HOME OPINI CELOTEH

  • Jumat, 8 Mei 2020
PSBB Jilid II; Pabanyak #dirumahSajo
Celoteh

PSBB Jilid II; Pabanyak #dirumahSajo

Oleh Taufik Effendi

Nan jilid partamo lah salasai. Salamo diambek dibatehi itu, ado saratuih ampek puluah urang lah kasibaran. Kanai. Lah hampie saringgik banyaknyo. Dakek ka 250 lai. 

Tantu sajo baragam pandapek, basilang kato; PSBB ko dibuek untuk paambek, tapi mangapo justru batambah? Jan ka data, malah malonjak grafik tu!

Padohal, PSBB ko kan dipakai untuak ka paampang tungau nan banamo Covid-19 tu, dak? Baa supayo tungau tu dak bakaliaran sakandaknyo. 

Baa mampasampik garik tungau nan banamo Covid-19 ko? Hanyo duo caro. Cari panangkanyo, atau ambek langkahnyo. Panangkanyo lum ado, sadang diusaokan. Mangko, nan bisa dikarajoan hanyo maambek langkahnyo. Untuak maambek langkah itu lah, mako PSBB paralu. 

Pembatasan Sosial Berskala Besar/PSBN ko intinyo maambek garik jo garak. PSBB tu maampang kurenah, nak tau agak sadang tagak. Kok dak paralu, #dirumahSajo!

Baa mangko PSBB jilid partamo dak tampak mangkuihnyo? Jan ka bakurang, batambah ka riang-riangan nyo. Sarupo lubuak dak babatu se, nyo lanyau kito dek tungau!

Apo nan salah? Apokah masyarakaik masih basimadaharajolelo? Basipakakmada, atau antene tu bana nan randah? Atau karano arek-arek lungga? 

Kok parang jo badie, lah jaleh lawan nan kadisasau. Tampak arah nan kaditembak. Baa nan parang jo tungau? Antah iyo antah tido. Nan pasa bagadincik juo. Nan musajik rami juo; Antah heh, dak corona lo nan ka mambunuah doh! Awak samo-samo ba Tuhan mah, kok dak izin Nan Satu, lum corona lo nan ka maambek wak bajumek lai! Handehhh...

Apokah dek pangana-pangana sarupo itu, mako tungau makin maruyak? Antah lah. Nan jaleh, pindah mamindah tungau ko kini lah batumpak-tumpak. Manular sacaro lokal. Batumpak-tumpak makan api. Nan impor lah umpamo abih. 

Nan jaleh, nan bateh dilangkahi juo. Ukue lah suhu, antri lah oto, nan anak rajo lalu juo. Jan ka bakurang, batambah nan jadi. Dak baranjak lenggang dari katiak. Walau pamarentah lah basitungkin maalau tungau, maalah covid-19. Dak baranjak kain buruak dari tungkahan.

Alah dituruik alua. Alua samo dituruik, limbago samo dituang. Antah kok barabab di talingo kabau? Maalau ayie kamudiek. Atau garam bana nan baulek?

Kok di tipak pamarentah, lah batolan mangko bajalan. Lai mufakaik mangko bakato. Lah dilayangan pandangan jauah, lai ditukiek an pandangan hampie. Tapi nan tungau basilanteh angan. Co alang-alang dapek angin Covid-19 ko malonjak.

Atau lah anyuik labu dek manyauak? Lah ilang kabau dek kubalo? Lain dibarih, lain bapaek? Antah pulo lah. Rabab sajo manyampaian.

Apo aka lai? Kok dikunci mati bana lah ulayaik ko kini (lockdown), dak juo ka manggadangan ayie. Makonyo, dak ado nan ka dikao lai, salain taruihan PSBB. Tantu sajo PSBB jo caro baru.

Baa caronyo? Lakuan PSBB sacaro Main Cak bur. Ibaraik Main Cak Bur (di nagari lain ado nan manyabuik main galah), PSBB ko nan diarok an untuak maampang. Salain petak nan gadang, tiok petak ketek-ketek pun harus dijago. Mangko balarilah urang main cak bur ka ateh ka baruah. Di bagi karajo. Ado nan maampang suok kida di petak ketek. Ado pula nan maampang petak gadang, ka ateh la bawah.

Sacaro propinsi, lah diampang garik urang di tiok bateh. Sungguah pun baitu, nan linteh daerah (kabupaten/kota), harus pulo diampang. Daerah-daerah merah, sarupo Padang, harus diampang arek-arek, sahinggo dak ado nan kalua dari petak itu ka petak lainnyo. Kuruang!

Maampang garik jo garak tiok urang tu harus dilakukan pulo di dalam daerah. Ado petak gadang, di dalamnyo ado petak ketek-ketek. Dalam petak ado petak. Petak nan paliang ketek adolah rumah surang-surang. 

Nah, PSBB jilid 2 ko bisa mangkuih, kalau dipakai caro Main Cak Bur alias main galah tu. Salamah-lamah kaji, jago petak paliang kaciek, rumah surang-surang, jan sampai masuak tungau, ehh, Covid-19. Caronyo, pabanyak #dirumahSajo.

(Taufik Effendi, Pemimpin Redaksi Minangsatu/Wartawan Utama)


Tag :#psbbJilid2 #dirumahSajo #ciloteh