Turun Mandi: Tradisi Sakral Kelahiran Dalam Budaya Minangkabau

Turun Mandi: Tradisi Sakral Kelahiran dalam Budaya Minangkabau

Oleh: Andika Putra Wardana

Di tangah kakayoan budayo Minangkabau, Turun Mandi manjadi salah satu tradisi nan masih batahan sampai kini. Ritual iko bukan hanyo sakada ritual biaso, tatapi juo sabagai simbol kahidupan baru jo bantuak raso syukur kapado Allah SWT ataih kalahiran saurang anak. Maskipun alah balangsuang salamo baabaik-abaik, pamahaman tantang makna jo filosofi di baliaknyo masiah acok lupuik dari parhatian.

Dalam tradisi Minangkabau, saurang bayi nan baru lahia indak hanyo dianggap sabagai anggota baru dalam kaluarga, tetapi juo sabagai bagian dari masyarakaik jo alam. Turun Mandi batujuan mampakenalan bayi kapado lingkuangannyo jo mambarikan doa samo harapan baiak untuak maso depannyo. Di babarapo daerah, kayak Nagari Panyakalan, Kabupaten Solok, ritual iko masih dilakukan dangan panuah khidmat, maskipun palaksanaannyo agak saketek babeda di satiok daerah.

Acara iko biasonyo dilakukan sasudah bayi baumua tujuah hari. Jikok bayi laki-laki, mako upacaro nyo digala pado hari ganjia dari hari kalahirannyo, sadangkan untuak bayi padusi dilakukan pado hari ganok. Dalam prosesi iko, bako punyo peranan pantiang. Inyolah nan mambaok bayi ka tampek acara, baiak itu musajik, musholla, atau batang aia tadakek, tagantuang kabiasaan di daerah itu.

Satibonyo di lokasi, bayi dimandikan dangan aia nan alah disiapan. Proses iko indak hanyo mambarasiahan fisik bayi, tetapi juo diyakini untuak mambarasiahan diri sacaro spiritual. Sudah amandi, bayi diolesi campuran rampah-rampah kayak marica hitam jo kencur, sabagai simbol parlinduangan jo panguatan tubuah. Dalam babarapo tradisi, bibik karambia juo dihanyuikan dari hulu sungai, sudahtu ditangkok dek ibunyo sabagai tando harapan supayo sang anak tumbuah kuek, bamanfaaik, jo barakar kuek saparti batang karambia.

Ndak hanyo bayi, sang ibu pun ikuik dimandikan dangan sisa aia mandi bayinyo. Ritual iko malambangan kasucian jo harapan supayo ibu jo anaknyo punyo ikatan nan kuek dalam kahidupan mandatang. Sasudah itu, bayi jo ibunyo diarak kambali ka rumah dek pihak bako, diiriangi doa jo harapan baiak dari kaluarga jo masyarakaik.

Turun Mandi juo manjadi ajang silaturahmi. Kaluarga jo tetangga nan hadir indak hanyo manyaksikan ritual iko, tatapi juo maniakmati hidangan khas saperti gulai ayam kemumu Jo batiah bareh badulang nan dibagikan kapado anak-anak sabagai simbol parkenalan si bayi dangan lingkuangan sakitarnyo.

Di baliak sarangkaian prosesi iko, tasimpan filosofi mqndalam. Turun Mandi mangajarkan kalau manusia haruih hiduik salaras samo alam, sabagaimano papatah Minangkabau mangatokan, "Alam takambang jadi guru". Diharokan, bayi nan manjalani ritual iko kelak tumbuah manjadi pribadi nan kuek, mandiri, serta punyo jiwa sosial jo kaberanian mambela kabenaran.

Maskipun zaman taruih barubah, tradisi iko masih dijago dek sabagian masyarakaik Minangkabau. Tapi, di babarapo daerah, palaksanaannyo mulai mangalami pageseran atau bahkan manghilang. Oleh karano itu, upayo palastariannyo sangaik pantiang supayo nilai-nilai luhua dalam Turun Mandi tatap diwarihan kapado ganerasi mandatang. Bukan hanyo sakada tradisi turun-tamurun, Turun Mandi adolah carminan caro masyarakaik Minangkabau mamaknai kahidupan jo kabarsamaan.