Rambai (Baccaurea Racemosar)

Rambai (Baccaurea racemosar)

Oleh   Bahren*

Pulang sumbayang subuah pagi ko Mak Anan indak langsuang ka rumah. Inyo bajalan-jalan santai di sakitaran jalan kamba di dakek musajik tampek Inyo biaso sumbayang. Bajalan liau lambek-lambek dakek jambatan ketek nan dibuek di tangah jalan kamba tu. Jambatan tu sabananyo indak untuak  manyubarang, tapi jambatan tu dibuek untuak olah raga kaki. Lantai jambatan tu sangajo diagiah batu batu runciang kaciak-kaciak. Kato urang-urang jikok bajalan di ateh batu runciang kaciak-kaciak tu bisa mambuek jalan darah samakin lancar.

Dek mandangan itu dicubo pulo lah dek Mak Anan pagi tadi. Salangkah partamo lai masih rancak sengeang jo galak  Mak Anan, langkah kaduo mulai bakaruik kaniang liau manahan ngilu jo sakik. Tapi dek lah diulang bakali-kali, makin lamo samakin tabiaso Mak Anan jo jalan babatu runciang tu. Lah rancak enggak Mak Anan jalan di situ.

Indak bara lamo, dari arah matoari tabik, Nampak pulo dek Mak Anan si Alan sadang balari-lari ketek. Sadang olah raga pagi agak e ko kato Mak Anan dalam ati. Makalum sajo, kini kan lah Akad pulo ariko. ‘Assalamulaikum Mak, kato Si Alan, sambia balari-lari santai”. “ Waalaikumussalam Lan”, dari Ma Ang ko Lan? Kato Mak Anan. Dari rumah Mak, jawek Si Alan. Ambo lanjuik lari do olu Mak, jawek Si Alan sambia taruih balari jo malambaikan tangan. Jadih Lan, lanjuiklah, mamak lanjuik pulo bajalan dibatu repleksi ko a. Beko Ambo singgah ka rumah Mamak, kato Si Alan sambia  malanjuikkan lari e.

Indak bara lamo sasudah inyo basuo jo Mak Anan, Si Lan pun baransua pulang. Sabalun Pulang inyo singgah di lapau si Muih, untuak mambali katan jo goreang sarato Katupek gulai tunjang ka untuak di baok pulang jo nan kadibaok ka rumah Mak Anan. Di Lapau Si Muih, lah rami urang. Ado nan mamasan teh talua, ado nan mamasan gulai paku jo tunjang, ado nan mamintak talua saparo masak. Ado juo nan asik mancaliak siaran tipi sambia mangunyah sala jo rakik kacang.

Di suduik, arah ka ilia, ado pulo tadanga dek si Alan nan baciloteh, kok si Anu tu.. Anak e lah co rambai balambuik an. Kini Masih juo baranak surang lai. Yo indak abih pangana den do.  Bitu bana nan tadanga dek Si Alan. Dek mandanga itu panasaran malah Si Alan. A mukasuik e co rambai balambuik an tu. Dalam ati inyo bakato. Beko den tanyo ka Mak Anan. Bia indak makin panasaran den dibuek e.

Ko Lan, nan ang pasan tadi, kato Si Muih ka Si Alan. Iyo.. ma nyo Muih! Bara den kanai tu, kato si Alan. Lontong tangah duo ribu. Katan jo Goreang limo ratuih, jadi ka sadoe duoribu, Lan. Jawek pitiha ambo Muih. Lansuang jo sonsongan e tigoribu. Tarimo kasi Muih. Samo-samo Lan. Dari tampek Si Muih, Si Alan pulang cah ka rumah e, pai mandi jo basalin baju nan baru. Sasudah mandi jo makan katupek tunjang jo minum kopi, Si Alan bagageh Ka rumah Mak Anan. Indak bara lamo sasudah itu, sampai malah Si Alan di rumah Mamak nyo tu.

Asssalamualaikum, Mak. Waalaiukum Salam Lan. Masuak lah, duduak di siko a. Jadhi mak, Ma Mintuo  Ani, Mak? Ambo ka maagiah ko ka liau, ka untuak dikulek-kulek sambia maota-ota Mak. Lansuang je lah kabulakang. Mintuo Ang lai di bulakang. Jadih Mak. Di anta malah dek Si Alan goreang jo Katan tadi ka minto nyo.

A…. baa kaba amai jo abak ang Lan? Lai sihaik liau? Lai Mak alhamdulillah liau sihaik kaduo e. O yo mak. Ado ciek nan ka ambo tanyoan ka Mamak. Sadang mambali katupek tunjang tadi di Kadai Si Muih, ambo mandanga ciloteh urang di arah ilia lapau si Muih tu. Ado kato-kato e nan ambo kurang mangarati mak, A tu kato e tu.kikiro co iko kato e mak ‘ kok si Anu tu.. Anak e lah co rambai balambuik an. Kini Masih juo baranak surang lai. Yo indak abih pangana den do’.  Kok nan lain lai tau ambo mak, tai nan co rambai balambuik an tu nan indak paham ambo doh Mak a.

OO itu, nan ang tanyo. Kato co rambai balambuik an tu? Iyo Mak. Itu bana nan mabuek ambo batanyo-tanyo dalam ati Mak. Inyo biko mah Lan, itu tamasuak dalam kato umpamo di bahaso minang, gunonyo untuak bakieh jo kato bayang. Jikok di caliak ka jinih jo sipaik buah e Rambai (Baccaurea racemosar)  ka punduang dalam bahaso lainnyo nan ado di Minangkabau, atau kalau di jawa rambaiko disabuik jo buah menteng. Rambai ko tamasuak tinaman perdu nan rimbun sarato tinggi, tinggi nyo bisa mancapai 25 meter. Sakali babuah Rambai ko sabana banyak dalam satangkai tu bisa puluahan bahkan ratusan dalam satangkai. Cubo bayangkan dek Ang Lan, anak urang bantuak Rambai banyak e. itulah kieh nan dibari dek rang minang untuak urang nan banyak anak Lan, apolai kok rambai tu balambuik an, taserak kian kamari. Iko diibaraikkan baa caro mangasuah jo ma aja anak tu, pasti payah jo sibuak amak jo ayahnyo. Nan surang managih nan surang mintak dianta karayia. Alun salasai nan surang ka rayia, nan ciek lai lah mintak mandi pulo.

Lai tabayang susah jo payah e dek Ang tu Lan. Kalau amak jo ayah nyo indak pulo panyaba ka manjadi a anak kiro-kiro isuak Lan. Tapi kok lai dapek induak jo ayah nan saba sarato panyayang mako manjadilah anak ko ka sadoe. Ado pulo istilah e dek urang awak isuak tu Lan. A pulo istilah e tu Mak. Biasonyo urang awak mangecek, Kok si Anu.. iyo anak-anak e lah bantuak pisang masak satandang. Arati e bana manjadi kasadonyo. Tapi, baa kok ado pulo urang nan berang, manyabuik e kapunduang tu Mak. A pulo aratie e tu?. Itu bisuak-bisuak lah tu Lan. Ijan Kini lo wak bahas tu. Jadih Mak, Jadih…

 *Dosen Sastra Minangkabau FIB Unand