HOME LANGKAN PEPATAH

  • Selasa, 15 Oktober 2019

BURUAK MUKO CAMIN DIBALAH

Pepatah
Pepatah

BURUAK MUKO CAMIN DIBALAH

Oleh : Eja Fatimah*

Mamangan adat minang nan ado diateh malambangkan suatu sifat nan suko salah manyalahan. Sifat iko banyak di pakai dalam kalangan padusi. Buruak muko camin dibalah. Buruk di siko dalam kamus bahaso minang aratinyo adolah barang sasuatu nan alah rusak karano alah lamo indak tapakai atau alah lamo karano indak tarawai lai. Buruk bisa lo diaratian samo sipaik urang. Kato sipaik di siko barati diri seseorang nan mampunyoi sipaik buruk nan alah tatanam di dirinyo sajak maso ketek. Buruk tu adolah kato nan paliang indak lamak untuk didanga, karano banyak urang nan mangatoan kato tu adolah kato dan bisa mambuek urang malu, sampai-sampai kato sangaik indak disukoi urang. Tapi sipaik buruk atau kato buruk tu taruih malakek ka manusia ciptaan Allah ko. Itulah manusia ko, indak nio dikatoan buruk tapi nyo taruih mangarajoan nan buruak tu.

Kato nan kaduo adolah muko. Muko adolah bagian dari kapalo, dari kaniang ateh sampai ka daguak tu antaro talingo suok sampai ka talingo kida. Dalam kato muko tadapek duo buah huruf vokal di dalamnyo. Muko bisa jo diaratian samo bantuak urang. Jadi muko di siko aratinyo adolah saketek dari mungkonyo kapalo urang samo jo bagian muko dari kapalonyo, dalam bahaso Indonesianyo "bagian depan wajah". Muko di siko bisa jo disabuik samo contoh sipaik dalam yangg adoh apo diri surang.

Kato nan katigo tu camin. Camin dalam bahaso Indonesia nyo adolah "cermin" aratinyo sabuah kaco nan bisa manampak an bayangan urang di dalamnyo, kaco atau camin biasonyo banyak digunokan dek padusi untuak manggaya jo basolek. Camin digunokan supayo bisa mancaliak baa penampilan awak. Mode mamangan adat: Bacamin ka diri surang artinyo: supayo bisa maliek sia diri awak nan subananyo sabalum urang lain nan mancaliak. Biasonyo camin taruih disalahan kalau urang tu nampak buruam dimukonyo, tapi kalau urang namokan rancak dimuko nyo pasti camin ko nan taruih di sanjuang-sanjuang. Samo halnyo jo sipaik manusia nan suko diambuang-ambuang, nan suko dipuji-puji. Manjadian manusia tu kadang adoh jo nan ndak sadar bisa manjadi kasomboangan bagi diri nyo surang.

Kato nan tarakir dalam mamangan adat di siko adolah dibalah. Mampunyoi imbuhan barupo awalan di- dan ditambah jo kato dasar balah manjadi dibalah. Dalam bahaso Indonesianyo dibalah mampunyoi makna "dibelah". Aratinyo sesuatu nan maranggang, sesuatu nan tabukak, sesuatu nan alah rusak, jo dapek tabagi duo atau labiah. Aratinyo kato dibalah samo jo makna sesuatu nan sangajo dikarajoan,sesuatu nan indak disuko sahinggo dihancukan dengan caro surang. Baa kecek urang gaek dulu: Babuek-buek,, Basangajoan

Jadi sacaro manyuluruah arti buruk muko camin dibalah tu adolah sipaik urang nan suko manyalahan urang lain. Padahal nyo tau dirinyo salah, tapi nyo tetap manyalahan urang,bia inyo nampaknyo elok se taruih dan urang lain nan manangguang sipaik buruaknyo tu, urang nan mampunyoi sipaik iko biasonyo, urang nan suko iri hati, urang nan ndak punyo sopan-santun dan urang nan ndak punyo tata krama dalam iduiknyo. Urang nan tau jo raso sagan manyagani. Karano nyo hanyo nio dirinyo tu dianggap batua dek sadolah urang. Urang nan mampunyoi sipaik mode iko ndak akan salamaik manjalani iduik, salah urang se nan nampak dek inyo, tapi salah inyo taruih ditutuik an nyo, sampai-sampai inyo nan babuek salah urang lain nan jadi kambiang hitamnyo. Iduik di dunia ko tarutamo di Minang, harus punyo raso sagan jo raso sopan-santun, karano kalau ndak punyo raso jo pareso tu awak ka nyo injak se dek urang, samo jo indak ka diharagoi dek urang lain.

 

 

*Mahasiswa Sastra Minangkabau FIB Unand

 


Wartawan : Eja Fatimah
Editor : bahren

Tag :# Langkan # Pepatah # Minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com