HOME LANGKAN PEPATAH

  • Sabtu, 27 Juli 2019
Bak Mamaga Karambia Condong, Buahnyo Jatuah ka Parak Urang
Pepatah

Bak Mamaga Karambia Condong

Buahnyo Jatuah ka Parak Urang

Oleh: Eka Meigalia

Dosen Sastra Minangkabau FIB Unand

 

Kalau urang saisuak rato-rato paham jo papatah di ateh. Tapi urang mudo kini ndak banyak lai nan tau. Kato bak bisa disamoan jo umpamo nan dalam bahaso Indonesia samo jo seperti, bagai, atau umpama. Kadang ado juo urang nan mamakai kato umpamo katiko malisankannyo dibandiang kato bak. Sudah tu kato mamaga nan asa katonyo paga nan diagiah awalan ma-. Kato paga samo jo pagar dalam bahaso Indonesia. Biaso digunoan untuak mambateh, mangaliliangi, atau manyakek tanah, rumah, atau laman. Karano ado awalan ma-, jadinyo kato mamaga bisa diaratian jadi ‘maagiah paga’ atau ‘maagiah bateh’. Sudah tu kato karambia lai pado umumnyo urang awak tau. Biaso digunoan untuk mamasak. Bahaso Indonesianyo kelapa. Tapi kato karambia di siko satali jo kato condong. Condong ko samo aratinyo jo miring.  Jadi karambia condong samo jo karambia miriang. Kalimaik nan sabarih partamu tu arati nan nampak adolah ibaraik maagiah paga atau bateh untuak karambia miriang.

Di barih nan kaduo ado kato buahnyo, nan mukasuiknyo adolah buah dari karambia nan condong tadi. Sudah tu kato jatuah nan dalam bahaso Indonesia samo jo jatuh. Ruponyo dalam bahaso Indonesia, kato jatuh ko banyak pulo mukasuiknyo. Ado aratinyo ‘lapeh atau maluncua ka bawah’, ‘sampai ka….; tibo di…. Ado pulo arati jatuah ko adolah ‘bangkrut, kalah, atau sakik’. Tapi di papatah di ateh, kato jatuah bairiangan jo kato buah. Mako arati nan tapek tantu ‘lapeh atau maluncua ka bawah’. Sudah tu ado ka parak. Kato ka samo jo ke dalam bahasa Indonesia. Parak samo jo kebun, yaitu sabidang tanah nan ditanami tanaman nan babuah. Kato parak di siko disandiangan pulo jo kato urang atau orang. Urang di siko mukasuiknyo urang lain. Jadi parak tu punyo urang lain, indak awak nan punyo doh. Nan buah karambia tadi jatuah ka parak urang lain tu.

Sacaro nan jaleh sajo, papatah di ateh mancaritoan karambia nan tumbuah di tanah atau parak awak, tapi karambia ko condong ka parak urang. Alah diagiah bana bateh, tapi dek karano condong ka parak urang, buahnyo jatuah ka parak urang tu. Jadi nan di tampek awak hanyo urek samo batangnyo sajo. Tampek tumbuah jo hiduiknyo karambia tu dari parak awak. Dari kasadoan tubuah karambia karambia tu nan diharokan urang nan mananam tantu buahnyo. Tapi di siko buahnyo indak jatuah di tampek awak doh. Malah jatuah di tampek urang. Aratinyo hasianyo itu untuak urang sajo. Karano ado kato mamaga, mako dapek pulo dikatoan kalau karajo awak nan maagiah hiduik jo bateh untuk karambia condong tadi sio-sio sajo.

Tapi papatah di ateh ado pulo mukasuik nan labiah dalam dari pado masalah karambia sajo. Banyak ibaraik nan bisa disampaian jo papatah tu dan pado umumnyo untuak manyindia urang. Utamonyo nan ndak tau baleh budi, nan labiah curah ka urang lain nan antah sia-sia sajo. Sajak ketek dijago, dibantu, ditopang hiduiknyo sampai bisa tagak surang. Tibo lah manjadi atau lah gadang, urang tadi indak ado mancaliak lai ka urang nan lah manolongnyo tadi. Curah dan labiah elok lo inyo ka urang lain nan indak ado maagiah apo-apo tuak hiduiknyo. Ado juo ibaraik iko nan ditujuan ka anak bujang di Minang. Tibo lah babini, inyo talampau curah sajo ka keluarga bininyo. Nan keluarga inyo surang bantuak lah lupo sajo.

Dalam hiduik awak sahari-hari kini, acok juo basarobok urang nan bantuak itu. Utamonyo kalau lah bakaik jabatan jo politik. Ado urang-urang nan sajak samulo manyokong, mandukuang inyo sahinggo inyo sampai di jabatan tu. Tapi katiko lah manjabaik, jan kan ka mambaleh guno atau takana budi, takana jo urang-urang nan mambantunyo tadi sajo indak ado. Bagi urang nan alah mambantu tadi samo juo dek inyo lah mamaga karambia condong. Dan handaknyo katiko ado nan manyabuik papatah iko di muko awak, awak patuik lah mangana-ngana diri. Kok ado salah jo lupo salamo ko. Kok ado budi nan alah talupo. Sadangkan di Minang ko bana, bautang budi tu sulik untuak manabuihnyo. Bahkan ado ungkapan, utang budi dibaok mati.


Wartawan : Eka Meigalia
Editor : Bahren

Tag :# Langkan # Pepatah # Minang