HOME LANGKAN KATO

  • Sabtu, 10 Oktober 2020
Ka Lurah Dak Dapek Ayie, Ka Bukik Dak Dapek Angin
Pemimpin dan rakyat (ilustrasi.net)

Ka Lurah Dak Dapek Ayie, Ka Bukik Dak Dapek Angin
 

Oleh TE Radjo Boedjang

Masyarakat, rakyat, atau kito kasadonyo, nan sabiduek sakapa dalam NKRI, adolah subjek dalam negara. Bukan objek yang bisa diansak diirik-irik baitu sajo! 

Kito basamo nan punyo negara. Pamarentah kito amanahkan untuak maurus. Manjadi urang suruahan dek kito nan banyak.

Karano itu, suaro rakyat, suaro kito, wajib hukumnyo didanga, ditiliek, dianalisa. Dan diskomodasi, sakironyo suaro-suaro tu batue-batue untuak kamaslahatan nan banyak. Bukan nan saketek.

Dalam demokrasi, nan banyak (mayoritas) adolah representasi dari suaro dominan. Sungguahpun sarik pulo maukue mayoritas atau minoritas nan tun, tapi--dalam demokrasi perwakilan nan kito anut--wakie-wakie rakyat nan duduak di lembaga legislatif itulah nan jadi papanjangan muncuang kito.

Aratinyo, dalam bernegara, suaro kito lah kito wakilkan ka anggota legislatif tu. Sadangkan untuak manjalankannyo, kito pun lah sapakek mamiliah presiden tiok limo taun. 

Lalu, kutiko ado suaro-suaro kito dak kasampaian, sungguahpun imbau lah kalampauan, ado babarapo mekanisme yang dibuliehkan sasuai aturan perundang-undangan. 

Partamo, tantu malalui para wakie kito yang bakalompok dalam parpol. Apokah langsuang ka wakie rakyat nan tun sacaro perorangan, atau malalui partai, itu bisa dilakuan. 

Nan malalui partai tu, agak jarang dipakai. Mungkin karano kito manganut azas masa mangambang (floating mass), sahinggo tiok kito jarang nan manjadi kader permanen sabuah parpol. 

Itu pulo sabeknyo, kutiko pileg, kito labieh banyak mamandang caleg daripado maliek parpolnyo. Sungguahpun untuak babarapo kasus, ado parpol nan lah kanai stigma di daerah-daerah tertentu, sahinggo sang caleg idak talalu ditarenok bana. 

Sabananyo, sistem kepartaian mangandak an adonyo keanggotaan yang jaleh dan permanen dari rakyat, kader masiang-masiang. Namun, dalam praktiknyo, tiok kito bisa sajo baubah warna tanpa raso basalah, sabab kito pun dak diikek dek parpol-parpol nan tun sacaro institusional!

Dari suduik demokrasi, sabananyo katiadoan ikatan legal antaro rakyat jo parpol tu mambukak paluang untuak kito malompek antar partai. Sarupo nan tajadi kini!

Pileg limo taun lalu, nyo pilieh caleg dari partai A, pileg barikuiknyo caleg partai B. Baitu nan tajadi.

Kok caleg tu lai nyo rawat komunikasi jo konstituen, sungguahpun inyo pindah kapa, tatek dipilieh urang. Aratinyo, kapa-kapa nan ado diharagoi jadi kandaraan politik an sich! Walaupun ado juo nan dak saparah itu kondisinyo, tapi umumnyo yo bak cando bendi sajo parpol tu.

Hari kini bisa naiek bendi si A. Bisuek naiek bendi si B. Baitu taruih. Kadang-kadang lai ado pulo sabagian kecil kito yang punyo bendi langganan.

Situasi saroman iko, mambuek hubuangan politisi jo masa labieh banyak pragmatis dan transaksional. Bukan babuhue ideologis, sarupo idealnyo didirikan parpol.

Akibeknyo, tatkalo suro-suaro kito nan mayoritas mampajuangkan sasuatu, acok maandok dak bakatantuan sajo. Taganang dak anyuik. Ilang dak tantu rimbo!

Ka sia kamaratok? Ka bakeh sia kamangadu?

Memang ado jalur kaduo untuak manyampaikan suaro. Unjuak raso! Demo! Tapi iko pun diambek dek aturan nan tagang badantiang-dantiang. Salah-salah bisa dicap mambangkang ka negara.

Kini, ado pulo caro lain untuak manyuarokan aspirasi, yaitu malalui media sosial (medsos). Ado nan batarang-tarang di akun resmi (namo dan data pribadinyo sasuai KTP). Banyak pulo nan pakai akun antu, anonim. 

Tapi, itu pun baresiko dikandangsitumbinkan dengan UU ITE. Sungguahpun banyak juo akun di medsos tu nan asa kamambalintang sajo di muko pemerintah, tapi nan jaleh ado saluran nan tasandek dalam demokrasi kito. Sahinggo--karano tasandek tu--sarupo ayie, nyo taruih mancari salo-salo. Sahinggo, kadang-kadang lah mulai manggiriek pondasi-pondasi ketahanan nasional. 

Di baliek pambalakangan itu, ado jajaran eksekutif (presiden, gubernur, bupati/walikota, walinagari/kapalo desa) nan kito mandatkan untuak maurus pemerintahan. Acok liau-liau tu manyabuik bahwasanyo kabaradaan mereka adolah sabagai pasuruah rakyat. Kalimek iko kalua, tarutamo kutiko kampanye--sarupo pilkada kini ko lah. 

Tapi, kutiko lah dilantik, lah lain pulo curitonyo. Payah mancari pamimpin nan iyo bana-bana sayang ka rakyatnyo sacaro sabananyo. Kok nan sayang ka babarapo urang, banyak nah. Banyak nan jadi pamimpin untuak kalompoknyo sajo. Nan di lua kalompok, nomor nan kasakian lah!

Ateh situasi bak nantun. Pakan-pakan kudian ko, kito diebohkan dek suaro tasandek tu. UU Ciptaker pun lah tokok palu. 

Jak daolu, lah sarupo iko juo. Lapan kali sawah tagadai, nan koncek tatek di ateh pamatang juo. Sahinggo, kok ka lurah dak dapek ayie, ka bukik dak dapek angin. Suaro-suaro kito tasandek. Tasakek.

Yo bana-bana lawak dak? Kutiko urang-urang tu maju dalam pesta demokrasi, kito banyak pulo nan lupo jo kurenah liau-liau wakatu duduak. Atau ijau dek mato dek pitih ciek piah.

Tu ka baapo juo lai? Salah awak juo. Jadi, ancak anok daripado mangarengkan dak tabado, ujuang-ujuangnyo masuak pinjaro!

Atau, jan taulang juo panyakik lupo. Supayo isuek, kok ka lurah lai dapek ayie.


Wartawan : TE Radjo Boedjang
Editor : sc.astra

Tag :#Ciptaker #Minang #Kato