HOME LANGKAN CARITO


  • Rabu, 11 September 2019
Gadih Parantau

 

Gadih Parantau

Oleh: Annisa Krisdayanti

zaman saisuak dauku, alun ado nan namonyo anak gadih pai marantau. Anak gadih biasonyo mauni rumah gadangnyo, indak ado nan namonyo pai-pai dari rumah gadang. Bak kato pepatah minang ” bundo kanduang di Minangkabau, limpapeh rumah nan gadang, amban puro pagangan kunci, nan bak dama tapasang tinggi, taba rumpun tampak jauah, taba rambang tampak dakek, kasuri tauladan kain, kacupak tauladan batuang, pai tampek batanyo, pulang tampek babarito, litak tampek mintak nasi, auih tampek mintak aia, iduik tampek banasa, mati tampek baniaik, bakeh undang-undang kamadinah, ka payuang paji manuju sarugo, pusek jalo pumpunan ikan, masaklah buah kacang padi, dijua urang katangah pasa, padi nan masak batangkai-tangkai, bundo kanduang tauladan budi, paham nan usah amuah tajua, budi nan indak amuah tagadai. baitu pentingnyo kadudukan bundo kanduang dalam rumah gadangnyo, yaitu seseorang yang dijunjuang tinggi, urang nan disagani dalam rumah gadang.  Seharusnyo anak gadih mancaminkan prilaku bundo kanduang dalam adaik jo budaya Minangkabau.

Mela nan barumua 18 tahun, anak dari Siti. Anak Surang tungga babeleang tingga di kampuang, inyo baru tamaik SMA, inyo nak malanjuikan sikolahnyo kalua, tapi dek amaknyo indak satuju inyo pai marantau kalua walaupun itu untuak pai baraja.

“Kamanga denai di kampuang Mak?, urang bi pai baraja kalua”

“Oi piak indak mangarati amak dek kau doh, kamanga bana kau sakolah tinggi-tinggi kau ka baliak ka dapua juo, amak pun ndak picayo daerah urang tu nak, kau padusi, ndak bisa samudah itu amak lapehan kau marantau ndoh nak”

“Mak baguno dek denai sikolah tu mah mak, denai nio iduk awak labiah elok mak”

‘Ndak paralu doh nak, awak lai basawah jo baladang. Jo itu awak masih bisa iduik, ndak ado padusi nan marantau dalam adaik wak doh nak, jan kau langga adaik tu itu harago mati.” Sambia maninggakan Mela di ruang tamu.

Mela tasuruik, inyo ndak tau apo nan ka di buek nyo ba.a caronyo marubah pikiran amaknyo supayo inyo dibuliahan pai baraja dilua. Tapikia dek nyo ka mangadu ka maamak nyo untuak mambujuak amaknyo supayo namuah malapeh nyo baraja di lua.

Bisuaknyo, sasudah makan pagi Mela barangkek ka rumah Mamak nyo, jo niaik supayo mamak namuah manolongnyo. Satibonyo di sinan nampaklah dek Mela Eteknyo sadang manyapu di halaman

“Assalamualaikum tek” sambia manyalami

“Waalaikumsallam, ondeh Mela ruponyo pagi-pagi bana kasiko mah?”

“Iyo tek, Mela ka basobok jo Mamak tek”

“Oooo bitu, nah naik lah bia etek imbauan”

“Jadih tek” sambia bajalan masuak

Indak lamo tibo lah Mamak Mela kalua “Assalamualaikum Mak” sapo Mela sambia mancium tangan Mamaknyo

“Waalaikumssalam, duduak lah nakan, ado apo kamari pagi- pagi bana ko?”

