TUO ADAIK

TUO ADAIK

OLEH: BAHREN*

         Si Muih jo Si Alan alah duo minggu pulo agaknyo indak basuo jo Mak Datuak Lauik. Antah kama liau agaknyo, patang kalamari lai tampak dek Piak Enek tapi malinteh sajo di muko kadainyo, indak singgah bagai Mak Datuak Lawik, walau hanyo sakadar minun kopi agak sakarek takah nan taralah. Piak Enek pun lai manyarasyo Mak Datuak untuak singgah, Liau bakato saketek sajo, Ado urusan cah di dalam kaum liau. Bitu bana carito Piak Enek ka Si Muih jo Si Alan.

         Indak lamo sasudah tanyo jawek Si Muih, Si Alan jo Piak Enek mancogok lah Mak Datuak Lauik dari arah sampiang kadai. “Assalamualaikum”, kato Mak Datuak santai, “Waalaikum Salam” jawek urang batigo ko dari dalam kadai. Panjang umua Mak Datuak, kato Si Muih. Iyoo. Sambuang Si Alan jo Piak Enek. Baru sabanta ko bana kami, mampakecek an Mak Datuak, baa ko lah kaadaan Mak Datuak, alah duo minggu kito tak basuo.

         Ooo, bitu, iyo alah duo minggu agaknyo den tak ka lapau Piak Enek. Ado urusan saketek di kaum Den. Mako limbak nan dari pado itu, disalasaikan masalah tu dulu bia nak tarang ba matoari bagalanggang mato rang banyak, sainggo indak ado sakwa sangka lai dan masalah ko salasai. Kok lah baitu, kan lah sanang ulo anak kamanakan Mak datuak tu Mak, urag tuo nan takah ko nan sabananyo nan dicari-cari ndak Mak. Takana lo dek kami Mak, duo minggu nan lalu kan alah Mamak surah tantang tigo jinih urang tuo di Minangkabau ko, samantarao kato Mak datuak ado ampk jinih e. tolong lah disurah-an pulo kak kami jinih nan kaampek Mak, bia tak manjadi sakwa sangka pulo dek kami, basuluah matoari bagalanggang mato rang banyak.

         Kok baitu pintak kalia, bia lah Den surah jinih rang tuo nan kaampek. Rang tuo nan ka-ampek iyolah urang Tuo Adaik, baa bana urang tuo adaik tu, iyolah urang nan paham jo ereang sarato gendeang, bakieh kato sampai, takilek ikan di aia alah tau jantan batinonyo. Tau di rantiang ka mancucuak tau di dahan ka maimpok. Ka pai tampek batanyo pulang tampek babarito. Arati nyo bana urang tuo adaik ko, salalu diminta pandapek sarato sarannyo untuak manyalasikan masalah nan ado di dlam kampuang. Lain nan dari pado itu, urang nan tuo adaik ko salalu sajo bisa mancarikan jalan kalua dari masalah nan ado. Indak manambah karuah sarupo urang tuo sendok. Indak pulo mampalanggakkan umua nan lah gaek sajo cando urang tuo umua. Indak pulo diam mandamiang sajo, sarati tak mambiak aksi jo apo nan tajadi di dalam kampuang sarupo urang tuo tungku.

         Manjadi urang tuo adaik ko lah, andaknyo nan diharokkan dek awak nan ado kini ko. Kito nan ado kiniko sadapek mugkin manjadi urang tuo adaik ko lah untuak anak kamanakan kito nan ado di kampuang. Samantarao itu, anak kamanakan kito molah kito aja pulo untuak manjadi urang nan arif sarato bijaksano dalam batindak jo balaku dalam iduik jo kahidupannyo di dalam kampuang. Jikoklah itu nan tajadi, apo nan dikatokan dalam mamangan adaik kalua paku kacang balimbiang, tampurunag lenggang-lenggangkan. Anak di pangku kamanakan dibimbiang, urang kampuang dipatengganggang. Sagalo dan ditanam tumbuah, sagalo nan dibuek manjadi lah andakny di kamuang kito ko. Itu lah bana urang tuo adaik.

*Dosen Sastra Minangkabau Unand