HOME LANGKAN TINGKOK

  • Senin, 18 November 2019
Pandai Sikek
TINGKOK

Pandai Sikek

Di Luhak Tanah Data

Oleh: Bahren*

 

Rancak Tanun nyo Pandai Sikek

Basulam bungo Koto Gadang

Di ulang sado nan dapek

Untuang kok bisa jadi panarang

 

Koto Tinggi di Pandai Sikek

Pagu-Pagu baitu pulo

Baruah jo Tanjuang masuak di dalam

Untuang kok bisa jadi ubek

Ka Ubek bia nak nyo lupo

Bia sajarah tak tanggalam

 

Bakisah malah Pak Mas Dt. Rajo Mangkuto, bakisah liua ka Zuriati, tanggal tujuah baleh maso itu di bulan Mei tahun duo ribu tujuah. Apokoh bana nan dikisahkan dek baliau Mak Datuak Rajo Mangkuto, Ketua LKAAM X Koto. Anam puluah sambilan umua liau maso itu, kutiko bakisah ka rombongan kami nan datang dari Padang.

Adopun kisah nan liau sampaikan, kahadapan kami sadonyo iyolah kisah tantang nagari ko, manga banamo Pandai Sikek. Dangakan malah elok-elok, simakkan molah baiak-baiak biko malah curitonyo. Adolah pado maso daulu rombongan niniak moyang kami dari daerah nangko sampai lah inyo disabuah tampek. Lamo lambek di tampek nantun, mambuka lahan jo parumahan tampaik tingga lah niniak kami di daerah tu kini. Awa mulo niniak kami nan datang kamari, iyolah urang nan dari ampek suku di Pariangan Tanah data. Surang di antaro niniak kami ko, iyolah urang cadiak nan tau pandai tampek ka batanyo-tanyo dek niniak nan lain tantang sagalo ilimu. Apokoh ilimu dunia sarato limu batin. Ka liua datang mahadok nan lain maso itu.

Satiok ado urang nan batanyo katiku urang nak pai ka liau urang pandai tu, niniak kami salalu sajo manjawek ‘Ka Si Kek nan Padai’ itulah jaweh nan di dapek sarato di dangan. Mako Sajak dari maso itu, inggo sakarang kini nangko banamolah daerah ko jo Pandai Sikek nan asa nyo dari Si Kek nan Pandai.

Habih ari baganti minggu, Minggu lalu bulan batuka. Urang nan samakin rami juo, inggo manjadi ampek jorong lah pandai Sikek ko. Pamukiman jo paladangan nan latak nyo di daerah nan agak katinggian dibarilah banamo Koto Tinggi. Ado pulo sabuah lai daerah nan masayarakiknyo biaso mambuek pagu di ateh rmahnyo untuak ka malatakkan kayu baka mako inggo kini nangko daerah nantun banamo Pagu-Pagu.

Sabuah lai daerah nan ado di siko, di Pandai Sikek nangko adolah daerah nan lataknyo arah ka ilia, kabawah tu sambia manuntuak arah ka bawah. Mak Datuak Rajo Mangkuto mangatokan kapado kami daerah tu banamo Baruah, dek latak nyo di bawah atau di baruah baso rang di siko. Samantaro itu kini, ado sabuah daerah nan dikaliliangi dek sungai-sungai inggo barupo sabuah tanjuang, mako urang kami di siko manyabuik daerah itu kini jo namo Tanjuang.  Bitu malah kisah curito nan bisa ambo sampaikan, kato liau Mak Datuak Rajo Mangkuto, curito nan ambo sampaikan kini ko alah ambo dapek sarato dangan dari niniak-niak nan daulu sarato rang tuo-tuo di siko. Aratinyo bana niniak kami di siko sabagian ado nan barasa dari Pariangan sabigian lai barasal dari Agam. Kalau suku kami rang pandai Sikek, ado nan basuku Koto, Ba suku Pisang jo Sikumbang, Suku Guci Jo Suku Jambak sarato suku Pinyalai. Daerah ko terkenal jo hasil tanun nyo yang urang banyak mabyabuik jo tanun Pandai Sikek.

 

* Dosen Sastra Minangkabau Unand

  

 


Wartawan : Bahren
Editor : bahren

Tag :#Langkan #Tingkok #Asa #Usua #Nagari #Minangkabau