MAINGEK BALIAK KA CARITO ANAK MINANGKABAU (Bagian 2)

  MAINGEK BALIAK KA CARITO ANAK MINANGKABAU

(Bagian 2)

Oleh: Dr. Dra. Satya Gayatri, M.Hum

Artikel nan di hadapan sanak saudaro kini iko marupokan sambungan dari artikel minggu patang. Sasuai jo tujuan artikel iko untuak manjapuik baliak carito nan ado di masyarakat dengan kondisinyo antaro hiduk jo mati. Kalau pun ado nan ingek jo jalan carito, tapi panutur sarato nan mandangakan jumlahnyo saketek, mungkin hanyo bisa ditunjuak jo jari. Itu lah kondisi carito anak di daerah awak kini. Di sampiang itu, tujuan lain dari penulisan artikel iko supayo carito nan ditamui di berbagai daerah bisa disampaikan pulo ka anak-anak di lingkungan awak, tarutamo di rumah tanggo atau di sakolah-sakolah. Melalui caro iko otomatis interaksi antato anak jo lingkungan tabina sahinggo anak-anak awak indak mancandu mamainkan gadget lai. 

Carito nan ka dimuek kini ko carito dari daerah Lubuak Sikapiang. Kok dicaliak dari pasan caritonyo samo juo jo carito nan disampaikan di artikel yang minggu lalu. Walaupun, ado bermacam-macam perbedaannyo, namun inti dari carito itu samo-samo bapasan supayo basikap santun ka ibu. Sikap nan indak santun membuek hiduik surang anak indak salamaik dunia jo akhirat. Manuruik informan carito iko disabuik Carito Tobek si Ombie. Carito iko mangisahkan surang anak laki-laki nan banamo si Ombie. Si Ombie iko pai marantau ka Medan untuak bausaho. Sabalum si Ombie pai ka Medan hanyo tingga jo amaknyo dek bapak alah maningga. Dek susah hiduik mako si Ombie minta izin ka urang gaeknyo untuak pai jo bausaho di rantau urang. Awalnyo, indak diagiah izin dek ibunyo, tapi dek hati kareh juo mako jo barek hati direstuilah si Ombie pai ka Medan. Inyo iyo bana sungguah-sungguah maubah nasib sahinggo usahonyo di rantau tarujud.

Dek lah lamo di rantau mako si Ombie taragak pulang ka kampuang halamannyo. Tapi tibo di kampuang inyo ndak namuah mangaku-i ibunyo sampai tajadi pasalisiah-an. Untuak mayakinkan anaknyo mako dikaluakan aia susu dek amaknyo. Padohal waktu itu, amak iko alah tua ndak mungkin ado aia susu lai. Tapi dek kuaso Tuhan, aia susunyo kalua sangaiak banyak, sampai taganang kampuang itu dek aia susu.

Carito iko masih dalam bantuak lisan, kudian ditulih sasuai dialek nan digunokan. Di bawah iko caritonyo.

CARITO TOBEK SI OMBIE

Nyo kan carito e si Ombie ko durako ka ibu e. Nyo dari ketek jo ibue ndak do jo ayahe keceknyo do. Jadi ibue yang manggadangannyo. Tingga di ateh bukik Koto Aua.

Jadi tulah dek payah di kampuang pai marantau ka Medan.

Jadi marantau ka Medan.

Lamo-lamonyo lah kayo gadang, kecek urang. Waktu nyo pai tu amak e ko rancak. Masih mudo.

Jadi pas inyo lah kayo rayo, pulangnyo.

Yang induak ko tulah gaek, lah lisuik. Jadi ndak namuah ngakui tu amak e lai. Batangka-batangka juo.

 Akhirnyo, mangecek jo amak e tu.

Kecek amak ko, “Kalau ndak juo ang picayo iko amak ang aah, aia susu ko yang dulu ang minum,” kecek amaknyo ko. Beko dipacuaannyo aia susu e ko dek amak e ko. Padahal manurik informasi susunyo ko lah lisuik, tapi wakatu itu lansuang baraia kecek e.

Sudah tu lansuang baserak di tanah, tu malebar-malebar jo. Nan si Ombie ko ndak juo makui tu amaknyo doh.

Akhir e tampek tu taban tanah tu ka bawah jadi tobek.

Jadi jarak saminggu kecek e masih ado ayam bakukuak dari bawah tu dari kampuang tu. Ayam ko ayam amak e tu yang luluih ka bawah.

Akhirnyo, tibo lah aia, jadilah tobek gadang situ lai. Nan masyarakat lain e pindah ka daerah Dasun Data, kampuang Alai namonyo.

Jadi tulah dek anak ko durako ndak  ngakui amak e ko.

Tobek si Ombie ko aianyo mailia di tapi jalan ko. Jadi aianyo ko pado hari-hari tatantu putiah aia e. Mangko putiah, putiah bantuak aia susu aianyo ko. Kan kisah e bantuak itu.

Hari Jumaik aiknyo yang putiah bana. Kalau alang hari biaso bantuak kabua sajo, pokoknyo ndak bening do.