HOME OPINI TINGKOK

  • Kamis, 18 April 2019

Nagari Batu Bulek

TINGKOK
TINGKOK

Nagari Batu Bulek

di Luhak Tanah Data

Oleh   Bahren*

           

Jo bismillah curito di bukak, curito tantang asa jo usua apo koh alasan nagari dibari namo, dibari namo jo Batu Bulek. Datanglah Ivan Adillah mahadok ka Datuak Bagindo Anso. Datang baliau maso itu dalam tanggal 18 di bulan Mei tapeknyo tahun 2007. Ado pun Datuak Bagindo Anso ba umua tujuah puluah satu kutiko basuo di Pato. Ketua BPRN jabatan liau katiko partamuan hari nantun.

Ado pun curito liau wakatu itu. Bagulambek liau bacurito tantang asa jo usua nagari ko. Dalam mancari daerah nan baru, niniak moyang daerah ko daulunyo mulai mandaki bukik dari Pariangan Padang Panjang. Dek lamo lambek mandaki, sampailah niniak wakatu itu niniak di ateh bukik nan basuo sabatang kayu marapalam. Mako dinamoi lah tampek nantun manjadi Bukik Marapalam. Inggo pado suatu hari sasudah parang Paderi batamu lah kaum adaik jo ugamo di puncak bukik marapalam. Di kamudian hari puncak bukik dibari namo Puncak Pato, asa nan dari kato patamuan. Inggo kini baitu juo, banamo Puncak Pato.

Dari bukik marapalam niniak kito ko taruih bajalan. Dalam pajalanan niniak kito ko batamu jo urang nan sadang mambuek lasuang dari batu. Mako tampek niniak batamu jo urang nan mambuek lasuang dari batu, dibari namo lah tampaik tu jo namo Lasuang Batu. Dari lasuang batu, niniak taruih sajo bajalan, sampailah niniak kutiko itu di Baruah Bukik, dinamoilah daerah tu kini jo Baruah Bukik. Dari bawah bukik niniak ko taruih bajalan dan bajalan inggo sampai di nan data jo agak tinggi tampek nyo. Kamudian hari dinamoi lah daerah nan data jo agak tiggi nantun jo Kawai, karano ado batang aia kawai di situ.

Di Kawai niniak baranti, di siko mulai niniak manatap, mambuek kampuang jo paladangan. Dalam pado itu, sambia mancaliak suok jo kida, mancaliak ka mudiak jo ka ilia, sasudah pandang salasai, bajalan niniak kutiko itu, ka arah ilia mambukak ladang malah niniak kito di tampek nantun. Ladang nan sangaik gadang bana, indak tabedo lawehnyo ladang. Mako dari pado itu, dek mancaliak ladang nan laweh, dibarilah tampek itu namo Ladang Laweh.

Dari ladang laweh niniak taruih bajalan ka bawah, nampak lah lapangan nan sangaik lueh, nan masih rimbo kutiko mako dibari namo tampek tu kito jo namo Koto. Kampuang nan talatak agak di atek koto dibari namo Kapalo Koto. Dari kapalo koto ko niniak moyang kami rang batu bulek taruih bajalan ka arah bawah, di bawah kapalo koto niniak basuo jo batang aua nan baduri, mako tampek aua baduri basuo tu, dibari namo jo Aua Baduri. Baitu lah niniak mambari namo nan bapadoman ka Alam takambang jadi guru. Apo nan tampak itu dibari namo jo nan tampak tu.

Dari Aua baduri bajalan taruih niniak kami bajalan manyese batang aia kawai, dari kawai tu sabalah kida mandaki baliak niniak kito ko, basuo malah niniak jo daerah guguak, daerah nan labiah tinggi dari sawah di sakitarnyo. Dari guguak itu tadi, nampak lah bayangan putiah dek niniak kami, nampak nan dari hutan baluka.batanyo niniak samo surang, dari ciek batanyo ka nan lain. Saliang duga maso itu. Apokoh bayangan putiah nantun, batu lah adonyo. Sapakaik niniak maso itu, untak mancaliak jo maliek batu nantun. Tanyato sasudah dicaliak jo di like, bana malah adonyo. Bayangan tadi datang dari sabuah batu, batu nan sangaik gadang bana. Di tampek batu bacaliak tadi, mako dibarilah namo tampek nantun jo namo Batu Baliek.

Indak doh lamo sasudah itu, niniak bajalan ka arah timua, manyese batang aia nan ado, inggo sampai ka ulunyo. Di ulu jo asa aia nantun, batamu lah niniak moyang kito, sabuah batu bulek nan sagaik gadang. Bulek nyo sabana bulek lah bak cando kalereang bulek batu tu. Batu nan gadang itu kini, dibaok bajalan malalui jalan sitapak. Kamudian, rombongan tadi barundiang mancari namo untuak daerah nantun. Parundiangan baujuang jo supakaik nan batua-batua bulek, Mako dinamoilah tampek nantun jo Batu Bulek yang aratinyo batua-batua bulek.

Curito ko lah didaek dek baliau Catuak Bagindo Anso sajak daulu. Dari urang nan tuo-tuo tarutamo dari Datuak Bandaro Basa duo jo Mak Datuak H. Bagindo Rajo Indo. Kaduo urang nantun mantan wali nagari Batu Bulek. Nagari Batu bulek ko mamakai kalarasan Bodi Caniago saroato ampek sukunyo. Suku Malayu, Suku Caniago, Suku Piliang jo Suku Kutianyia.

Di bawah suku nan ado ko ado pulo kampuangnyo yang dipimpin oleh ketua kampuang. Suku Malayu ado tigo kampuangnyo Bendang, Malayu jo Mandailiang. Caniago baitu puo tigo kampuang Caniago di ateh, Caniago di tangah (sungai Napa),Jo Caniago di bawah. Piliang tigo pulo kampuang nyo Piliah di ateh, Piliang Tapi Parik, sarato Piliang Tasapik jo Piliang Tapanggang. Kutianyia ado kampua kianyan 

* Dosen Jurusan Sastra Minangkabau FIB Unand


Tag :# Langkan # Tingkok # Nagari # Asa Usua

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com