HOME LANGKAN PEPATAH


  • Minggu, 6 Oktober 2019
KOK PADI NAN DITANAM INDAK MUNGKIN ILALANG NAN KA TUMBUAH
Pepatah

KOK PADI NAN DITANAM

INDAK MUNGKIN ILALANG NAN KA TUMBUAH

 

Oleh: Rona Almos (Dosen Sastra Minangkabau FIB Unand)

 

Tulisan kini ko masih bahubuangan jo pepatah yang alah tabik babarapo hari nan lalu. Pepatah nan dimasuik iolah pepatah nan masih mangandung teks ilalang. Dari pepatah di ateh dijalehkan dahulu makna pada satiok kato nan ado pado pepatah tu. Di pepatah nan ado di judul tulisan ko ado kato kok. Kok dalam bahaso Minangkabau bararti kalau dalam bahasa Indonesia. Kok marupokan kato panghubung untuak manandoi syaraik.

 Sasudah tu ado kato nan kaduo iolah kato padi. Padi punyo namo ilmiah yaitu ozyra sativa. Padi  adolah tumbuhan yang menghasilkan bareh. Padi tamasuak golongan tumbuahan graminae nan batangnyo tasusun dari babarapo rueh. Pado buku bagian bawah rueh tumbuah daun, palapah nan mambaluik rueh sampai buku bagian ateh. Batang padi ko tumbuah sacaro marumpun. Bijo-bijo pado tanaman padi dibungkuih dek gabah. Daun padi talatak di batang padi. Komponen nan tadapek di bungo padi adolah kapalo sari, tangkai sari, palea (balahan nan gadang), lema (balahan nan ketek), kapalo putiak jo tangkai bungo. Aka tanaman padi bisa dibedakan ateh aka radikula, aka sarabuik, aka rambuik dan aka tajuk. Partumbuhan aka padi sangaik dipangaruahi dek kandungan Nitrogen atau unsur hara balambang (N) dalam tanah tanah. 

Kato barikuiknyo iolah kato ditanam. Ditanam artinyo dimasuakkan dalam tanah.  Sudah tu ado kato ndak. Ndak marupakan partikel untuak manyatokan pangingkaan atau panolakan. Lanjuik ka kato barikuiknyo yaitu kato mungkin. Mungkin artinyo alun tantu atau barangkali.

Sasudah kato mungkin ado kato ilalang. Ilalang punyo pulo namo ilmiah yaitu imperata cilydrica. ilalang adolah tumbuhan liar yang dapat tumbuh di ma sajo. Tumbuhan ko mampunyoi aka rimpang nan manjala. Bantuak aka ilalang manyarupoi tabu nan barono putiah. Tinaman ko adolah tanaman terna rumput-rumputan nan barumua panjang.  Tingginyo bisa mancapai 30 cm sampai 180 cm namun, tumbuhan ko diameter sangaik ketek antaro 2 mm sampai 3,3 mm. Pucuak ilalang marunciang sarupo duri. Ilalang ko batuneh jo basisiak. Rumpun ilalang tumbuah tagak indak bacabang. Pado umumnyo, tubuhan ko babulu di buku-bukunyo (Almos, 26 Sept 2019). Nan tarakhir ado kato tumbuah. Tumbuah adolah iduik dan batambahn gadang. 

Sasudah dijalehan kato demi kato kini kito masuk ka makna dari pepatah tasabuik di ateh. Pado pepatah di ateh ado duo kato tumbuhan yaitu padi jo ilalang. Padi jo ilalang marupokan duo tumbuhan nan mampunyoi bantuak, daun, sirip nan samo. Makna pepatah di ateh iolah apopun nan kito karajoan untuak babuek elok, hasilnyo pasti nan elok juo. Keredaan tuhan nan dicari, niaik baiak urang indak akan mungkin dibelah buruak. Tapi, jan baarok balasan dai urang nan samo. Untuak mandapekan kabaikan tetap akan ado halangan, godaan, ganguan nan akan kito tamui. Sarupo dalam mananam padi. Pado saat kito mananam padi akan ado ilalang jo rumpuik nan tumbuah. Bagitu pulo sabaliaknyo, kok ilallang nan ditanam ndak mungkin padi nan ka tumbuah.

 


Wartawan : Rona Almos
Editor : bahren

Tag :# Langkan # Pepatah # Minang