HOME LANGKAN CARITO

  • Sabtu, 16 November 2019
HANTU RAU RAU
Carito

 

HANTU RAU RAU

Oleh: Hensi Putri*

 

Sanjo lah mulai manampak an dirinyo sairing dengan balalu nyo matohai maninggakan balahan bumi ko dan mulai manarangi balahan bumi lain nyo. Bunyi suaro burung mulai maninggakan tampek mancai makan nyo dan mulai kambali manuju sarang nyo, baitu pun dengan burung pipik yang lah kanyang tangkuluik nyo dek padi nan lah mulai manguning. Namun lain dek mungko patani yang nampak kusuik dek burung pipik nan mamakan padi nyo dan malam ko, nyo mulai mamikian baa caro untuk mambuek pausia buruang pipik salain urang-urangan sawah dan kaleng bekas yang dikabek an. Salain itu, ayam pun dek mancalik langik dan mulai manguniang pun turuik sato juo untuk kambali ka kandang nyo, baputa-puta di sakita kandang nyo dan ado juo nan masuk ka kandang nyo.

Tampak nyo sagalo makhaluk di bumi ko tau kalau lah mulai sanjo hari waktu nyo untuak kambali pulang, memang baitulah kodrat nyo dan kini yang tingga hanyolah binatang malam nan lah siap untuak manacari mangsa nyo nan indak sempat pulang ka kandang nyo atau pun yang masih baleha-leha mancalik matohari nan ka tabanam. Ndak lamo siap tu, azan maghrib lah bakumandang di masajik atau pun mushola, maimbau satiok urang untuak malaksanakan kawajibannyo kapado yang maha kuasao. Malaksanakan sumbayang limo wakatu. Urang mulai babondong pai ka tampek suaro azan tadi bakumandAng karano magrib ko subanata wakatu nyo kalau lambek-lambek  suaro azan isya siap lo mananti. Baitu juo samo  Mak Adih, nyo mulai lo siap-siap  pai ka masajik malaksanakan kawajibanyo sambia mambawok talakuAng di tAngan nyo. Dan ndak lupo nyo kecek an ka Randi, anak nyo nan barumua sambilan tahun dan baru duduak di kelas ampek sd.

“ oii Randi pulAng lai.. urang lah azan aa ..pulang lai “ kato Mak Adih maimbau Randi nan sadang sero main kalereang sam kawan kawan nyo.

“ nggu nta lu mak “ kato Randi maharik lo dari jauh sambia main kalereang juo samo kawan kawan nyo mamparabuik an kalereang yang ado dalam lingkaran tu masih banyak jo lai dan sia yang dapek manembak nyo kalua mangko inyo dapek sadoan nyo kalereang nyo tu. Dan hari ko taruhan kalereang nyo lumayan banyak, bisa di jua bisuak ko ka kawan kawan nyo. Ndak mungkin kasampatan ko di sio-siokan dek Randi do

“pulang lah lai… beko dipicik dek hantu rau rau baru tau raso nyo dek Ang!” kato Mak Adih maimbau Randi yang masih tatok sajo  manembak an kalereang nyo. Namun Randi yang fokus  samo kalereang pun tatap sajo indak mahirawan kecek amak nyo.

“ tasarah Ang lah lai .. beko kalaua lah biru biru badan Ang tau raso Ang lai “kato Ida yang baru kalu dari rumah sambia mambawok talakuang di tangan nyo.  

“ capek lah Ida  ..padian se lah adik kau tu .. beko lah salasai lo urang sumbayang “ kato amak bajalan capek samo Ida deklah tadanga iqomah di masajaik.

 Biaso nyo Randi kalau di kecek hantu rau rau nyo langsuang takuik namun karano nyo ingin mandapek kan ka sadoan kalereang tu, indak diacuh an no kecek uni nyo do. Namun karano indak manuruik an kato mandeh nyo, apolah dayo inyo hanyo dapek tigo buah kalereang sajo, karano barasil manembak nyo kalua dari lingkaran. Dan  dek hati kesal nyo pulang sambia mambaok ampek buah kalereang yang di mainkan nyo. dan siap tu nyo langsuang mandi  mambarasihan badan nyo sasudah  bapaluah main kaja-kajaan tadi. Lah taraso badan sanang dek nyo, dan sasudah no mandi paruik no mulai babunyi minta diisi jo nasi karano dari pulang sakolah sampai kini nyo asyik sajo main samo kawan-kawan nyo bahkan baju sakolah nyo se sumbarang latak se lai.

