HOME LANGKAN CARITO

  • Kamis, 15 Agustus 2019
Pasan Buya
Carito

PASAN BUYA

OLEH: M. NANDA ARISANDI

(MAHASISWA SASTRA MINANGKABAU FIB UNAND)

            Ado di sabuah nagari di Ampalu. Iduik saurang garim banamo si Ujang, umuanyo lah 27 tahun. Karajonyo mambarasian surau sarato manjago nyo. Si ujang kiro-kiro alah duo tahun lamonyo manjadi garim, salamo manjadi garim si ujang urangnyo indak lalai, sado karajo nyo dikarajokannyo, yo sabana segeh inyo jo karajo tu. Mulai dari mambarasian surau sampai azan dan sarato manjadi imam kutiko sumbayang. Ari Ju’maik kutiko itu, malam sasudah sholat isya, tampak lah dek garim ado surang urang makmum yang alun ado pernaah nampak sabalunnyo, urang nyo kiro-kiro baumuah alah labiah satangah abad, jangguik nyo taba, ba kain putiah sagalo badan nyo, dan mambaok rotan panjang disabalah tampek sumbayang. Mangko sasudah sholat isya batanyo lah si Ujang ka urang tadi

“Kalau buliah batanyo Ambo batanyo,sia namo Datuak, dari ma dan nio kama Datuak ?, alun ado pernah nampak dek awak sabalunnyo sumbayang di surau kito ko sabalunnyo lai.”

Madok lah urang gaek tadi ka si Ujang nyo, nyo sapo jo salam “Assalamualaikum, kalau namo… Ambo biasi di umbau urang Buya Sulaiman Azis urang subarang. Ambo, baliak ma agiah pangajian di musajik subarang ten a. Dek tadanga azan mangko ambo baranti jo singgah sumbayang di siko”

Sasudah maota paratamo tadi, mako balanjuiklah ota liau baduo ko. Nan Buya Sulaiman ko lah mangecek pulo panjang leba baa kok bisa sampai inyo ka surau itu. Surau pun lah mulai langang urang yang sumbayang pun alah mulai pai ciek - ciek, tingga lah si ujang ba duo jo urang gaek tadi. Limbak nan dari pado itu, Si Ujang kuo bacurito ka Buya Sulaiman tadi, mulai masalah iduik sampai lah akhirnyo batanyo lah si ujang masalah agama jo iduik nyo salamo ko. “Buya, sabananyo ilmu agamo Awak saketek di Surau ko, agiah lah kironyo ambo ilmu agak saketek Buya, panguek baka Awak pulo sabagai baraja di surau ko” bitu bana tanyo sarato pintak Si Ujang ka urang buya tadi. Dek kandak lai ka buliah, pintak lai kabalaku, di bari dek buya tadi sagalo ilmu agamo nan sangaik paralu dan pantiang di palajari dan tasabuik bagai lah dek urang gaek ko, baa doso yang ado pado diri manusia tu, yang iduik nyo hanyo mamikian dunianyo sampai akhiratnyo lupoan.

Tamanuang lah si Ujang sakatiko tu, manitiak ayia mato nyo, di caritoan lah ka urang buya tu, baa dirinyo dulu urang yang dak tau taratik jan kan adaik, agamo seh indak di palajari, urang ka surau awak palapau di sinan karajo bajudi siang jo malam, kadang manang kadang kalah sampai badan ba abih- abih harato abih di pajuai sampai malawan ka urang gaek surang, indak tantu durhako bagai dimana hati kasanang, indak nio di aja ka nan bana, sampai akhirnyo si ujang diusia dari rumahnyo. Dak tau nio pai kama di kampuang lah malu, dek lah mulai hilang aka raso manyasa tu alah mulai juo tibo,  hinggo sampai di surau ko diajaan dek Garin sabalunnyo ilmu agamo.  Mako dek itu bisa sampai barubah ka nan bana. Kini guru nan ka manuntuak ajari alah maningga indak ado yang ka manunjuakan le, tapaso baraja surang jo buku yang ditinggan tadahulu.

