Mangenal Parmainan Tradisional Anak Nagari Pariaman: Warisan Budayo Nan Mulai Puda

Mangenal Parmainan Tradisional Anak Nagari Pariaman: Warisan Budayo nan Mulai Puda

Oleh: Andika Putra Wardana 

Anak-anak nagari Pariaman di Sumatera Barat dari dulu dikenal sabagai nagari nan punyo kreativitas dalam manciptokan parmainan tradisional nan indak hanyo manghibur, tatapi juo  punyo nilai-nilai kabersamaan jo pendidikan. Tapi, sairiang parkambangan zaman, parmainan-parmainan itu mulai talupoan, lah tagantian dek gawai jo parmainan online. Padahal, parmainan tradisional iko marupokan warisan budaya nan patuik dilestarian.  

Saparti nan dikatokan oleh tokoah masyarakaik Pariaman, Datuak Malintang, "Parmainan tradisional bukan hanyo sakadar hiburan, tatapi juo bagian dari identitaih budayo kito. Malalui parmainan iko, anak-anak baraja tantang karajo samo, katangkasan, jo kecerdasan." Datuak Malintang manambahan kalau parmainan tradisional juo manjadi sarano untuak mampaarek hubuangan sosial antarwarga, tarutamo di kalangan anak-anak.  

Salah satu parmainan nan populer di kalangan anak nagari Pariaman adolah "Lumpek Tali" Permainan iko biasonya dimainan dek anak padusi, manggunoan karet galang nan disambuang sampai mambantuak tali panjang. Duo pamain mamacik ujuang tali, samantaro pemain lainnyo malumpekan tali nan dinaikkan sacaro batahap. "Dulu, kami bisa maabihan waktu bajam-jam bamain lumpek tali tanpa maraso bosan," kanang Rina, saurang warga Pariaman nan kini barusia 35 tahun.  

Salain Lumpek Tali, ado juo "Congklak", parmainan strategi nan malatiah kacerdasan jo kasabaran. Congklak dimainkan manggunokan papan kayu balubang jo biji-bijian atau batu karikia. Duo pamain saliang basaiang untuak mangumpuan biji tabanyak. Manuruik Datuak Malintang, parmainan ko mangajarkan anak-anak tantang pantiangnyo parencanaan jo katalitian.  

Permainan lain nan ndak kalah seru iolah "Petak Umpet". Parmainan iko indak mamparaluan alaik bantu jo bisa dimainaan dek urang banyak. Salah satu pamainnyo batugas sabagai "panjago" nan mancari kawan-kawannyo nan mandok. "Petak umpet salalu manjadi favorit karano bisa dimainan di mano sajo jo siapo sajo," kecek  Rina.  

"Engklek" juo manjadi parmainan nan digemari banyak urang, tarutamo anak padusi. Parmainan iko manggunoan denah petak nan digambar di tanah atau lantai. Pamain haruih malumpek dangan ciek kaki sambia manghindaan garih-garih petak. "Engklek malatiah kaseimbangan jo katangkasan," kato Datuak Malintang.  

Tarakhia, ado "Sipak Tekong", parmainan nan mamadukan unsur kacepatan jo strategi. Pamain manggunokan sabuik (tampuruang karambia) sabagai alaik utamo. Ciek pamain batugas manjago sabuik sambia mancari kawan-kawannyo nan basambunyi. Jikok sabuik diambiak dek pamain lain, panjago haruih maambiaknyo baliak sabalum malanjuikan pancariannyo.  

Sayangnyo, parmainan-parmainan tradisional ko kini mulai puda. Anak-anak labiah mamiliah maabihan waktu samo gawai jo parmainan online. Datuak Malintang mangungkapan kwkhawatirannyo, "Jikok indak dilestarikan, parmainan tradisional ko bisa hilang jo hanyo manjadi kenangan."  

Oleh karano itu, pantiang bagi masyarakaik, tarutamo urang tuo jo guru, untuak mangenalkan baliak parmainan tradisional kapado ganerasi mudo. Saparti nan disampaikan Datuak Malintang, "Malestarikan parmainan tradisional bararti manjago warisan budayo nenek moyang kito." Dangan bagitu, nilai-nilai kabersamaan, kreativitas, jo kecerdasan nan takanduang dalam parmainan tradisional anak nagari Pariaman dapek taruih hiduik jo diwarihan kapado ganerasi mandatang.