HOME LANGKAN CARITO


  • Rabu, 4 September 2019
Ciloteh Lapau Mak Pirin
Carito

" Mancor " 

Siang agak redup,  dek awan nan maambek cahayo matohari. Disatu lapau, nampak barampek anak mudo tangguang sadang maota. Antah memang libur atau maleh manolongan ayahnyo manaiak'an pamatang sawah, tapi pemandangan mode itu di lapau- lapau di kampuang ko, alah selalu di palupuak mato.

Anak-anak mudo dikampuang ko banyak nan pamaleh. Malam batanggang, bisuak e lalok tinngi hari, duaduak di lapau maota dan main domino, lupo ka sawah anggan ka parak. Baiak nan tamaik sikola maupun nan tamaik kuliah bagai, lah samo sajo sadonyo. Indak bisa maaplikasian ilmunyo di kampuang. Sarupo siang hari ko, ampek pemuda si Kadun, Kirin, Kiduih dan Polon sadang maota lamak di lapau uniang Silun.

" Lai pai ang malam tadi dun..?" Kecek salah seorang pemuda ka kawan nyo.

" Lai lah, aden ma amuah tingga di ang," jawek pemuda nan banamo kadun.

"Artis nan baju merah tu tujuah kali den sawer mah. Den bao gai ka bawah pentas". lanjuik kadun dengan bangga-e maota ka kawannyo.

" Aden iyo lo nyeh rang, tapi den tuka- tuka artis e",jawek kirin ndak amuah kalah.

Kironyo ampek pemuda tu tandiang maota saabih mancor tadi malam. Mancor istilah anak mudo ko, singkatan mancaliak orgen. Memang di kampuang ko makin marak acara orgen nan artisnyo bisa disawer. Walau lah dibuek bana Perbup (peraturan Bupati) dek apak bupati, namun acara- acara mode itu indak juo namuah ilang. Bisa jadi dek apak Bupati kekurangan anggota satpol PP untuak manindak, setidaknyo manguranginyo.

" Yo lasuah malam tu yeh, aa ugi den ndak pai mah". Sato lo pemuda nan barambuik karitiang manimpali.

"Eee..jauah ugi ang. Orgen e lasuah, artis e ancak- ancak. Lasuah lo. Amuah di bawo ka bawah pentas gai, " jawek pemuda tinggi semampai gagah kulik kuniang.

 " Mangkoe bisuak ko, jan tingga juo lai. Pai jo kami taruih. Beko malam pai jo den, ado orgen di subarang mah,"

"jadih, nantian den siko dih".

"Sipp. Ok, bro..!"

Samantaro anak muda nan barambek tu asyik maota soal orgen, tibo-tibo di pintu lapau mancogok surang laki-laki saparo gaek.

"Assalamualaikum,"

"Waalaikumsalam" jawek pemuda nan barampek.

" Dari ma mamak ko?, mangopi mak," sela Polon.

" Dari sawah. Sudah sumbayang takana kopi. Ma nyo uniang Silun ko? Buek’an kopi badantang tangah hari ko ciek, niang a".

Kiro nan tibo tu Mak Pirin, urang tuo nan disagani di kampuang. Beliau adolah datuak nan arif bijaksana.

" Ko kopinyo mak".

" Mokasi, Niang. Minum kito kamanakan."

"Samo, Mak," Jawek mereka serentak

Mancaliak Mak Pirin, pemuda nan tadi baranti maota, meskipun otanyo sempat tadanga dek mamak nan niniak mamak ko.

" Baa nakan mamak ko, kusuik-kusuik juo bantuak e lai. Baru jago lalok ko..?".

"Hehee,,,iyo mak,” jawek pemuda nan gagah tadi.

"Baa kok baru jago, manga malam tadi?"

"Inyo ko mancor tadi malam, mak," Jawek si karitiang nan banamo Polon.

"Mancor tu apo tu Polon?”

"Mancaliak acara orgen tunggal di kampuang sabalah, mak," Jaleh si Polon.