Sambia manangih batanyo lah si ujang ka urang buya tadi. “ Buya, lai ka ditarimo juo ama awak ko Buya?, kok rumah alun talok ta pijak i lai, dek durhako ka urang tuo, malu raso nyo ka manampakan mungko, alun doso nan lalu nan dak ta ituang banyaknyo.” Mandanga kato si Ujang, dinasehati lah nyo dek Buya nantun, untuak mintak maaf sugiro lah ka urang tuo.

Dak lamo sudah tu di kisahkan lah dek Buya ko sabagai pedoman dek Si Ujang mode apo sabananyo dunia ko. Dan apo yang harusnyo piliah lakuan ka mungko nyo lai. Bakato lah urang Buya nantun“ ado duo hal nan bisa kito bandiangkan. Nan partamo, dulu ado kisah padusi nan bazina tapi masuak sarugo dek ma agiah makan anjiang. Nan ka Duo urang ahli ibadah yang maningga tapi murtad” sasudah tu di caritokan, pulo lah dek buya ko duo carito tadi, dek mandangan kisah tadi alah agak mulai rado isak sarato tangih Si Ujang. Dan dari carito tadi lah mangarati Si Ujang baso urang itu, nan manjadi paratian dek rang nan banyak iyolah baa kehidupan nyo di akhir hayat nyo. Dan di caritoan bagai dek urang gaek tu ciek  syair yang sangaik lamak di danga. Syair tantang kisah Abu Nawas.

“Ilaahii lastu lil firdausi ahlaan wa laa aqwaa ‘alaa naaril jahiimi. Fa hablii taubatan waghfir zunuubii fa innaka ghaafirudzdzambil ‘azhiimi. Dzunuubii mitslu a’daadir rimaali fa hablii taubatan yaa dzaaljalaali. Wa ‘umrii naaqishun fii kulli yaumi wa dzambii zaa-idun kaifah timaali. Ilaahii ‘abdukal ‘aashii ataaka muqirran bidzdzunuubi wa qad da’aaka. Fa in taghfir fa anta lidzaaka ahlun wa in tathrud faman narjuu siwaaka”

saketek syair yang dinyanyian dek Buya tadi. Sasudah tu nyo caritoan baa Abu Nawas urang nan sangaik cadiak bahkan dalam ibadah bagai inyo ba upayo marayu tuhan, jo syair inyo bakato.

            Alah sekian lamo bacarito, ari pun mulai laruik malam. Dak lamo sudah tu tibo surang anak mudo dari mungko surau sambia mambaco salam dan mulai duduak maampian Si Ujang jo Buya tu, bakato lah anak mudo tadi “ buya baliak lah kito lai, ari alah mulai laruik malam” kato anak mudo tu. Akhia nyo di jalehan lah dek Buya, baso anak mudo nan datang tadi tu murid Liau, inyo tadi tu pai bajalan ka nagari subarang tadi untuak manjapuik buku urang Ambo yang tingga katiko maagiah kaji tadi. Sabalun ka pai urang Buya  tadi pun bapasan ka Si Ujang supayo tetap mangarajoan kewajibannyo nan ado, sarato untuak tambah acok lai baraja supayo indak salah dalam manjalani agamo.

            Baru bajalan maninggakan surau, tambah takajuik lah si ujang ko, karano tau urang Buya tu kironyo buto, tanyato guno rotan tadi tu untuak manunjuakan jalan, sudah di bimbiang dek murid nyo, langsuang bagageh lah Si Ujang mancium tangan Buya tu sambiah bakato “ sungguah mulia bana Buya, mancari jo ma agiah ilmu” bakato lah urang Buya tadi baso nyo kekurangan itu indak manjadi alasan bisuak ko di akhiraik karano yang buto bisa hafal al quran, orang nan lumpuah rajin ka musajik. Sasudah tu bajalan lah pai buya tadi jo muridnyo maninggan surau. Salapeh pai urang Buya tu, langsuang pai sujuik Si Ujang. Di baok duduak ma itu-ituang diri tanyato kurang  juo ilmu yang ado, mangko paralu juo kironyo baraja labiah. Ditutuik lah sagalo pintu surau, takana pasan Buya Sulaiman tadi, bisuaknyo, pai lah si Ujang manamui urang tuonyo, nio maminta maaf ka urang tuo nyo.

 


Wartawan : M. Nanda Arisandi
Editor : Bahren

Tag :# Langkan # curito #minang