Karcis

Karcis

Oleh: Bahren*

Alkisah Man Iriak jo Piak Onjai alah sabulan pulo manjadi pasangan laki bini. Dek masih angek-angeknyo pai lah si Man jo Piak Onjai bajalan-jalan ka ganti bulan madu ka Padang. Pas bana di padang kutiko tu baru dibukak pulo Transmart.

Masih kabua-kabua tarang hari di kampuang, nan mereka ko lah barangkek, inyo takuik kok macet pulo jalan ka Padang dek gara-gara ujan labek tadi malam. Kok ado pulo jambatan nan putuih. Itu lah kiro-kiro agak ati si Man Iriak jo Piak Onjai.

Inyo baduo karangkek manuju tasiun Piaman, naik kuretapi inyo ka Padang. Di Padang inyo turun di tasiun Tabiang. Dari tasiun Tabiang disambuang jo oto trans Padang. Bia nak mancubo wak kaduo e Piak, naiak trans Padang jo ka Transmart. Iyo pulo mah da.. kato si Upiak Onjai. Sakali pai ka Padang duo trans bisa kito jalang.

Kiro-kiro pukua sambilan atau tangah sapuluah, baranti lah kuretapi tadi di tasiun Tabiang. Siman jo Supiak pun turun, malinteh ka subarang, sampai lah inyo di halte trans Padang. Naik oto trans Padang inyo baduo.

Bitu nyo naiak, langsuang dikecek an nyo ka sitokar oto, turun kan awak beko di Transmart dih, kato si Man ka sitokar oto tadi, jadih da, beko wak sorak an nan ka turun di Trasnmart tu da. Tarimo kasih banyak-banyak sambuang si Man.

Dek lamo lambek bajalan, akia nyo sampai juo lah si Man Iriak jo Si Upiak Onjai di tampek nan ka di tuju. Baranti inyo di sinan. Sambia mancaliak-caliak ka bakeh gaduang Transmart nan sangaik gadang nyo. Bakato lak si Upiak ka si Man, yo gadang transmart ko yo da. Sagadang pacuan kudo di Paguah nampak dek Upiak. Iyo Piak, labiah gadang mungkin. Uda kiro sagadang pacuan kudo Bukik Ambacang di Kiktinggi ado ko Piak kato Siman.

Iyo mungkin mah da. Molah kito masuak da, kato Supiak ka udanyo. Masuak lah mereka baduo-duo. Di lantai partamo, nan tanpak sagalo jinih makanan, mulai dari nan tradisional sampai makanan antah dari ma, nan baru sakali tu tampak dek Supiak jo Si Man. Lanjuik ka lantai duo. Sagalo jinih baju jo sarawa. Pokok e dari mulai sarawa ketek sampai salangkok-langkok e cukuik, ado di situ.

Sampai lah Supiak jo Siman di tampaik arena bamain, di sampiang tampaik bamain tu ado pulo tampak dek inyo urang rami kalua masuak sambia mancaliak gambar-gamabar pilem nan ka diputa. Manggeleang-geleang Siman Jo Supiak. Yo ancak lo tampek manonton e Piak, awak di kampuang kok ka manonton ndak parnah macaliak gambar nan ka ditonton ko doh. Paliang disorak an sajo pakai oto alo-alo baso malam ko ado layar tancap. Babondoang-bondoang lah rang kampuang ka Lapangan pacu Kudo Paguah mancaliak layar tancap tu.

Tu baa piak, manonton wak? Adih da. Wak cubo lo baa raso manonton di tampaik ko. Nan siman langsuang je masuak, di pintu ka masuak di ambek Siman jo panjago pintu. Ma karcis apak? Main masuak sae apak mah. Eh…. Pakai karcis lo masuak e ko? Iyo pak bali ka sinan dulu karcis e baru buliah masuak.

Yo…. di bali lah dek Si Man karcis duo, diagiahan e ka tukang jago pintu, bitu diagiah an karcis tu dicabiak dek tukang japo pintu, e…. e…. eh baa kok ang cabiak yuang kato si Man. Nan tukang jago pintu ko diam sajo indak manjawek. Disuruah bali e dek awak karcis, lah di bali dek awak, digaiahan ka inyo dicabiak e pulo. Yo mangka kalang wak dek e mah Piak, kato Siman ka Supiak.

Tunggu dek Upiak siko dih, uda bali duo lai, masak karcis cabiak nan ka awak baok. Jadih da kato supiak. Dibali lah dek Siman karcis duo lai. Diagiahan e pulo ka panjago pintu tadi baliak. Dek panjago pintu tadi, dicabiak e juo baru karcis tadi. Makin berang lah Siman kutiko itu. Paja dak tau jo adaik sopan santun kato e dalam ati, disuruah bali, lah wak bali, kutiko wak agiah dicabiak e dima latak hormat jo sopan paja ko, garitih Siman dalam hati e.

Pai nyo baliak, ka loket karcis, dibali karcis ko ampek. Nan duo, diagiah nyo ka panjago pintu. Kok ka dicabiak e bana beko, den kicuah paja ko, masih ado di saku den duo lai. Iyo lah dikarajoan dek Siman rancana nyo tadi karcis nan duo diagaih e ka panjago pintu. Cabiak…cabiak…. Lah dek ang ko ha. Yo lah dicabiak e dek panjago pintu tadi karcis nan duo tu.

Sambia galak-galak ketek Si Man Iriak mangubik si Upiak Onjai. Supiak batanyo ka udanyo. Manga kok galak-galak ketek uda lapeh dari panjago pintu tadi. Ijan upiak katoan ka sia-sia ndak Piak! A tu da? Kecek Supiak. Uda lah magicuah paja tukang jago pintu tadi. Sabalun masuak tadi udak bali ampek karcis e, uda agiah an duo, bialah nak dicabiak e, uda suruak an duo si saku sarawa uda. Jadi masih ado duo lai karcis nan ndak dicabiak e. Asai lah paja tu. Asa ka mancabiak punyo urang sajo karano nyo. Nah piak masuak wak…

 (*Dosen Sastra Minangkabau FIB Unand )