“Roman ko mak, Mela lah tamat SMA mak, sapatuiknyo Mela lanjuik baraja kalua, tapi dek amak ndak izin ndak tau kama Mela ka mangadu doh mak, Mela nio bana baraja kalua mak mangkonyo Mela kasiko mintak tolong Mamak mambujuak amak supayo Mela buliah baraja kalua”

“ Jadi roman tu, jadih nah, malam beko sasudah mugarik mamak ka rumah, bia mamak pikian dulu jadi tunggu jo lah”

“Jadih mak Mela tunggu, kalau roman tu Mela baliak dulu mak, Assalamualaikum”

‘waalaikumssalam”

Mela pun maninggakan rumah mamak nyo sambia bajalan inyo taruih bapikiabaa supayo amaknyo mangarati, sadang bajalaan indak sangajo inyo basobok jo kawan nyo si Ratna.

“Oih Mela kau ruponyo” sapo Ratih

“Eh Ratih, ka kama kau babaju rancak roman ko?” tanyo Mela

“Io mel aden ka baraja kalua sabanta lai den ka kapai”

“ Oh roman tu baraja dima kau?

“ di Medan mel, ndak buliah jauh-jauh bana dek gaek den doh, kau ba.a di ma kau lanjuik?” tanyo Ratna

“Aden alun tau lai doh amak den indak mambulihan den kalua dari kampuangko doh”

“Ondeh ibo den caliak kau Mel yang saba dih bujuak taruih mak kau tu pasti hatinyo luluah mah”

“Iyo na mokasih dih”

“iIo mel, awak pai lu dih”

“Elok- elok yo na di jalan beko”

“Iyo mel, mokasih” sambia maninggan mela

Satibo di rumah mela manunggu amaknyo pulang dari ladang, ndak lamo amak Mela tibo

“Assalamualaikum”

“Waalaikumssalam” jawek Mela sambia manunuduak kapalonyo. Amak nyo nan mancaliak itu mambiannyo se sambia bajalan kadapua.

Mela indak mangarati jalan pikiran amaknyo, inyo indak tau kamanga kamanangih bananyo amaknyo indak ka maizinan bana doh. Tapikia dek Mela kalaulah Ayahnyo masih iduik pasti dibulihannyo pai sakolah kalua, amak indak kasakereh ko jo inyo kalau kajadian tu ndak tajadi.

Tabayang dek nyo malam ayah nyo kapai karajo kalua

“Ayah apo harus kalua bana ayah cari karajo, indak bisakah karajo disiko se ayah”

“nak, karajo disiko indak sabandiang jo dilua doh nak, dilua tu banyak pelajarannyo untuak awak kalau awak hanyo di kampung se bilo awak ka bakambang awak harusmancaliak dunia lua tu supayo wawasan awak batambah”

“Bak itu yah, kalau roman tu Mela nio lo sikolah dil ua bisuak ko”

“ Rancak tu nak, baraja kau elok-elok disiko dulu beko lah sudah baru kau bisa baraja kalua”

Itu pasan tarakhir ayahnyo sabalun pai ka rantau, indak tau antah malang apo nan tibo ka inyo. Indak lamo inyo dapek kaba oto ayahnyo balantak dan ayah nyo indak bisa di salamaikkan.

Raso bumi baguncang mandanga kaba ayahnyo lah maningga aia mato indak tatahan kalua sadareh-darehnyo, nan amaknyo mamakiak indak picayo sarancaknyo inyo ndak maizinan lakinyo pai ka rantau kalau harus romantu.

Samanjak kajadian itu amak Mela indak pernah nio Mela pai jauh-jauh dari inyo, kalu dapek Mela tu harus dirumah.

“Mela makan lai hari lah siang” imbaua amak Mela

“Iyo mak” jawek Mela sambia kalua kamar nyo

Sadang makan tu tapikia dek nyo mamintak izin amak nyo baliak supayo bisa kalua

“Mak ndak bisa apo amak maizinan mela kalua mak, Mela nio bana baraja kalua mak”

“ Ijan itu juo nan kau bahas lai, kalau amak lah mangecekan indak yo indak”

“Tapi mak...” kecek Mela taputuih

“ALAH TU kau ka jadi anak durako mambantah se dari kpatangan amak ndak nio mandanga kau mamintak iko juo” sambia maninggan Mela di meja makan

