New Normal Tibo

New Normal Tibo

Baa lai. Rirayo pun tapaso di rumah. Sajak iduang di tampuang angok, baru kini sumbayang rayo di rumah sorang-sorang.

Baru kini dak tajalang dunsanak. Untuang ado teknologi, sahinggo bisa basalamek rayo sacaro online. Lah ba rirayo virtual kito jadinyo.

Kue jo baju rayo pun dak mandasak bana. Lah pas pulo nah; katiko pitih masuak bakurang dek corona, dak bakue pun dak tampak. Dak babaju rayo pun dak masalah. 

Kini corona alun kunjuang pugek. Mulai manurun, tapi kadang-kadang malonjak pulo. Samantaro PSBB batambuah ciek lai. PSBB jilid 3, sampai 7 Juni.

Dari duo PSBB, baa caritoe? Hasilnyo, limoratuih labieh kanai corona. Banyak nan cegak dari nan pai. Ado nan masih bakuruang, isolasi. Banyak pulo nan dirawat di rumah sakik.

Kok dibandiang jo resiko, patuik kito batarimo kasi ka pamarentah. Upayo gubernur untuak mandapek an izin tes swab di Unand jo di Baso sungguah brilian. Sumbar pun rekor mamareso swab. Paliang banyak di Indonesia.

Sahinggo kok banyak nan positif, itu karano awak banyak mamareso. Pamarentah taruih mancari. Tracing. Tracking. Rapid tes. Tes swab. 

Koordinasi gubernur jo bupati/walikota cukuik padu. Tabagi padok surang-surang. Bantuan-bantuan pitih kontan pun dipasamoan. Ado nan dari pitih negara, pitih provinsi dan pitih kabupaten/kota. 

Baitu pulo urang rumah sakik, sabana tagok mamaga pasien. Urang labor nan bakarajo 22 jam, nan batanggang basitungkin, patuik kito apresiasi. 

Parang malawan corona memang alun sudah. Tapi, kapatang, Kamih (28/5), lah mulai manurun data tu. Dari 392 nan dipareso swab di Sumbar, ampek nan positif. Alhamdulillah. Mudah-mudahan turun taruih. Dan habih. 

Baa ka idak? Lah labieh saratuih hari, corona sarupo limbubu mahoyak Ranah Minang. Mahoyak Indonesia. Mahoyak dunia. Banyak nan kalimpasiangan karano acok di rumah pado bakureh. 

Urang kantue banyak di rumah pado karajo. Pai ka kantue baganti hari. Dibagi karajo, tapi bulieh di rumah manyalasaian. Bakarajo dari rumah. Kumandan maatur dari jauah. 

Ruponyo dak ado tabatiak tabarito kinerja manurun karano karajo dari rumah. Rapek-rapek bisa virtual. Tandotangan bisa digital. Elektronik office istilahnyo.

Rupoe, negara lai jalan juo. Daerah jalan juo. Nagari baitu pulo, bajalan jo caro baru. Iduik jalan taruih. 

Bahkan, listrik kantue jadi hemat. Para pegawai dak ba ongkos. Dak paralu babaju saragam tiok hari. Dak paralu ma engkol onda atau maambek angkot tiok pagi. Karajo di rumah sajo. Jalan pun langang. Polusi bakurang. Sarok bakurang. 

Anak sikola baraja dari rumah. Guru-guru maaja dari rumah. Nan kuliah jalan taruih pakai hape atau laptop. Kuliah online namoe. 

Urang gaek tiok hari basuo jo anak. Siang caliek-caliek i, malam danga-dangakan. Kok sasek bisa lansuang disapo. Salah latak lansuang dianjak. 

Nio galak-galak samo gadang, ado grup WA. Ado zoom. Lapeh juo urek muncuang dek galak takakah jo kawan-kawan. Bagawua online molah kito.

Corona pun maubah budaya. Amuah tak amuah, tapaso ikuik. Lamo jo lambek, kito pun mulai tabiaso. 

Namun nan manyakik pakaro bakureh. Kok petani, mungkin dak tapangaruah dek corona. Nelayan baitu pulo. Karano di parak lai sorang jo baduo-batigo nyoh. Di lawik jo di danau baitu pulo. Lai dak bagadincik bakarumun doh. 

Tapi baa nan urang manggaleh? Baa nan sopir oto? Urang tu bakarajo di nan rami. Kok tak ba urang di pasa, dari maa jua bali ka ado? Kok tak turun urang dari rumah, mano ado sewa ka dibao?

Dek nanang saribu aka, ado juo nan maalieh pa adok bajojo online. Kolak dalimo jo bubue candeh pun dijua sacaro online. Manggaleh baju jo sarawa dak paralu duduak batanggang di kadai. Cukuik pacik hape, urang mambali tibo.

Tabukak pulo rasaki tukang ojek. Maanta galeh sabalik kampuang. Oto maangkuik urang bisa diubah jadi paangkuik barang. 

Kini, kito pun lah tabiaso tiok kalua pakai masker. Mailak dari karumun. Jago jarak aman. Acok-acok basuah tangan pakai sabun. 

Kini tibo-tibo, dak taraso, kito lah iduik jo caro baru. Budaya baru. Itu lah new normal. Tingga manaruihan sajo. Pakai PSBB atau idak, new normal ka jaweknyo. New normal tibo.

(Taufik Effendi, Pemimpin Redaksi Minangsatu, Wartawan Utama)