HOME LANGKAN CARITO

  • Jumat, 3 Januari 2020
PADUSI BUNGO CANGKEH
Carito

Padusi Bungo Cangkeh

Oleh: Bahren*

            Lapau Uniang biasonyo manjadi tampaik Ajo Sutan jo Mak Katik magopi satiok pagi. Di Lapau tu banyak saketek dibicarokan juo babarapo surah tantang adaik jo kabiasaan nan ado di alam Minangkabau ko dek Mak Katik ka Ajo Sutan. Pagi ko bacuritolah Ajo Sutan tantang kagalisahan sarato katakutannyo mancaliak tingkah jo kurenah anak-anak mudo Minang kini. Talabih bana katakutan untuak anak kito nan gadih-gadih. Mandanga katakutan sarato kagalisahan ajo Sutan tadi mako taniaik lah dek Mak Katik manyurah tantang macam jo jinih padusi di dalam adaik Minangkabau.

            Dek pintak lai kabuliah kandak lai kabalaku, bagabeh sajo Ajo Sutan, mamintak Mak Katik untuak manyurah parakaro nantun. Kini ba’a nyo Mak?, Kato Ajo Sutan, ado bara jinih atau bara macam padusi dalam pandangan adaik jo budaya kito Minangkabau. Bagulambek Mak katik manjawek, dari surah nan ambo danga sarato curito guru-guru ambo nan daulu mako dapeklah ambo manyimpulkan satidaknyo sacaro garih gadangnyo parampuan atau padusi di Minangkabau ko ado ampek jinih nyo. Apo tu jinih nan ampek, Nan partamo padusi Bungo Cangkeh, Kaduo Padusi Lawah-lawah (laba-laba), Katigo Padusi Alang-Alang (layangan), Kaampek Padusi Bungo Mawa.

            Bari tarang Ambo dek mamak, tantang padusi-padusi nantun, bia nak manjadi palajaran pulo dek kami nan mudo matah ko Mak, dan manjadi amal dek Mamak, sainggo bisa pulo Ambo manyampaikannyo ka nan lian untuak kapadoman. Jo saba ambo tunggu surah dari Mamak. Jadih, Insya Allah kan Mamak surahkan, Dangakan molah elok-elok, simakkan bana baiak-baik

 

BANAMO PADUSI BUNGO CANGKEH

 

Kutiko tampuak lai bagatah

Samaso badaun rimbun

Rimbun bak bungo kacubuang

Rampak bak bungo kalikih

Babungo di ujuang rantiang

Di tanai daun nan banyak

Jikok iradaik mahandaki

Kok kucuik bugo nan kambang

Tampak taguah kok nyo layua

Lareh digoyang angin

Gadang ketek sato mancari

Tuo jo mudo mangampuangan

Kok tajajak kapakan rami

Bagaluik kilo jo timbangan

Awak ketek harago maha

Bamintak makonyo dapek

Batanyo an makonyo ado

Itu nan patuik upiak pakai

Banamoan padusi bapusako

Walau tatungkuik tagulampai

Indak karusak rumah tango

 

            Dari surah nan Mamak sampaikan cako, mako dapek lah ambo ambiak samacam kasimpualan samantaro baso padusi bungo cangkeh ko lah jinih padusi nan paliang baiak dalam pandangan adaik kito di Minangkabau. Limbak nan dari pado itu, jinih padusi bungo cangkeh ko pulo lah nan manjadi samacam panduan lah andaknyo dek anak-anak kito nan padusi. Jikok nak manjadi padusi nan bamartabat sarato banilai tinggi mako jadilah padusi nan bak cando bungo cangkeh. Bamintak makonyo dapek, batanyoan makonyo ado, Indak asa kadisorongkan sajo asa dapek atau indak paralu ditanyo langsuang ado, kan baitu mukasuik nyo Mak.

            Bana, bana nan Ajo Sutan katokan tadi, jikoklah satiok padusi di Minangkabau ko mamposisikan dirinyo bak bunyo cangkeh, mako bisa kito pastikan indah doh ado lai nan mamintak-mintak di tapi jalan, indak doh lai ado anak-anak nan putuih sikola, karano amak sarato mandehnyo padusi bapusako. Tu baa ajak nyo jo jinih padusi nan lain Mak, bilo ka Mamak surahkan ka ambo kikiro?. Jikok itu nan Ajo Sutan mintak, Insya Allah sasudahko ambo surah baliak, ciek-ciek dulu tan, ambo takuik kok banyak sakali curah indak ado nan lakek sarato tingga, pahamlah Sutan tantang itu. Jo saba ambo tunggu Mak.

 

* Dosen Sastra Minangkabau Universitas Andalas


Wartawan : Bahren
Editor : bahren

Tag :# Langkan # curito #minang