HOME LANGKAN CARITO

  • Kamis, 9 Mei 2019
Anak jawi
Carito

Anak jawi

 Oleh: Lia Safitri*

 

Kalian pasti batanyo kan apo tu anak jawi? Pasti se jaweknyo iyo binatang banamo jawi nan makan rumpuik. Badannyo jolong ka gadang suko mandakek ka induaknyo. Tapi anak jawi nan di makasuik tu mah sangaik babahayo. Ba a kato si Maman jo si Buyuang.

            “Yuang, lai tau ang jo istilah anak jawi?” Kato si Maman

“Mandeh ang, masok den ndak tau dek ang. Ciluah bana den ko. Anak jawi yo anak nan kalua dari jawi tu lah. Ba’a  wa ang ko yuang. Itu pulo nan ang tanyo ka den.” Jawek si Maman jo berangnyo.

“Ondeh Man, yo subana luruih tabuang ang yo. Ndak itu nan den makasuik do. Ba’a ang ko ..” kilah si Buyuang

“Tu kalau ndak sabana jawi, a tu makasuik ang?” Tanyo Si Maman.

“Makasuik den tu urang nan suko sasamo jinih itu yang disabuik anak jawi. Lai jaleh dek ang?”. Jawek Buyuang.

“Ondeh mande, ma bisa di Minang urang kayak takah itu dek ang tu Yuang, Ang kan tau mah adaik wak, adat basandi syarak, syarak basandi ka kitabullah. Yo indak picayo den ka ang doh.” Maman mambantah.

“Ondeh, indak tau ang salamo ko do Maman, di Padang se alah banyak nan LGBT dek ang mah”. Jawek  Buyuang sumangaik

“Apo lo ko ha LGBT? “ Maman batanyo dek penasaran

“Lesbian Gay Biseksual dan Transgender, itu kepanjangan LGBT tu lai jaleh di ang tu.  Alah tu mah panjang bana den jalehan ka wa ang.” Buyuang pai dek panek manjalehkan

Dek kato si buyuang tadi, Maman sampai tapikia apo iyo bana di Minang ado urang macam itu. Nah apo pulo samo LGBT ko lai. Dek panasaran di carilah apo makasuik LGBT. Hinggo si Maman yo bana takajuik dek mambaco pamplet di tapi jalan ado urang nan suko dan main di tampek lalok sasamo jinih. Ondeh si Maman mandasah dek ndak picayo sambia bapikia jo mangecek surang se:

            Ya allah yo bana nak kiameik hari kini ko?

Macam macam se karajo urang kini

Dak ado lai tu padusi ataupun laki laki

Harus kok jo sasamo jinih

Ihhhhhhh yo bana labiah dari binatang lai

Jan kan itu binatang se ma namuah jo sasamo jinih

Itu lah pikia-pikia panjang Maman dek dunia ko yolah sabana gilo. Apo lai Minang, masok iyo ado urang macam tu di ranah nan baradaik jo ba agamo nan ko. Dek paniang jo LGBT bajalan lah Maman pulang ka rumah. Di tangah jalan kironyo Maman nampak jo tadanga ado sesuatu nan ganjia di rumah kosong tu. Dek si Maman ko takuik, jadi nyo taruih se bajalan dek raso penasaran. Akhianyo, sabalun tibo di rumah basobok lah Maman jo Parnik. Parnik ko nyo kawan dakek rumah si Maman.

            “Hoiiii, Parnik nak kama ang?” Tanyo Maman             

            “Den ka pulang.” Parnik mambaleh

            “Pai jo den lah.” Kecek Maman (Parnik lansung di pacik tangannyo dek Maman dan di ajak mancalik sesuatu)

Dek diajak Maman pai lah Parnik ko ka rumah kosong. Si Maman jo Parnik diam-diam bajalan bantuk ka maliang di rumah kosong tu. Di baliak lubang ado nan nampak dek Maman.

            “Astaghfirullah,” kecek Maman takajuik lambek sambia manutuik muluiknyo.

            “Den lah tau dari dulu dek  ang,” (Parnik mambisiak )

Yo bana takajuik Maman apo nan di caliaknyo kironyo ado duo pasang laki-laki sadang malakukan parbuatan yang ndak patuik dilakukannyo, dek karano inyo sasamo jinihnyo. Ya Allah yo bana tasirok darah Maman mancaliak apo nan tajadi di rumah tu. Lah siap mancigok laki-laki tu malakukan perbuatan nan ndak patuik tu dah, baliak pulanglah  si Maman jo si Parnik. Di tangah jalan nan si Maman bacaroteh juo nan tajadi cako.

            “Oalah Parnik, paneh jantuang den”.

            “Ang baru tau, den alah lamo tau dek  ang.” Parnik manjawek jo gaya santai e.

            “Ba a kok anok se ang?” Maman baliak tanyo dek lah mangka hati raso e.

            “Den takuik dek ang. Beko den pulo nan di sarangnyo. Lai tau ang alah banyak anak bujang nan di gituannyo, apo lai nan anak kuliah tu ha alah ikuik pulo manjadi anak jawi tu.” Parnik takuik bana.

            “Apo kecek  ang? Anak jawi?” Maman panasaran

            “Iyo anak jawi jo induak jawi. Itu mah urang nan suko ka sasamo jinih. Takuik den dek ang. Jaleh panyakik tu bisa manula. Beko aden pulo nan kanai. Patang aden hampia ka di pabagaian dek urang bantuak itu. Katonyo den ka di agiah pitih kalau nio.” Parnik cameh

            “Ba a kok ndak ang kaduan ka amak ang?? Tanyo Maman

            “Iyo, ndak talok den doh, beko amak den ado ado se nan tapikian dek inyo.” Parnik tadiam

            “Tu apo lai nan ang tau soal anak jawi tu?” Maman batanyo dek panasaran bana

            “Lai tau ang, di Padang se alah banyak anak jawi. Di pasa baru tu ha kecek kawan den nan dapek kaba dari dosennyo ado rumah khusus untuak urang tu.” Parnik manjalehan

            “Lai sabana tu Parnik? Lai ndak ota ang se? Jan bagarah garah ang soal masalah iko. ” Kato maman dek serius

            “Subana tu mah, untuak apo den baduto ka ang.” Parnik manjawek

Akhia nyo tu Maman bapikia lansuang apo iyo hari nak kiameik. Dek pikia panjang tu pai lah Maman ka Angku Kadi. Ulama nan lumayan tau jo agamo adaik jan di tanyo tau sado alahnyo. Bapisahlah inyo baduo. Tibo di rumah Angku Kadi, Maman akhianyo bacarito ka Angku Kadi baraso di Minang ado anak jawi. Angku pun manjalehan raso itu emang ka tajadi dek hari nak kiameik. Hinggo Angku manitip pasan ka maman:

            Maman, anak jawi alah banyak tajadi di Padang. Iko yo bana sabana gawa Maman, jo apo muko ka di latak , Awak nagari baradaik jo ba agamo tapi ba a kok ado manusia nan labiah dari binatang.

Iyo mak “ kecek si Maman.  

 

 

*Mahasiswa Sastra Minangkabau FIB Unand

 


Wartawan : Lia Safitri
Editor : Bahren

Tag :# Langkan # curito #minang