 Satalah nyo isi paruik nyo jo nasi lah mulai sanang lah badan ko. Badan lah sanang paruik lah kanyang. Kini nyo iduik an lah tipi lai manonton acara kasukoan nyo. Namun badan nyo mulai sakik-sakik antah dek aa ndak tau  badan nyo mulai sakik sakik sakujua badan nyo pas nyo calik di lAngan nyo ado se lingkaran bawarna biru  sagadang pitih limo ratuih di tangan nyo dan di badan nyo, langsung jo nyo manangih kareh-kareh tangiek kato amak nyo kalau lah dipicik dek hantu rau-rau malam nyo  dibawok dek hantu rau-rau tu. Takuik kalau dibaok dek hantu rau-rau tu tangah malam . Amak samo uni nyo nan baru pulang di musajik pun takajuik mancalik Randi manangih  sajadi-jadi, amak nyo nan heran batanyo ka Randi baa ko bisa manangih nyo

“ dek aa Ang manangih? ..kalah Ang main kalereang ?  tanyo amak nyo

Sambia tatap manangih Randi manujuk an tangan nyo mambiru biru yang sagadang pitih limo ratuih tadi.  Sambia sasaguk an Randi mangecek an ka amak nyo kalau ino di picik dek hantu rau-rau dan nyo takuik kalau tangah malam inyo di cilok dek hantu rau-rau tu. Mandanga kecek Randi

Langsuang jo galak amak samo uni nyo mancalik Randi yang manangih sasaguk an tu

“ tu mangko nyo danga kecek amak .. asailah.. tibo hantu rau-rau tu tangah malam ma ” kato uni ida galak mancalik adik nyo manangih sasaguik an  mambayangan inyo tangah malam di  di baok dek hantu rau-rau ka ateh bukik.

“ lah ma jan nangih jo lai .. besok lah hilang nyo ma “ kato Mak Adih macalik anak laki-laki samato wayang nyo manangih sasaguk kan

“ tu mangko nyo kalau di suruh pulang tu pulang lai indak main juo do.. ingek wakatu indak lupo jo dek ba main do.. maminteh sabalun anyuik malantai sabalun lapuak ingek ingek sabalun kanai..” kato amak nyo maagih nasehat  dek taranga papatah minang yang baru taranga dek uni Ida tu ditanyo  nyo ka amak nyo arti maksud nyo tu. Di jalehan lah dek amak nyo kalau maksuda dari papatah minang tu  jiko kito malakukan suatu pakarjaan harus lah bedasarkan yang batua dan ingek tentang akibat dari apo yang di karajoan tu jan  sampai lah dapek akibaek nyo baru manyasa jadi wak harus  mangarati akan akibaek dan tanggung jawab ateh apo yang wak karajoan tu kalau lah tajadi akibaek nyo baru manyasa indak ado guno nyo lai do . lai paham tu ? “ kato amak nyo

“ lai mak “ jawek ida

“ lah ma jaan manangih jo lai, ndak ado gai hantu rau-rau tu ni baok Ang doh” kato amak nyo maambik minyak uruik untuk di baluik kan badan biru-biru Randi tu. Sasudah di baruik minyak uruik ka badan Randi.  baru lah agak mulai mahilang biru-biru di badan Randi tu. Namun, tatok sajo Randi takuik kalau kalau hantu rau-rau datang ka bilik nyo. Samantaro itu, Randi tatap sajo sasagu kan dan takuik beko tangah malam hantu rau-rau tibo ka biliak nyo.

 

*Mahasiswa Sastra MinAngkabau Unand


Wartawan : Hensi putri
Editor : bahren

Tag :# Langkan # curito #minang