PANINJAUAN

PANINJAUAN

di Luhak Tanah Data

Oleh: Bahren*

Jo bismillah kato dibukak, dibukak untuak mulia bakisah jo bacurito. Apo bana nan ka manjai curito kali nagko, iyolah curito tantang asa jo usua manga nagari banamo cando iko. Apo bana nagari nan ka diurai curito asa jo usuanyo, iyolah nagari panyalaian dalam Luhak Tanah Data. Bakisahlah maso itu ditaggal tujuah baleh Bulan Mei tahu duo ribu tujuah tapek maso itu. Sia bana nan mambari kisah, iyolha liau Datuak Batuah Nan Sati. Limo puluah satu umua liau maso itu, kutiko manyurah jo bacurito ka Ivan Adilla dan rombongan nan datang dari Padang. Ba’a bana kisah jo curito simakkan bana malah elok-elok dangakan molah baiak-baiak.

Adolah pado maso dahulunyoa, Pariangan manjadi tampek asa mulonyo bakambangnyo urang awak Minangkabau ko. Abih hari baganti minggu, minggu bajalan bulan pun datang. Bulan ilang tahun baganti urang nan batambah rami juo. Inggo pado suatu hari, barangkeklah niniak moyang kito dari pariangan sabanyak duo puluah duo urang, barangkek manjadi duo kalompok atau galombang kato rang kini. Sabaleh urang barangkek di galombang partamo nan mamisah pulo manjadi 2 kalompok lain ciek kalompok limo niniak nyo nan ciek lai anam niniak nyo.

Indak doh lamo sudah itu, barangkek lah sagalombang lai, sabaleh urang pulo banyaknyo niniak maso itu. Namun samantang pun baitu, nan galombang kaduo ko tabagi pulo manjadi duo kalompok, anam urang nan jolong barangkek manatap jo badiam di sabuah daerah nan tinggi. Dari katinggian tadi niniak kami nan baranam ko bisa mancaliak atau maninjau daerha di sakuliliangnyo. Dek lamo-bakalamoan mako daerah itu kito dibari namolah Paninjauan, aratinyo daerah tampek maninjaua sakliliang.

Ado pulo daerah nan lataknyo di bagian kapalo atau agak arah ka ateh mako dibarilah namo tampek nantun manjadi Kapalo Koto. Di kapalo iko juo daulunyo dibueklah sabuah balai partamuan, kamudian Kapalo koto ko barubah manjadi Balai Satu. Balai nan satu aratinyo. Ado pulo sabuah lai, daerah nan lataknyo di ilia balai mako dibarilah nami daerah nantun jo namo Ilia Balai. Ado pulo daerah nan banamo tigo suku, mako banamo tido suku karano daerah itu memang diuni dek urang nan tigo suku. Apo suku nan mauni daerah tadi iyolah suku Koto, Suku Sikumbang jo Suku Pisang. Sabuah lai nan indak ambo lupo bitu bana kato Mak Datuak Batuah, daerah nan banamo Tabu Baraia, dek karano daerah itu, daulu banyak ditumbuahi dek batang tabu nan banyak aianyo mako banamo lah daerah itu jo Tabu Baraia.

Itulah kisah nan diuria dek baliau Mak Datuak Batuah nan Sati, curito iko liau tarimo sarato liau danga dari niniak sarato mamak langkok jo urang tuo-tuo nan daulu. Salain basuku koto, jo Sikumbang sarato suku Pisang, kami urang paninjauan ado juo basuku Panyalai. Jikok nyo ado nan bana tantang kisah ko tantu kabanaran datangnyo dari Tuhan, Allah ta’ala kayo sungguah tampek sagalo ilimu bahimpunnyo, Jikok nyo ado kaba nan salah, salah nan datang dari kito, kito nan hanyo manusia tampek bakumpua gawa jo salah. Kapado Tuhan Ampun di pintak, ka dunsanak pambaco maaf dipinto. Maklum lah sanak tantang itu.     

*Dosen Sastra Minangkabau Universitas Andalas