PADUSI LAWAH-LAWAH

PADUSI LAWAH-LAWAH (LABA-LABA)

Oleh: Bahren*

          Sasudah mandanga surah Mak Katik tantang padusi bungo cangkeh patang kalamari, raso tagamih-gamih dek ajo Sutan surah Mak Katik nantun. Makonyo, kutiko basuo di lapau Uniang pagi ko, Ajo sutan kumbali batanyo ka baliau Mak katik tantang jinih pausi nan lain manuruik adaik Minangkabau. Mancaliak Ajo Sutan sadang sumngaik, tabudua pulo sumangek Mak Katik untuak kumbali manyurah jinih padusi nan lain. Di wakatu iko kini kan ambo cubo urai tantang Padusi nan cilako, banamo padusi lawah-lawah (laba-laba). Baa bana jinih padusi nan cando iko, simakkan bana elok-elok dangakan molah baiak-baik. Adupun nan tasabuik padusi lawah-laha tu biko mamangan adaik mambari umpamo:

Kalau padusi lawah-lawah

Bantuak sarupo elok bana

Bak cando urang patuah laku

Kalua rumah nyo pantangan

Kalua rumah bakutiko

Tapi ati busuak itikaik salah

Nyo tahan jarek di pintu

Kok ado nan sasek inggok

Nyo isok darah sampai kariang

Itu padusi nan cilako

Aratinyo bana, kalau kito tenok ciek-ciek, kito silau bantuak jo ruponyo iyo lah sarupo elok bana. Kok tigkah sarato laku lawah-lawah ko sangaiklah batanang kato rang kini. Garak sarato gariknyo sangaiklah lambek bahkan ampai indak parnah pindah dari tampek samulo. Di ibaraikkan jo kato keih kalua rumah nyo pantangan, kalua rumah bakutiko. Bilo tu kutikonyo. Inyo kalua kutiko jarek nan dibuek nyo di sakaliang rumahnyo manggatuih atau ado nan inggok. Mako di situlah tampak jahaik sarato sipaik aslinyo, Si Padusi lawah-lawah tadi.

Kok rangik na inggok rangik mati, kok bilalang nan taparangkok bilalang nan indak dapek tabang lai. Singkek kato kok lah masuak dalam parangkok atau jareknyo padusi lawah-lawah ko sado nan ado abih tantangannyo. Manyalo lah Ajo Sutan maso itu, apokoh ado padusi nan mode tu kini ko Mak Katik?. Tantu sajo ado, indak mungkin doh adaik kito mambari kieh kok tak ado tajadi dalam tatanan adaik jo budaya awak. Tapi samantang pun baitu. kok limu lawah-lawah ko di pakai untuak badagang lain pulo mukasuik jo tujuannyo. Kalau nan parakaro ilimu lawah-lawah untuak badagang ko di wakatu jo kutiko nan lain lah kito surah pulo. Nan kini ko kito salasaikan sajo dulu masalah jinih padusi nan basipaik lawah-lawah ko. Mudah-mudaan anak gadih sarato kamanakan padusi kito kasadonyo indak tamasuak ka jinih padusi nan bak kian. Kok nyampanglah ado diantaro anak kamanakan kito, andak lah kito bari tunjuak jo pangajaran inyo sajak kini ko.

Bitu malah nan dapek Mamak sampaikan, mudah-mudahan ado mampaatnyo sarato manjadi pangatahuan lah dek kito nan ado di jaman kini ko lah andaknyo. Baa dek baitu Mamak sampaikan, karano kalau indak dari kini kito mulai manunjuak ajari anak kamanakan kito, alamaik ka abih adaik kito ko. Bak cando mamangan adaik cupak diganti urang panggaleh, jalan di aliah urang lalu. Apo kajdi adaik kito. Samantarao kito bakoar-koar sajo soal pendidikan karakter nan asanyo dari adaik jo budaya lokal. Mungkin jo cari iko kito bisa manyurah ciek-ciek tantang kayonyo adaik jo budaya kito dalam mamandang dan mancaliak sagalo sasuatunyo.

*Dosen Sastra Minangkabau Universitas Andalas