HOME LANGKAN CARITO

  • Selasa, 14 Mei 2019
TAKOKLOGI
Carito

Takoklogi

Oleh: Bahren*

 

Sasudah gagal jadi mentri walapun dalam mimpi Tan Patuih indak patah sumangek untuak manyuarokan suaro kangkawan nyo nan banyak ko. Tarutamo suaro dari guru-guru nan mudo sarato murik-murik Tan Patuih nan sangaik kritis jo calon-calon palo sikola. Ado bara urang di antaro murik Tan Patuih nan sampai diancam ndak dapek biasiswa dek gara-gara mandemo palo sikola nan lamo. Bahkan tadanga kaba ado pulo rang geak murik Tan Patuih tu sampai kanai strok ringan dek mandapek kaba anak nyo bamasalah di sikola nyo. Tan Patuih jo kangkawan nyo, guru-guru mudo ko lah sapakaik untuak tatap mandampingi mahasiswa ko.

Baliak ka curio mimpi Tan Patuih kalamari. Dek masih tagamih-gamih jo mimpi tu, Tan Patuih mulai mancaliak-caliak sia kolah nan ka manjadi tigo di antaro calon palo sikola ko nan kadipiliah mentri isuak. Di caliek jo pandangi den Tan Patuih poto-poto calon tu, disigi namo e surang-surang. Takana lah dek Tan Patuih kawan e samo sikola dulu, nan punyo hobi main bete jo ilimu takoklogi, Si Man Iriak. Indak do bapikia panjang langsuang di kirim e poto-poto langkok jo namo-namo calon palo sikola e tu ka Si Man lewat pasan wat ap.

Di bawah poto tu Tan Patuih manulih, Man cubo lah ang pakai ilimu takoklogi ang untuak poto-poto ko, sakalian jo namo-namo nan ka mungkin jadi tigo atau ampek urang calon kuek palo sikola den Man. Den tau sangkek sikola dulu waang nan rajin mamakai ilimu takoklogi untuak kangkawan nan lain, sampai-sampai den jo amak Si Ojak manjadi kiniko dek garah-garah takoklogi ang mah Man. Den tunggu kini. Pasan takirim dan di tarimo dek Si Man. Baleh partamo si Man, ambek cak Tuih. Den cubo etong namo jo simbol-simbol ilimu takoklogi namo e dulu.

Si Man pun manjawek tanyo Tan Patuih. Tuih. Dari pancaliak an den ado 3 urang nan namo e samo bareknyo. Katigo ko manuruik den ndak cocok jadi palo sikola, inyo labiah cocok jadi wakia sajo, karano tigo namo ko urang nan ahli dalam bapolitik, Ikan tanggiri simbol e ko Tuih. Tanggiri ko paliang gesit di antrao ikan-ikan nan ado di lauik. Jadi katoan ka nan batigo tu, tunggu se lah tawaran jadi wakia palo sikola.

Nan kaduo, nan Pak Dora ko ibaraiknyo bana, samo jo tungku parapian, sadang dingin inyo takana, dan pandai bana manyanangkan kuali jo pariuak. Dan den yakin, salamo ko lah banyak uranga nan sanang dek gara-gara apak ko. Mako inyo masuak ka dalam calon nan paliang kuaik untuk basaing dipamiliahan tingkek mentri. Samantaro Pak Noja ko ibaraik nyo buruang alang Tuih, bisa manangkok sadang tabang. Lah di ateh bana posisi e kini, kalau ado nan katuju dek e, nyo usahoan juo mancakau nyo walaupun sadang tabang. Tapi yakin den Tuih itu pulo manjadi kalemahannyo nan banyak indak disuko urang dari sipaik alang tu. Ayam tapauik di sembanyo juo.

Kok di sabiuk ka Si Dede, inyo ibaraik dandang, dandang ko jan ang aratian tampek mamasak nasi dalam jumlah banyak Tuih, dandang di siko aratie bana kapa, memang kapa nyo indak gadang do, tapi untuak maso kini dek inyo masih mudo matah, iko nan mambuek nyo punyo paluang masuak ka tangan mentri, karano kini sadang tren generasi milenial apolai urang nan ka mamiliah di tampek ang tu banyak nan mudo, jadi paluang nyo ado. Salain ko sipaik kapa ko sangaik tagantuang dek angin jo galombang Tuih, kok angin rancak galombang tanang mako barasiahlah kapa balayia ka muaro. Tapi kok angin bakisa galombang gadang, alamaik kapa karam binaso.

Nan tarakir ko nan den pikia ka manjadi kudo itam di antaro nan lain ko. Pak Andri, apak ko, dari namonyo umpamo aia, sipaik aia kan ang tau mah, sajuak jo mandinginkan, apolai kini bulan puaso. Salain tu den dapek kaba Pak Andri ko ado pulo bakawan jo urang hebaik, Uwan Salis namo e. Uwan ko kini lah ampia samo pulo jo mentri jabatan nyo. Kalau jo mentri apak ko bakawan juo. Tapi untuak masuak ka dalam calon nan tigo indak payah doh dek Apak ko.

Itulah kikiro ilimu takoklogi den, nan ang mintak Tuih, tapi aden ko sia bana lah nyo Tuih, indak pamiliah indak pulo nan ka dipiliah. Jadi sakadar takok-takok uwok sajo tu nyo. Soal ang bajadi jo amak si Ojak tu salain kebetulan wakatu itu amak si Ojak juo lah kanai ati jo ang saban e mah, tapi namo e padusi tu indak namuah mangecek dulu doh dek ang. Mako nyo wakatu ang mintak den Takok, amak si Ojak lah labiah dulu lapor ka den. Tingga den mampa kuek nyo sae lai Tan. Pasan pun dikirim dek Man Iriak ka Tan Patuih. Dalam hati Tan Patuih, manggarutu surang, kanai karajoan den dek Si Man, awas ang Man, den indak pandandam doh Man. Tapi aden urang nyo lamo lupo. Indak ka kanai ang agak sakali di den. Tunggu se lah dek ang. Bitu bana garitih Tan Patuih dalam hati…

 

*Dosen Prodi Sastra Minangkabau FIB Unand   

 


Wartawan : Bahren
Editor : Bahren

Tag :# Langkan # curito #minang