PANYALAIAN

Panyalaian

di Luhak Tanah Data

Oleh: Bahren*

Adolah pado suatu maso, tanggal tigo baleh di bulai Mei tahun duo ribu tujuah. Datang mahadok lah Ivan Adilla, datang nan dari Kota Padang, mahadok ka baliau Syahrul Abadi Datuak Tumaratan. Ketua KAN jabatan liau maso itu di Pincuran Tinggi basuo nyo. Limo puluah ampek umua Mak Datuak Tumaratan maso itu kutiko Ivan jo rombongan datang batamu. Apokoh mukasuik patamuan, indak lain indak nyo bukan untuak kabatanyo-tanyo sabab sarato asa usua manga nagari banamo Panyalaian.

Bakisah lah Mak Datuak Tamaratan, di Pincuran Tinggi Panyalaian, baa nagari banamo nan bak kian. Sangkek zaman daulo nyo daerah ko masih rimbo rayo, lalu datanglah sarombongan niniak kami ka daerah nangko, untuak mambukak sarato maolah lahan nan baru ka tampek tingga langkok sarato tampek bacocok tanam. Dek lamo bakalamoan, niniak kami ko mambuek kalompok-kalompok lah di siko. Inggo datang lah maso nan elok kutiko nan baiak, bakumpua lah niniak moyang kami di medan nan bapaneh, nan manjadi pakan raba’a kini ko. Di pakan itulah sagaknyo niniak moyang kami ko duduak baropok mancari bulek nan sagolong picak nan salayang untuak mambari namo tampek nangko. Di medan nan bapaneh itulah niniak kami maraso kapanasan saraso basalai jo matohari, mako dinamoi lah tampek nan paneh cando disalai dek matohari tadi jo namo Panyalaian nan maknanyo basalai matoari.

Dalam perkemabnagn nuo dikalak kamudian hari, panyalaian iko kini dibagi manjadi lapan daerah nan labiah ketek atau jorong kato rang di siko. Daerah nan talatak dibagian ateh nan manjadi tampek atau jorong nan mulo-mulo didiami dek niniak moyang kami dibari namo lah jo Koto Tuo “Koto na paliang tuo”. Namun, dek masyarakaik batambah rami juo, mako sabagian bapindah ka subarang koto tuo, mako tampek itu kini banamo Koto Subarang. Koto tuo jo koto subarang ko hanyo dibateh dek rel kureta api mako nyo disabuik jo koto subarang atau di subarang rel kureta api. Ado pulo sabuah lai tampek nan biaso dijadikan untuak bakumpua jo batamu satiok hari raba’a atau rabu kato rang kini. Di tampek itulah pulo dibuek pasa inggo banamo Pakan Raba’a.

Sabuah lai tampek nan ado di Panyalaian nangko, iyolah daerah nan ado ayia pincurannyo labiah tinggi dari dataran nan lain, mako banamo lah daerah tu kini manjadi Pincuran Tinggi. Ado pulo daerah Bintungan, mako banamo nyo bintungan dek sabab jo karano di daerah itu dulunyo banyak tumbuah batang Bintungan.

Di Zaman Ulando dulu, daerah panyalaian iko juo digunukan untuak manjadi kubu atau benteng pertahanan dari sarangan Ulando dulu. Tampek pertahanan atau kubu nan latak e di ateh banamo lah daerah itu kini jo namo Kubu di Ateh. Limbak nan dari pado itu ado pulo kubu ambacang jo Gantiang Kubu Ambacang iko di tahun limo puluhan manjadi bentenang nan lain salain Kubu di ateh, dek banamo Kubu Ambacang karano banyak batang ambacang tumbuah di situ. Ado pulo ambacang nan tumbuah dakek tanah nan gantiang mako banamo lah Gantiang Kubu Ambacang.

Inpormasi iko lah ditarimo dan didanga dek Mak Datuak Tumaratan dari kisah jo curito urang nan tuo-tuo daulunyo. Labiah lanjuik liau bakisah baso di Panylaian iko ado limo sukunyo. Apo bana suku nan limo iyolah suku Panyalaian, Suku Koto, Suku Sikumbang, Suku Jambak jo Suku Pisang. Baitulah kisah jo carito tantang asa jo usua manga nagari banamo Panyalaian.  

*Dosen Sastra Minangkabau Universitas Andalas