HOME LANGKAN TINGKOK

  • Senin, 15 Juli 2019
Koto Laweh
TINGKOK

Koto Laweh

di Luhak Tanah Data

Oleh   Bahren*

 

 Alai Alai tabakang ka alai

Tabang lah pipik duo tigo

Curito lah lamo tabangkalai

Kini di cubo mangabakannyo

 

Ambiak pena ambiak karateh

Di cataik lalu di apa

Curito tantang koto laweh

Di dalam luhak yo Tanah Data

 

Baa bana curitonyo, simakkan molah elok-elok dangakan molah baiak-baiak. Datang lah wakatu itu Zuriati, datang nan dari Padang. Datang mahadok ka Samsidar surang padagang di Koto Laweh. Tujuah Puluah satu umua liua wakatu itu, kutiko batamu jo Zuriati. Dalam tanggal tujuah baleh di bulan Mei duo ribu tujuah.

Indak do lamo sudah batamu, mulai lah Samsidar bacurito ba’a mako nagari banamo Koto Laweh. Adolah maso dahulunyo takalo nagari ko masih rimbo rayo, Datanglah niniak kami basarato babarapo urang nan lain. Datang nan tantu sajo ado mukasuik, apo bana mukasuik hati niniak kami wakatu itu, iyolah nak mambukak jo maolah paladangan nan baru. Lahan di bukak untuak batani jo baladang sarato ka dijadikan tampek tingga.

Habih hari baganti minggu. Minggu pun habih bulan lah datang pulo. Dek lamo kalamoan paladangan nan dibukak tadi samakin lamo tu samakin laweh juo. Bakalompok-kalompok lah niniak kami tadi sarato mulai lah manetap di tampek nantun. Dek lah samakin rami juo mako banamo lah tampek tadi jo Koto Laweh.

Limbak nan dari pado itu, ado ciek tampek nan partamo kali di diami dek niniak kami, di tampek itulah kini nan manjadi Kapalo Koto arati nyo bana koto nan partamo kali dihuni. Indak do jauah dari kapalo koto, ado sabuah tampek nan lain. Tampek nan sangaik rancak bana nan bapincuran tujuah buah, Tampek tu kini banamo Pincuran Tujuah.

Dalam daerah koto laweh nangko, ado juo dibuek sabuah balai patamuan adat nan sangaik gadang kutiko itu, tampaik nan ado balai adaik tadi dibari namo Balai Gadang. Ado pulo sabuah lai tampaik nan banamo Batu Panjang, manga banamo batu panjang dek karano di tampaik tu kini ado lah sabuah batu nan sangaik lah panjangnyo.

Indak do jauha dari Batu panjang, ado lah tampaik nan agak katinggian, di tampaik tu dulu niniak kami mambuek kandang untuak taranaknyo. Dek kandang tu talatak di guguak (katinggian) mako dibarilah namo tampek tu kini dek niniak kami Kandang Guguak.

Curito nan bak kian tadi di dapek dek Samsidar dari urang tuo-tuo nan dahulu di kampuang baliau. Adopun kami di siko, di Koto laweh nangko ado basuku Koto, ado nan basuku Pisang, Suku Sikumbang jo Suku Guci. Salain dari curito tantang koto laweh di daerah kami nangko. Ado pulo curito nan lain, curito tantang Tuanku Pamansiangan sarato Curito Tuanku Nan Tigo. Itu malah curitonyo, curito tantang Koto Laweh. Kok ado nan bana tantang nantun kabanaran datang dari Tuhan, Allah Ta’ala kayo sungguah tampek ilimu bahimpunnyo. Jikok nyo ado nan salah dari curito nantun. Salah nan datang dari ambo, ambo nan hanyo makhluk manusia. Tampek silap jo salah bakumpua. Kapado tuhan ampun di pintak, ka pado dunsanak maaf dipinto.  

 

*Dosen Sastra Minang FIB Unand

 

 


Wartawan : -
Editor : Bahren

Tag :#Langkan # Tingkok # Asa # Usua # Nagari # Minangkabau