Puputan Kaliang

PUPUTAN KALIANG

Oleh: Perli Nomanza*

Bamulo carito ko tajadi pado anak ketek nan tingga di danau bawah Alahan Panjang nan banamo Buyuang Tukuik. Inyo tingga jo amaknyo sadangkan abak nyo alah lamo maningga. Karajo amak Buyuang Tukuik ko adolah basawah, kadang pai ka sawah urang untuak mancari pitih. Parangai  Buyuang Tukuik ko dapek dikatoan mada, indak nio mandangaan kato-kato amaknyo.

Di Alahan Panjang ko ado ampek danau, ado Danau Ateh, Danau Bawah, danau Aia Sanam, jo Danau Talang. Kaampek danau ko sangek lah rancak di liek apolai kalau di liek di ateh Bukik Cambai. Kaampek danau tu sangek jaleh di caliak. Di danau ko kadang di gunoan dek amak-amak untuak tampek mandi, manyasah sarato tampek manangkok ikan dek apak-apak. Apolai nan anak-anak sarupo Buyuang Takuik sanang bana mandi di tapi danau tu.

Katiko BuyuangTukuik pulang jo kawan-kawannyo dari bamain, dek hari nan sangek paneh badan lah angek pulo, tapikia lah dek Buyuang ko nak pai mandi ka Danau Bawah. Pai lah Buyuang Takuik ko ka tampek amaknyo mamintak izin.

“mak buyuang pai mandi kadanau bawah dulu yo” “tu jo siapo ka pai yuang?”

“Lai jo kawan-kawan buyuang mak”

“Jang sanjo-sanjo bana buyuang pulang ndak yuang”

“Indak mak jam duo pulang buyuang lai”

“Jadih lah yuang, tapi kok kamasuak ka dalam danau tu baco-baco lah bismilah dulu yo. jan asa masuak c ka dalam danau tu yuang, nyo baok ang dek puputan kaliang beko” “puputan kaliang tu apo du mak?”

“Puputan kaliang tu aie nan baputa-puta sarupo aie di kacau di dalam embe. Di tangah-tangah aie tu bawarna itam mah nak,  tu mangkonyo urang maagiah namo puputan kaliang”

“Ma lo ado dek amak tu jan manakuik-nakuikan juo mak”

 “Dangaan lah kato amak buyuang jan bak kato buyuang c pai kadanau tu”

“Yo lah mak buyuang ka pai lai,  banyak bana carito amak mah”

 Buyuang nan indak mandanga bana apo  nan di katoan amaknyo, inyo langsuang pai jo kawan-kawannyo ka danau bawah jo hati nan sangek sanang. Satibo di danau tu buyuang langsuang mambukak bajunyo.

“capek lah kawan bukak lah baju tu lai mandi awak lay”

 “tunggu lah dulu yuang mambaco bismilah lah dulu yuang baru masuak ka danau tu”

“lamo bana mah. Ndak tahan nak mandi lai do ha.”

“kok betu kato buyuang mandi lah dulu kami bukak baju jo badoa sabanta lu”

“jadih lah mandi lah den lu lamo bana kalian mah”

Indak bapikia panjang si buyuang langsuang maloncek ka dalam danau tu. Sadangkan kawan-kawannyo sadang mambukak baju jo mambaco doa ka masuak ka dalam danau tu. Sakitar jam duo baleh baranang-ranang lah buyuang jo kawan-kawannyo di danau tu. Tibo-tibo buyuang langsuang mintak tolong kapado kawan-kawannyo.

“tolong..tolong....!”

“dek apo ang yuang.”

“Tolong den ciek kawan ndak bisa den baranang do kaki den raso ado nan mamjujuik ka dalam danau ko”

“Yo bana lah yuang. Capek lah kawan-kawan awak tolong sibuyuang kalua dari danau ko”

Jo rusuah hati Pai lah kawan buyuang manolong si buyuang kalua dari danau tu. Sadang kan kawan-kawan nan lain mamintak tolong lo kaurang lain untuak manolong buyuang. Katiko manjujuik buyuang dari danau aie di dakek buyuang lansuang baputa kancang sarupo aie nan di kacau dalam embe. Mancaliak aie sarupo tu indak tapaciak an lah si buyuang ko dek kawan-kawannyo lai. Kawan-kawan buyuang langsuang pulo lari karano si buyuang indak nampak di dalam danau tu alah di puta dek aie danau. Kawan buyuang nan batigo tu indak bisa manyalamaikan buyuang tu do. Urang nan lain alah tibo pulo untuak manolong tapi buyuang alah hilang indak ado nampak lai. Hari lah jam satupai lah kawan buyuang ka rumah amak nyo mangabaan anak nyo lah ilang di puta aie danau.

“mak....mak...mak...”

“iyo nak. Mano si buyuang nak? Kok ndak ado nampak?”

“buyuang alah hilang mak di puta aie danau mak”

“iyo bana ko nak?”

Langsuang lah amak buyuang pai ka danau mancari buyuang nan hilang. Satibo di danau amak buyuang sangek-sangek indak tarimo kahilangan anak nyo. Sadangkan urang nan lain sibuk mancari buyuang jo biduak. Hari lah mulai malam, nan Buyuang Tukuik indak juo basuo dek urang nan mancari. Pado akhia nyo, pulang lah kasadonyo karumah surang-surang.

“mak bisuak c cari si buyuang lai mak hari lah malam mak”

“iyo nak bisuak tolongan mancari si buyuang yo nak”

“iyo mak bisuak kito kamari baliak mak mancari buyuang”

Baliaklah amak buyuang jo kawan-kawannyo pado hari tu jo hati nan sangaik sadiah. Aie mato amak buyuang indak kujuang baranti ulah mamikian si buyuang nan lah hilang di puta aie danau. Kaisuak harinyo pai lah amak buyuang basamo-samo jo urang uintuak mancari si buyuang tapi hasilnyo indak juo ado basuo di dalam danau tu.Tigo hari sasudah tu ado lah urang nan maimbau-imbau amak si buyuang.

“mak...mak...mak”

“Ado apo nak?”

“Buyuang alah basobok mak buyung ado di danau aie sanam mak”

“Tu baa buyuang kini nak?”

“Pai se lah awak kasitu dulu mak, ambo alun juo ado mancaliak buyuang kasitu lai tadi ambo bajalan-jalan ado urang nan mangabaan si buyuang alah basobok”

Jo hati nan sangek sadiah bacampua sanang, pai lah amak buyuang ka Danau Aie Sanam. Satibo di danau tu, nampaklah Buyuang Tukuik ko tarapuang di dalam danau nan sadang dikaluanan dek urang jak di danau tu. Mancaliak badan buyuang alah pucek pasi, saluruah badan buyuang hijau-hijau sarupo di tokok urang. Pai lah mandakek amaknyo ka mayaik si buyuang.

“jago lah nak. Manga indak badangaan kato amak yuang. Kini amak manyasa pulo mampalapeh buyuang mandi ka danau tu ”

 “alah tu mak buyuang indak ado lai di dunia ko mak buyung alah maningga mak. Amak nan saba yo mak”

Akhia carito di angkek lah basamo-samo mayaik si buyuang tukuik  ko ka rumahnyo untuak dikubuan. Ikolah pasan jak carito Puputan Kaliang, indak buruak bahayonyo nyo Puputan Kaliang, tapi jan lah sampai indak mandangan pasan dari mandeh awak surang.

*Mahasiswa Sastra Minang FIB Unand