HOME LANGKAN CARITO

  • Rabu, 14 Agustus 2019
KATIKO MATOHARI JO BUMI BAJAWEK KATO
Carito

KATIKO MATOHARI JO BUMI BAJAWEK KATO

OLEH: HAMZA AFRA JONEIDI

(Mahasiswa Sastra Minangkabau FIB Unand)

            Katiko pagi tibo untuak manggantian malam nan lah habih masonyo, tabiklah bola merah gadang di sabalah timua, nan lah siap jo cahayonyo nan sangek tarang. Cahayo nan tarang tu lah nan manjadi pusek dari alam nan ko. Cahayo tu juo lah nan manjadi sumber iduik dek mukaluak nan ado di bumi Tuhan ko. Katiko cahayo tu sampai ka palupuak matonyo nan punyo nyawo, tabukaklah mato nan sapasang tu baliak. Mancaliak sagalo nan ado jo nan tajadi di tanah nan masih suci ko. Sa akan sucinyo banyak antaro jiwa nan hiduik di ateh bumi tu sagan untuak marusak tanah nan suci tu. Sampai-sampai harato nan takanduang dalam tanah tu, di ambiaklah dek urang lain nan dak punyo sangkuik pawik jo tampek nan tanamo kayonyo ko.

            Duo balah bumi tabagi, duo kali pulo matohari ma agie cahayo kahidupan tu. Adil dari tuhanlah nan mambuwek sagalo nan ado di tanah tuhan tu mandapek cahayo kahidupan. Nan manjadi pa angek katiko dingin jo manjadi ubek katiko sakik. Nan jadi vitamin katiko pagi sarato jadi pangariang katiko siang. Elok bana rasonyo tuhan mambuek tampek nan indak ado kurang nyo ko.

Matohari iolah namo nan barasal dari tempek ketek nan acok di panggie dek urang  jo namo “Minangkabau”. Dari sakian banyak tampek, banyak pulo macam-macam namo untuak ciek matohari nan tu. Bukan masalah namo nan banyak, tapi ado masalah dek apolah matohari tu masih bisa bacahayo sakian lamo. Lah lamo dek bacahayo, sampai-sampai lah tambah ketek urang nan lahia,tapi lah batambah banyak jumlahnyo.

Minangkabau iolah tampek ketek nan tagabuang ka dalam daerah nan acok di panggie jo “Negara Indonesia, Provinsi Sumatera Barat (Minangkabau di dalamnyo)”. Yo itulah nagari kitokini ko. Namo “Matohari” tu di ambiek dek urang Minang dari bahaso Indonesia. Nan acok di sabuik jo namo“Matahari”. Sungguah rancaknyo namo nan tadapek, bak itu pulo nan tacaliak. Jiko ilang matohari tu, padamlah cahayo kahidupan sado umat nan ado ko.

Tapi al kisah ado pulo ruponyo lah tajadi sambah manyambah, sambauik manyambuik, di jaweklah kato dek mufakaik. Yo ikolah nan tajadi antaro Matohari samo tanah suci nan kito pijak kini ko. Alah banyak kironyo tanah bumi ko batanyo ka matohari. Lah tajadi sahuik manyahuik antaro kaduonyo.

Ikolah manusia nan hanyo pandai dalam batindak namun kurang dalam bapikie. Banyak bana hal nan bisa di pabuwek, tapi dak tau akibaik buruaknyo. Dek cahayo matohari tu lah, malam nan biaso tarang dek bulan putiah, kini lah baganti jo lampu nyalo. Lah banyak alok-alok nan pakai tanago cahayo, lah banyak pulo urang nan kurang karajo.

Akhirnyo, dek lah banyak nan tajadi di muko bumi ko. Batanyo lah tanah bumi tu ka matohari. Tajadilah sahuik manyahuik antaro duo ciptaan tuhan nan kuaso tu.

 “ Hoi Matohari.  Ba a kaba? Semakin hari semakin ketek rupo angkau nampaknyo.” Sapo Bumi Pagi tu kepado Sang Matohari.

Matohari menjawek “ Yo, itulah nan ambo rasoan, tapi ambo tu indak bisa manulak takdir nan la di tantuan ko. Jadi ambo yo harus tarimo kok ketek atau gadang pun rupo ambo kini ko.

“Apo angku indak minta ajo kapado tuhan nan kuaso tu, baranti ajo bacahayo lai dari kini? Karano ambo caliak sajak dulu, angku tu lah panek dek bacahayo taruih juo.” Tanyo Bumi ka Matohari.

