo yang asa kato nyo dari kama lalu.

            Limbak nan dari pado itu, dek lamo lambek nyo nagari batambah bakambang juo. Mulai lah niniak moyang kami mambuek rumah jo pamukiman nan disabuik koto. Koto nan dibuek arah ka ilia dibari namo jo Koto Diilia. Samantarao itu, koto atau pamukiman nan tadapek di tangah kampuang dinamokan jo Koto Tangah. Ado pulo koto nan dibuek arah kamudiak dinamokanlah koto tadi jo Koto Dimudiak.

            Ado pulo sabuah daerah lain, nan lataknyo agak di katinggian. Karano lataknyo agak tinggi, urang siko biaso manyabuik daerah nan agak tinggi tadi jo sabutan Guguak. Mako daerah itu kini dibari namo Guguak. Di tampek awak bacurito kini ko kato Mak Datuak Kayo. Ado pulo daerah tanjuang nan banyak ditumbuahi dek batang juha (cassia simena) dibarilah namo daerah nantun jo sabutan Tanjuang Jua.  Indak doh jauah dari Tanjuang Jua, ado daerah nan banyak tumbuah batang Puduang. Dek manjadikan alam sabagai guru mako daerah itu kini dibari namo Puduang.

            Ado pulo sabuah lai, talago nan banyak lintahnyo, dek niniak sarato muyang kami dibari namolah daerah nantun jo sabutan Talago Lintah. Limbak nan dari pado itu, ado sabuah daerah nan agak balakuak nan di sinan ado tukang apa basi dibari namo lah tampek tu kini jo sabutan Lakuak Apa. Baitu bana lah curito nan di dapek dek Baliau A.M. Datuak Nan Kayo. Curito di daoek dari urang tuo-tuo di Malalo.

Jikok ado kato nan salah dalam panyampaian curito asa jo usua ko. Salah nan datang dari ambo nan mangabakan ka dunsanak kasadonyo. Maklum lah kito manusia tampek salah sarato gawa basarangnyo. Tapi samantang pun baitu jikok ado nan bana tantang kisah ko, tantu kabanaran datang dari tuhan, Allah taala kayo sungguah tampek sagalo ilimi bahimpunnyo. Kapado dunsanak maaf dipintak kabakeh tuhan ampun dipinto.

 

*Dosen Sastra Minangkabau FIB Unand


Wartawan : -
Editor : bahren

Tag :#Langkan #Tingkok #Asa #Usua #Nagari #Minangkabau