Ado Usah Dimakan Tak Ado Baru Dimakan

Ado Usah Dimakan Tak Ado Baru Dimakan

Oleh: Rona Almos*

Katiko ado jan dimakan, lah indak ado baru dimakan

‘Ketika ada jangan dimakan, sudah habis baru dimakan’

            Pandemi covid-19 datang jo sagalo dampak negatifnyo. Sarupo nan awak katahui dampak wabah covid-19 ko sangaik bapangaruah kapado parekonomian masyarakat. Indak dapek dipungkiri datangnyo pandemi covid-19 ko mambuek parekonomian Indonesia indak stabil.  Mulai dari usaho rumahan sampai ka pangusaho gadang. Musibah nan masuk ka Sumatera Barat sajak akhir bulan Maret 2020 mambuek masyarakat ekonomi lamah mamakiak. Bahkan untuk mambayia zakat fitrah majalang rayo mareka jo susah payah mangumpuan pitih.

            Papatah di ateh manjadi bahan ranuangan bagi awak basamo untuak majani iduik dimaso pandemi nan tajadi kini. Apo bana makna yang takandung dalam papatah di ateh barikut dijalehan talabiah daulu makna kato demi kato dari papatah tasabuik.

            Katiko nan dalam bahasa Indonesia aratinyo ketika. Kato tasabuik marupokan kato panghubung untuak manandoi waktu yang basamoan. Salanjuiknyo kato ado, ado manganduang makna mampunyoi. Sasudah tu ado kato jan, kato jan marupokan kato nan manyatokan malarang na bararti indak buliah atau bisa juo diartian handaknyo indak usah.   Lanjuik awak maliek kato dimakan. Dimakan barasa dari kato makan nan mangalami proses morfologi afiksasi prefiks di-. Dimakan pado papatah di ateh baarti dihabiskan.

Kato salanjuiknyo ado kato lah. Lah marupokan batuak singkatan dari kato alah nan baarti sudah. Kato barikuiknyo adolah kato indak. Indak sapadan jo tidak dalah bahasa Indonesia makan merupokan partikel untuak manyatokan pangingkaran, panolakan, panyangkalan. Tarakhir ado kato baru. Kato baru nan sasuai jo papatah di ateh mamiliki makna kamudian atau sasudah itu.

Makna kato demi kato dari papatah di ateh alah dijelehan. Kini awak masuak ka makna papatah tasabuik sacaro kasaluruhan. Apo bana arti dari papatah ko? Ado indak dimakan, lah indak ado baru dimakan ‘Ketika ada jangan dimakan, sudah habis baru dimakan’. Maknanyo iolah wakatu ado pancarian pitih simpanan atau tabuangan jan diganggu atau jan dipagunokan untuak bapoya-poya, supayo bisuak indak mangalami kasusahan surang. Simpanan atau tabuangan, bilo indak ado lai mato pancarian barulah dipagunokan harato simpanan atau tabuangan tadi tu.

Papatah di ateh acok awak danga dari orang tuo untuak manasehati anak-anaknyo. Katiko surang anak alah mulai bapanghasilan mako kaduo orang tuonyo akan taruih mangingekan anaknyo untuak salalu iduik imaik. Dalam kahidupan ekonomi nan sulik sarupo kini kalau awak punyo simpanan atau tabungan tantu utuak biaya kahidupan sahari-hari saketek banyak dapek juo tatolong.

Indak disadari banyak orang nan baperilaku konsumtif, malakukan gaya iduik nan bakalabiahan sahinggo cendrung bagaya iduik boros malabiahi kamampuan finasialnyo. Pitih nan ado abih untuk mamanuahi kainginan balanjo barang nan indak paralu, manikmati makanan jo minuman di kafe nan maha tiok hari. Indak mampunyoi simpanan atau tabungan apo lai investasi untuak persiapan iduik maso isuak. 

Manjalani pola iduik imaik indak sajo malatiah hawo nafsu untuak mambali barang-barang nan mewah tapi ikuik malatiah diri untuak maatur pitih. Perilaku iduik imaik akan manjadikan awak pribadi nan matang dalam bapikia sarato labiah bahati-hati dalam batindak maupun dalam maambiak kaputusan. Pola iduik imaik akan maaja awak untuak labiah bijak dalam maatur sarato mangelola pitih.

 *Dosen Sastra Minangkabau Unand