RAO-RAO

Rao-Rao

di Tanah Data

Oleh: Bahren*

         Oiiii iyo…..

         Alah lamo indak ka parak

         Ilalang lah marimba pulo

         Alah lamo dek taragak

Nak maulang carito nan lamo

Hari sinayan pai kapakan

Pai ka pakan yo pakan baso

Kaba urang nan kami kabakan

Dotonyo urang ambo tak sato

Jikok anak oi pai ka pakan

Nak Capek naiak lah oto

Apokoh carito nan di kabakan

Carito asa usua rao-rao

Bacurito lah pado maso itu, tanggal sambilan baleh di bulan mei tahu duo ribu tujuah, Bacurito andku H.M.R Dt. Pangulu Basa di Rao-rao maso itu. Bakisah liau ka Ivan Adilla nan datang dari Padang langkok sarato jo rombongan. Baa nagari mako banamo Rao-Rao. Simakkan bana lah elok-elok dangakan molah baiak-baiak. Adolah pado maso daulu, sabalun ugamo Islam masuak, kanagari kami nangko. Niniak sarato moyang kami masih baugamo Hindu maso itu. Untuak malangko-i paribadatan, mako dibueklah dek niniak kami samacam candi, kutiko itu, niniak kami dipimpin dek surang pamimpin nan disabuik Roro. Limbak nan dari pado itu, daerah nan ado di dalam di sabuik lah jo Rao-Rao yang asanyo dari Roro.

Ado pulo sabuah lai, curito tantang nagari ko, Pado maso suatu hari turunlah limo niniak kami, turun nan dari puncak marapi, dek alah laom pai indak kunjuang tibo mako dicarilah dek niniak nan lain jo carao mancari raok kaki (jajak kaki) niniak nan balimo tadi inggo sampai lah raok tadi ka tampek kami ko. Mako di namoi lah daerah kami ko jo Rao-rao nan arati nyo jajak.

Daerah pamukiman nan katiak, mulai dibari namo Koto Katiak. Tampaik candi badiri dulunyo dibari namo daerah tu kini Selo, kkarano didaerah itu daulunyo kutiko urang sumbayang duduak sambia baselo. Lamao bakalamoan, daerah mulai dibari namo ateh dasar suku masyarakaik nan tingga di daerah nantun. Ado daerah nan banamo Kampuang katapang, aratinyo bana, di daerah nantun tingga masyarakaik nan basuku katapang.

Ado pulo daerah nan banamo Kampuang Kutianyia, Kampuang Bendang, Kampuang Mandahiliang, Kampuang Bodi jo Kampuang Caniago. Jikok di kaji asa mulo kampuang nantun tantu masyarakaik nan ado di kampuang itu, basuku Kutianyia, Bendang, Mandahiliang, Bodi sarato Caniago. Ado pulo Kampuang Koto nan isinyo urang koto, baitu pulo Kampuang piliang didiami dek niniak kami rang Piliang.

Curito ko alah di ddapek sarato didanga dek Mak Datuak Pangulu Basa sacaro turun tamurun dari urang nan tuo-tuo daulunyo. Di caritokan dek niniak nan labiah tuo dari Mak datuak Pangulu Baso. Manuruik Mak Datuak urang Rao-Rao asanyo dari Limo kaum jo Sungayang. Jikok ditanyo bana ka Mak Datuak curito ma nan banyak diyakini dek urang Rao-Rao, liau Mak Datuak Basa. Labiah picayo ka curito na  partamo.

Samantaro itu kini, nan Ivan Adilla sabagai panaliti, punyo pulo samacam pandapek. Adopun pandapek baliau rao ko barasa dari kaato rawa, karano di daerah itu memang banyak tanah nan rawa. Atau Rao ko asanyo sajinih buruang banamo rao (Carpophaga senea), sajinih buruang tekukur gadang nan banyak iduik di daerah nantun.

Itulah kisah nagari nan banamo Rao-Rao, jikok ado kisah nan bana tantang itu, tantunyo kabanaran nan datang dari tuhan, Allah ta’ala kayo sungguah tampek sagalo ilimu bahimpunnyo. Jikok nyo ado nan salah tantang carito tu, tantu salah nan datang dari ambo, manuasia nan basipaik salah. Kapado Tuhan ampun di pintak, kadunsanak pambaco maaf dipinto.

*Dosen Sastra Minangkabau Universitas Andalas