Katigo kawan e mangijok - mangijok an mato tando isyarat jan dicaritoan lo ka Mak Pirin. Namun Polon ndak tahu, atau purak-purak indak tahu.

"Tadanga di ambo orgen tu artis e bisa di sawer gai yo?” Tanyo Mak Pirin sambil manyarupuik kopi badantangnyo dan mamanggang sabatang rokok cangkeh.

"Iyo, Mak. Kecek paja ko, bisa dibawo kabawah pentas gai, Mak. Sakandak hati wak nyeh,"

"Astaghafirullah.. Sabaitu parah-e?”

"Iyo, Mak."

"Heemmm sadieh ambo mandanga e," keluh Mak Pirin maelo angok.

" Kalau lah mode itu, yo lah parah tu mah. Ka jadi a generasi mode nakan-nakan mamak ko?" uleh MakPirin.

Kaampek pemuda tu tatunduak diam. Cuma Polon nan masih managak’an kapalo-e dek raso lah memojok’an kawannyo.

"Mamak mintak, nakan mamak bapikia labiah positif dan kreatif. Sebagai pemuda generasi penerus, saharuihnyo kalian mamikian ba’a kampuang kito ko nantiknyo dan kamanakan-kamanakan kalian. Jan kalian tapangaruah jo hal-hal nan indak bermanfaat dan cenderung merusak tu. Kok mambuek acara lo pemuda di kampuang kito ko bisuak, buek lah acara nan bermanfaat. Banyak budaya kito nan bisa kito angkek. Saluang, silek, ulu ambek, indang dan masih banyak kesenian budaya kito nan labiah mandidik".

Alun pueh manjalehan, mak Pirin manyambuang pituahnyo.

"Apolai kalau mambuek acara untuak mamparingati hari kemerdekaan, iko jauah durhakonyo kito. Masa kito mangana jaso pahlawan jo bapesta pora dan mangarah ka maksiat lo lai,"kato mak Pirin.

"Saran mamak buek lah acara nan positif dan usahlah pai juo mancor tu lai, "sambuangnyo.

"Iyo mak," jawek pemuda tu sambie tetap manakua.

"Lah yo, mamak kasawah liak lu. Ingek pasan mamak”.

“Niang..... Bara balanjo tu?’’ tanyo mak Pirin ka urang lapau.

"Apo balanjo mak..?"

"Ambo kopi satangah, goreng dingin ko ciek a. Etong ayia kamanakan ko sakali," jaweknyo.

"Lah, mamak pai lu, Assalamualaikum," mak Pirin malangkah kalua.

"Mokasi mak, waalaikumsalam,"sarempak anak mudo tu manjawab salam mak Pirin.

Baitu mak Pirin mailing di ujuang jalan, Kirin lansuang bukak suaro.

"Ang antah apo- apo je nan ang sabuik, lah kanai caramah wak," Kirin maraso malu.

"Tapi kan iyo dek ang tu, Kito nan alah sikola ingkin kamai ko amuah lo tapangaruah jo moderenisasi nan sasek tu. Mode ang Dun, alah sarjana gai, cubo lah ang bawo pemuda-pemuda kito labiah kreatif, ka arah nan positif. Kito pelok’i kampuang kito ko,kok ndak kito sia lai..?" tukeh Polon saketek wibawa.

"Batua kecek ang Polon, yo lah salah den salamo ko. Aden talalu tabawo arus lo. Jadi mulai kini, mari kito bangun nagari kito ko. Kito iduik’an silek, ulu ambek dan pasambahan barundiang gai. Intinyo, mari kito pikian apo nan bisa kito bari untuak nagari, bukan bapikia apo nan ka kito dapek’an dari nagari".

"Suwai....". Jawek katigo kawannyo.

(Nan bacarito: Yahya Efendi)

 Carito ko fiktif. Jiko ado kasamoan namo dan tampaik, itu kebetulan je tunyeh. Wassalam


Wartawan : Yahya Efendi
Editor : melatisan

Tag :#Ciloteh