HOME LANGKAN CARITO

  • Senin, 28 Oktober 2019
KATES
Carito

 

Kates

Oleh : Filla Anggelia Putri*

 

Kiro-kiro pukua duo baleh kurang sangenek, ari sadang angek-angeknyo raso ka pacah kapalo dek angeknyo ari, raso di ateh ubun-ubun matoari. Pai lah si Dodon ko ka rumah si Adi mukasuiknyo ka mambaok si Adi ko kalua kok mambali es bagailah dek indak tahan lai lah kariang rangkuangan rasonyo. Dalam pajalanan ka rumah si Adi basoboklah Dodon ko jo gaek si Adi di tangah jalan. Gaek ko ka pai ka ladangnyo, batanyo lah gaek Adi dek nampak Dodon ko tagageh bana bajalan “kama yuang?” takajuik Dodon ko mandanga suaro tu “eh amak, ko ka pai ka rumah Amak, ka mancari Adi, lai ado nyo di rumah tu Mak?”, “takajuik lo Waang, Amak sapo yo, dek Amak caliak tagageh bana Waang mangko Amak sapo, pailah ka rumah Adi nyo ndak ado manga-manga bagai karajo nyo di rumah do mah, Amak lanjuik jalan lu”, “iyo Mak” jawek Dodon ko. Tibo di rumah si Adi nampak lah dek Dodon ko Adi sadang di balakang rumahnyo. Batanyo lah Dodon ko ka Adi, “sadang manga tu Di” tanyo Dodon ko, “ Eh, ang mah Don, ndak do doh, sadang duduak se maratapi nasib iduik ko” jawek Adi ko, “barek bana iduik ang mah” kecek Dodon ko, “ndak baitu doh, capek lah den baok ang makan ka kadai urang Jawa nan di simpang tu a, mano tau hilang jo sangenek sansaro ang tu” kecek Dodon.

Mangko bajalan lah baduo ko ka kadai tu, bajalan kaduonyo sambia mangecek-ngecek mangana kawan-kawan nan samo gadang alah habih babini lah balaki, nan inyo baduo alun juo babini lai, alah acok kanai galak an jo urang kampuang, alah tasabuik pulo Bujang Lapuak, tapi kaduonyo indak paduli nyo doh, bialah urang tu mangecek an awak asa iduik wak ndak manggaduah ka inyo, itu sajo jawek kaduonyo.

Lah lamo bajalan, lah ampia tangga tarompa dek bajalan, lah babusa lo muluiknyo dek mangecek mangko tibolah di kadai urang Jawa nan di simpang tu. Alah masuak ka dalam basuo jo palayan nyo, mangko batanyo lah palayan nyo ko “mau pesan apa”, mangko batanyo lah Dodon ko ka Adi “ang nio a?” dijawek dek si Adi ko “den minum selah den auih bana rasonyo dek bajalan, den jus jeruk ko lah”, alah ditulih dek palayan ko mangko mangecek lah Dodon ko “a nan lamak di siko?” dijawek di palayan ko “kates”, “ha itu selah di ambo” kecek Dodon ko, mangko ditulih lo lah jo palayan ko.

Alah salasai dibuekan mangko dibaok nyo lah pulang aia minum nyo ko, agaknyo untuak minum di jalan beko, sasudah mambayia mangko bajalan lah kaduonyo babaliak ka rumahnyo, di tangah jalan mangko diminum nyo lah aia ko tadi, nan si Adi ko lai lamak-lamak se taraso dek nyo, tibo dek si Dodon ko pas bana taminum aia nyo langsuang mangecek nyo “iko alah acok ambo mangicok mah” dijawek dek Adi ko “ a nan ang bali” dijawek pulo lah dek si Dodon ko “sampelo ko mah”, mandanga kecek si Dodon tagalak gadang lah si Adi ko, dek nio mancubo nan lamak kecek urang kadai nyo mangko takicuah lah si Dodon ko, namo nyo nan babeda kironyo rasonyo samo sajo, mangko tagalak kaduonyo takekeh-kekeh.

 

 

*MAHASISWA SASTRA MINANGKABAU FIB UNAND


Wartawan : Filla Anggelia Putri
Editor : bahren

Tag :# Langkan # curito #minang