Mela managih, iko patomo kalinyo inyo diariak amaknyo, makonyo indak pernah sa berang iko kainyo, taibo hatinyo sambia manangih inyo balari ka kamarnyo

Malam tibo mela manati mamak nyo nan ka tibo indak lamo tadanga suaro dilua

“Assalamualaikum”

“Waalaikumssalam, uda rupo nyo masuak da” jawek amak Mela

“si Mela kam nyo?” tanyo Mamak Mela

Inyo lai di kamar da ka awak imbauan”

“Jadih rancak romantu”

“Mela kalua lah nak, mamak disiko” imabau amak Mela. Sambia mambukak pintu Mela bajalan kalua inyo duduak dakek Mamaknyo

“bak iko aden kamari dek kainginan si Mela, inyo pagi tadi ka rumah mamintak tolong ka den mambujuak kau supayo namuah maizinan nyo baraja dilua”

“ Ambo ndak nio onyo kalua doh da, alah acok ambo kecekan tapi inyo ndak mangarati”

“Ba a ndak kau buliahan inyo kalua, apo karano kajadian nan patang tu nan mambuek kau maikek inyo di rumah?”

“Ambo nak nio ditinggan lai doh da, apo lai awak ndak tau hiduik urang dilua tu ba.a, ba.a jadi nyo kalu inyo hancua tibo dilua indak ba adaik gaya iduik urang ndan di pakai malu lah wak sebagai urang minang padusi pulo”

“Apo kau yakin anak kau ka roman tu, aden mangarati masuik kau tapi satidaknyo picayo lah kau ka anak kau surang”

“Uda dalam adaik awak ndak ado namonyo padusi nan pai marantau doh, baraja bana nyo tinggi- tinggi inyo kabaliak ka dapua ka rumah, sio-sio manuruik ambo inyo kalua”

“Diak kanduang ndak ado namonyo sio-sio dalam mancari ilmu doh, baguno ilmu tu beko di kemudian hari meskipun inyo baliak kadapua, tapi inyo ado dasar ado pemikiran untuak mandidik anak nyo beko urang bailmu tu di haragoi dek urang diak, pikia kan nan ka elok untuka anak kau, satidaknyo bia lah inyo sakolaha nan dakek disiko se nak uash bana pai nagari urang”

“Ambo akan pikian baliak da, ambo ndak bisa kini mamutuihan doh”

Sasudah mamak pulang dari rumah malam tu, amak indak nio mangecek jo Mela, tibo tibo amak maimbau Mela di kamar

“Mela kamari kau sabanta”

“Ado apo mak”

“ Sabara bana kau nio baraja di lua tu”

“Nio bana mak, mela nio manambah ilmu dilua”

sambia mahela napas amak Mela mangecek “kau tau nak, apo sabananyo alasan amak ndak nio kau pai dari siko, tapi hati kau kareh juo ndak kalua amak ndak talok kalau kau pai nak amak takuik”

“Amak Mela elok-elok se, Mela bisa jago diri kalau ndak dapek Mela baraja di nagari urang saindak nyo izinan Mela baraja ka kota mak, dakek sangenek dari kampuang awak amak juo bisa kasina mancaliak Mela, atau Mela bisa baliak ka kampuang saminggu sakali”

“Jadi lah nak kalau kau nio juo tapi kau hanyo buliah baraja di kota ndak taloka amak malapehan kau jauah-jauah doh”

“ Mokasih banyak mak, mela janji indak akan mangacewaan amak”

“Iyo nak” sambia mamaluak managih mamaluak Mela

Dalam hatinyo Mela batekad supayo kesempatan nan di agiah amak nyo ndak sio-sio inyo pasti jadi urang dan inyo pasti mambuktian ka amaknyo kalau inyo elok-elok se di sinan adaik padusi minang indak kahilang dari dirinyo.

 

SALASAI

 

Penulis merupakan Mahasiswa, Sastra Minangkabau,

Universitas Andalas


Wartawan : Annisa Krisdayanti
Editor : bahren

Tag :# Langkan # curito #minang