Nagari Jaho

Nagari Jao

di Luhak Tanah Data

Oleh   Bahren*

Tasabuik curito nagari jaho

Curito nyo ado duo jinih nyo

Apokoh malah isi kabanyo

Simakkan bana ambo bacurito

Tasabauik malah nagari jaho, iyo di luak Tanah Data. Bakisah molah Yuzar Arma Sutan Marajo ka baliau Zuriati. Limo puluah anam umua liau wakatu itu, kutiko bakaba ka Zuriati. Apo ko curito nan dikabakan dek baliau angku walinagari Yuzar Arman Sutan Marajo di Ambacang Gadang kutiko itu dalam tarih 12 Mei ditahun 2007.

Simak kan bana malah elok-elok dangakan molah baiak-baik dek pambaco sakalian. Manga nagari banamo Jaho ado nan duo macam curitonyo nan paliang diyakini dek rang sakampuang. Curito partamo manuruik angku Yuzar adolah pado maso dulunyo limo dari sabaleh urang niniak nan barangkek dari Paringan Padang Panjang di galombang kaduo kabarangkatan. Sampailah niniak kito tadi di tampaik nan sangaik jauah bana lataknyo dari daerah lain nan ditampati dek niniak kami sabalaun iko, utamonyo dari pariangan.

Dek lataknyo talalu jauh mako disabuik lah tampek kami ko jo Jao nan aratinyo bana samo jo jauah. Bitu kisah nan partamo do dapek-i dek baliau Yuzar Arma Sutan Marajo. Curito ko di dapek baliau dari niniak jo mamak nan lah tadahulu.

Limbak nan dari pado itu, ado sabuah kisah lain tantang nagari kami nangko. Ado pulo nan bacurito mako banamo nagari jao dek  barasa dari kato jahe atau sipadeh kato rang kampuang kami. Namun curito ko indak do kami picayo karano kami nan tau sipadeh bukannyo jahe. Bitu kato Arma wakatu itu.

Dek lamo lambek banagari, nagari nan batambah gadang juo urang nyo batambah rami pulo. Jaho nan talatak sabalah ka ilia disabuik jo jaho ilia. Jorong nan talatak sabalah ka mudiak disabuik jo jaho mudiak.

Ado pulo sabuah lai curito nan bakambang tantang nagari kami ko, bitu bana Yuzar Arma bakato. Mako nagari banamo jah karano  di sakitaran kampuang kami ko banyak lah tumbuah batang jaho. Mako banamo lah nagari ko Joa. Curito ko salalu sajo dicuritokan dari niniak kami dahulu supayo kami nan mudo-mudo indak do lupo jo asa usua. Limbak nan dari pado itu, sampai kini nagari kami masih jo banyak tumbuah batang jao ko.

Salain nan dari pado itu, ado juo kampuang nan lain salain jao iliak jo jao mudiak, apo ko lah kampuang nan ado tasabuik kampuang Ambacang Gadang dek karano di kaapuang nantun tumbuah lah sabatang pokok ambacang nan gadang nyo alang kapalang, mako banamo lah ambacang gadang inggo kini. Ado sabuah kampuang lai nan banamo Bungo Tanjuang,  mako banamo Bungo Tanjuang dek sabab jo karano di kampuang tu banyak tumbuah si Bungo Tanjuang. Iyo bana bak kato urang tuo-tuo daulu niniak kito ko manjadikan alam takambang manjadi guru. Dek ulah baguru kapado alam mako namo-namo tampaik jo kampuang baitu pulo, mancaliak nan sudah dari alam.

Baraliah saketek curito ka suku asa niniak kami, ungku Yuzar Arma sutan Marajo manjalehkan ka baliau Zuriati baso di nagari joho ko ado limo suku nyo. Ado nan basuku Guci, Ado pulo suku Koto, Ado nan basuku Sikumbang, Suku Pisang jo Panyalaian.

Itulah kaba nan dikabakan dek Angku Yuzar Arma Sutan Marajo, jiko nyo ado nan bana tantang itu, kabanaran iyolah datang dari Tuhan. Allah taala kayo sungguah tampek sagali ilimu bahimpunnyo. Jiko ado salah jo gawa. Salah nan datang dari ambo. Ambo nan hanyo manusia, tampek salah jo gawa bakumpua. Kapado tuhan Ambo minta ampun, ka pambaco maaf di pintak.    

*Dosen Sastra Minang FIB Unand