“Hoii Bumi, kok baranti ambo bacahayo kini ko, apolah nan ka tajadi pado urang-urang dan sagalo mahluak nan ado di pungguang angku tu..? Angku talok mancaliak kok nan banyawa tu sangsaro indak mandapek angek nyo cahayo ambo ko..?” Baleh Matohari.

“Iyo Matohari. Aden pun indak lo talok mancaliak raso nyo do. Tapi apo harus tu bana nan angku lakuan untuak urang-urang tu..? Ambo caliak banyak lo urang-urang nan bapikie tu, babuwek nan indak elok. Karano cahayo angku tu ma agie cahayo tarang, nan mambuwek urang-urang tu bisa jaleh mancaliak untuak babuwek nan bathil di jalan nan nyo piliah.” Jawab Bumi jo irama manyalahi matohari.

“Hhooii Bumi. Jadi giko dahulunyo. Sabalun kito bisa tanyo ba jawek sarupo kini ko. Dulu tuhan agie ambo pilihan.” Jawek Matohari.

“Pilihan..??, makasuik angku..??” Tanyo baliak Bumi.

“Yo Pilihan. Ambo dulu di agie pilihan dek tuhan nan kuaso. Nan partamo, Jikok ambo bacahayo, kok jo cahayo ko urang-urang nan ado di pungguang angku tu bisa ba buwek nan dak elok, mangko ambo akan mandapek balasan nan indak elok pulo pado wakatu akhir bisuak. Tapi ambo buliah pulo indak bacahayo.

Jadi nan kaduo, ambo di buliahan tuhan untuak indak bacahayo, tapi urang-urang nan ado di pungguang angku tu akan mati. Jadi ambo piliah sajo lah nan partamo.

Alasannyo, Kok maningga atau mati urang-urang nan di pungguang angku tu, sia beko nan ka jadi Khalifah di tangah-tangah dunia nan bakambang ko.? Ambo Yakin jo picayo samo manusia nan ado pado angku kini tu, indak ka sadonyo tu nan ka babuwek nan dak elok do. Ciek duo adolah nan bahati elok untuak nan lainnyo.”Jawek Matohari jo yakinnyo.

“Jadi angku ikhlas, kok apopun balehan tuhan bisuak..?” Tanyo bumi baliak.

“Jaleh ambo ikhlas. Karano kok indak ado ambo, akan labiah parah beko nan ka tajadi. Kadang ambo heran samo urang nan bagitu sombong dulunyo nio manjadi khalifah. Untuak apolah gunonyo manjadi kalifah tapi lah jadi budak dek kamajuan nan ado. Kok di caliak lah hilang apo nan ado pado diri tiok-tiok urang nan ado tu. Ambo bisa bacahayo sampai kini bukan dek sakedar ikhlas sajo. Tapi ambo nio mancaliak apo nan tajadi pado akhirnyo bisuak pado manusia nan punyo parangai sarupo itu. Indak sadiah indak sanang, indak angek indak dingin. Hanyo panasaran sajo, apo akibaik nan kan di agie dek tuhan kapado khalifah nan sarupo itu”. Jawek Matohari.

 “Jadi untuak Salanjuiknyo ba a..? Tanyo Bumi ciek lai.

“Nan kini ambo kan bado,a kapado tuhan. Supayo urang nan salah manggunoan aka pikiran nyo tu bisa ngarati jo makasuik tuhan nan sabanyo. bialah kok digunoan cahayo rahmat tuhan ko ka nan salah dek jiwa-jiwa nan ado pado angku tu. Karano ambo bisuak bisa pulo manuntuik kapado tuhan. Supayo nan salah manggunoan aka pikiran nyo tu, di baleh dek tuhan bisuak jo nan samo barek ateh salah nan nyo lakuan tu.”Jawek Matohari dengan  cadiaknyo.

            Akhirnyo tau lah tanah (Bumi) ko dek apo matohari bisa bacahayo sampai kini. Jo Nur rahmat tu lah, satiok nan banyawo bisa tantu siang nan jo malam. Bia indak bara tanyo, kironyo wakatu untuak balahan bumi nan ciek kini lah habih. Salanjuiknyo cahayo rahmat tuhan tu kan di agie ka balahan bumi nan kaduo. Pado akhirnyo bumi partamo dapek lalok untuak mananti maso-maso di agie cahayo rahmat tu untuak salanjuiknyo. Jadilah nampak adilnyo tuhan dalam ma agie. sahinggo maso lah nan ka manjawek, bilo pambalehan tu ka tajadi.


Wartawan : HAMZA AFRA JONEIDI
Editor : Bahren

Tag :# Langkan # curito #minang