HOME LANGKAN KATO

  • Sabtu, 27 Maret 2021
Carito Sagalo Tigo (3)
Tungku Tigo Sajarangan (foto: internet)

Carito Sagalo Tigo (3)

Oleh TE Radjo Boedjang

Lah kito curaikan di tulisan sabalumnyo, pakaro tungku jo tali nan idak padu. Dikaranokan tagak tungku nan mulai oleang. Tungku pun mulai teleang. Mungkin dek batu idak samo gadang? Duduak idak samo randah. Tagak idak samo tenggih.

Apokah padek pilin tali? Bukan dak mungkin pilin tu lah mulai bakisa. Dek ulah ado tali nan maraso labieh gadang, bisa sajo pilinan tagaduah. 

Baa caro supayo tigo batu nan manjadi tungku bisa bakolaborasi dan basinergi sacaro duduak samo randah tagak samo tenggi? Apo sarek supayo pilinan tali tu harmonis, dak ado nan maraso kaciek-gadang. Dak ado nan maraso ikik dari nan lain. Dan ado nan maraso manjadi ikan ameh malabiehi nan lain.

Baa caronyo, bacarono, bacarano...?

Partamo, katigo batu ataupun tali musti punyo ilemu sasuai tipak tugeh surang-surang. Satitiek indak lupo, siang dipatungkek, malam dipakalang.

Pemerintah--atau cadiek pandai--nan mamacik tali undang, harus manguasai undang-undang jo aturan-aturan pelaksanaannyo. Dan manjalankan undang sacaro bijaksano. Tibo di paruik indak dikampihkan, tibo di mato idak dipiciangkan.

Niniek mamak musti manguasai tali adat. Tau di nan ampek. Tau jo salah dan sumbang. Tau jo ereang jo gendeang. Dan bijaksano mamakaikannyo, sasuai jo alue jo patuik. Mamakaikan prinsip kamanakan barajo ka mamak. Mamak barajo ka pangulu. Pangulu barajo ka nan bana. Nan bana tagak sandirinyo. 

Baitu pun alim ulama, tau jo salah bata. Paham rukun jo syarat. Tagak jo Al Quran dan Hadist. Dan maajakannyo ka kaum surang-surang.

Nan kaduo, katigo batu ataupun tali musti malatak an budi di ateh ilemu. Katigo urang tu harus babudi. Budiman. Nan kuriek kundi, nan endah baso. Nan baiek budi, nan endah baso. Utang ameh dapek dibayie, utang budi dibaok mati.

Budi lah nan maikek patalian hubungan. Mako banyak urang mangecek budi di ateh ilemu. Urang bailemu--lazim disabuik alim--kok idak babudi manjadi dzalim. Urang babudi disabuik baradab. Kok dak babudi, biadab!

Nan katigo, katigo unsur tu musti punyo kayakinan ketuhanan nan samo. Tauhid.

Dalam sagalo tigo tu, ada tigo tali. Ado tigo batu. Tali jo batu manunjuak an urangnyo. Tigo batu manjadi tungku dan tali tigo sapilin manunjuak an limbago nan tajadi. Ado tugeh.

Kok bulieh diumpamoan, sarupo kaji urang saisuek, tali tigo sapilin malambangkan tali jantuang, hati jo ampadu. Katigo tali tu satu di tali nan gadang. Tali gadang itu lah nan malambangkan tauhid. Mako tali tigo sapilin paralu di ikek jo tauhid.

Dalam tigo unsur tu, pataliannyo akan samparono jikok diikek jo tigo pakaro. Ilemu, adab dan tauhid. Tigo hal iko lah nan mampatalian tigo unsur. Ibarak sagi tigo--nan tapakaikan di deta--ruang di dalam sagitigo tu diisi jo ilemu, adab dan tauhid. 

Kok lah tapakaikan nan tigo tu, mako puncaknyo adolah raso kasiah sayang ka sagalonyo. Kasiah sayang ka Tuhan nan Laisa Kamislihi Sai'un. Kasiah sayang ka alam--sagalo sasuatu nan diciptakan Tuhan, atau sagalo hal nan di lua Tuhan--sarupo sayang ka dirinyo. Bahkan malabiehi dari kasih sayang ka batang tubuah surang!


Wartawan : TE Radjo Boedjang
Editor : sc.astra

Tag :#Minangkabau #BahasaMinangkabau #TungkuTigoSajarangan