HOME OPINI CELOTEH

  • Jumat, 22 Mei 2020

New Normal Life, Tasarah...

Celoteh
Celoteh

New Normal Life, Tasarah...

 

Di Indonesia lah labieh 19 ribu kanai corona. Labieh saribuduoratuih urang maningga, ampek ribu labieh cegak. Tapi nan perkembangan corona ko dak kunjuang rado. Dak amuah flat datanyo. Maloncek-loncek. Fluktuatif.

Baitu pulo di Sumbar. Lah hampie 450 urang nan kanai pantak dek tabuhan nan banamo Covid-19 ko. Lah duo jilid PSBB--kini masuak maso tambah wakatu--lum juo ado tando-tando ka pugek bala tu.

Ado kaba, gak sataun lai lum tantu Covid-19 ko ka punah. Samantaro nan ureh lum juo basuo. Paliang capek sataun lai baru ado vaksin Covid-19. Apolai ubek, dak ka talok jo cikumpai-cikarau doh. 

Mangko kalua lah kecek Presiden Jokowi; badamai jo Covid-19. Ehhh, damai baa? Kok damai tantu samo-samo anok, gencatan sanjato. Tapi inyo taruih juo ma ampai kito sabalik! Kecek bakeh Wapres, JK, tu bukan damai namonyo, tapi iduik basamo jo Covid-19.

Tingga sapakan lai, status darurat bencana pun habih. Tanggal 29 Mei batehnyo. Lai baa hasilnyo? PSBB bagai, lai baa hasilnyo? Lah baraa nan dites? Baraa persen dari populasi? Taragak pulo kito mandanga kaba jaleh dari nan piawai. Supayo dak baputieh mato sarupo mancaliek alang-alang. Supayo bakajalehan! Supayo dak suudzon.

Supayo kito mangarati, baa kok kapatabang mulai dipalapeh? Baa kok paralu relaksasi? Dan tibo-tibo ado konser amal sacaro virtual. Sahinggo lahie lah lagu rap, judulnyo Terserah, dari The Rap Up. Tasarah lah heh!!! Iko gejala pesimistis nan mulai masif. Hati-hati, nan di bawah kok maimpok. Rancak ma lantai sabalun luluih.

Kini, sapakan manjalang habih maso darurat, nan corona bak kato corona, nan urang batandiang alang-alang juo! Pasa makin rami, urang baburu baju rayo. Duo hari lai, ba rirayo kito. 

Tapi, anehnyo, larangan bajamaah di musajik lai banyak nan patuah. Kito sumbayang di rumah surang-surang dak? Hehehe.

Kini, banyak nan lah mulai pasai tingga di rumah. Baa idak ka pasai, sudahlah pangana tasungkuik atok, saku-saku lah mulai tipih malayang. Biasonyo lai bakucindan jo bagurau, kini takunci dalam angan.

Sungguah pun baitu, Alhamdulillah, kok BLT dan BST lai lancar jaya, sahinggo bagadincik urang di Kantue Pos. Lai tabantu urang banyak. Lapeh juo bali pabukoan. Salamek juo makan parak siang. 

Tapi baa corona? Baa iduik bakawan jo corona? Supayo bisa iduik aman jo Covid-19 nan taruih se basilanteh angan ko, mako caro iduik kito paralu diubah. Disasuaikan jo protokol kesehatan Covid-19. Iduik jo caro baru. Iduik normal jo caro baru. New normal life.

Iko bukan pakaro sakali aie gadang sakali tapian barubah. Iko idak pulo tagak kampuang paga kampuang. Iko agak dakek jo pakaro takuik di ujuang badie, lari ka pangka badie. 

Lah jaleh, lah basuluah matoari, iyo anok pageh kito dek Covid-19 ko. Kok lai baiek ta rupo, lai ka dipugeh jo langkah ampek, sabanyak ilemu nan ado. Tapi iko tak nampak paja tu, makonyo lari ka pangka badie. Ba elok-elok kito jo bala! Caronyo, kito pelok caro iduik, jo caro baru. 

Ado babarapo caro baru nan dak dapek tidak, harus dikarajoan. Partamo, jaan basalam, tapi manyambah. Daulu caro maharagoi urang bukan basalam. Tiok basobok idak basalam, namun manyambah. Sarupo nan ta suo dalam pasambahan dan pikolahan, caro basalam adolah di angkek jari nan sapuluah, ditakua kan kapalo nan satu. Antah sajak pa bilo basalam-salam ko jadi biaso? Kini, biasokan basalam jo caro manyambah.

Nan kaduo, ilak an pakarumunan. Social distancing. Baruntuang kito, corona ko tibo di zaman teknologi informasi nan bisa mampatamuan urang sacaro virtual. Bia di dunia maya (dalam jaringan/daring) kito basuo. Basobok dalam videocall sajo lah juo nah. Pitih pun bisa pindah sacaro daring. Jua bali daring. Sakola daring. 

Antah ko lah, sumbayang rayo lai bisa sacaro daring? Kok dak bisa, bajamaah rirayo di rumah sajo. 

Nan katigo, jago jarak. Physical distancing. Sameter paliang kurang. Jan bagadincik baradu bahu. Dak paralu cipika cipiki jo tapuak-tapuak pungguang. 

Nan ka ampek, taruih pakai masker. Salain bamanfaat sacaro kesehatan, masker bisa ka ganti cadar, pambateh mato karanjang, paambek kurenah mantiko bungo. 

Nan ka limo, acok-acok basuah tangan jo sabun. Biasokan iduik barasieh, marjulih. Barasieh pangka sehat.

Nan ka anam, jan lupo, duo hari lai rirayo. Bamaaf-maafan kito. Kok ado salah jo gawa, jo batin sambah mohon rila jo maaf. Taqabalallahu minna waminkum. Salamek rirayo.

(Taufik Effendi, Pemimpin Redaksi Minangsatu, Wartawan Utama)


Tag :#newNormalLife #tasarah #terserah #covid19

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com