Nagari Baringin

Nagari Baringin

di Luhak Tanah Data

Oleh   Bahren*

Baringin nagari banamo

Nan Talatak di tanah data

Diulang juo kaji nan lamo

Ka pambukak-bukak pangana

Bukik gombak jo lantai batu

Jati sarato parak jua

Nan katigo Pincuran tujuah

Kampuang suduik balakang pajak

Kampuang baru baitu pulo

Kok nak pandai rajin baguru

Kok nak tahu rajin baraja

Bajalan banyak nan ditampuah

Banyak lah tampek nan di jajak

Nagari baringin jan lupo

Di ulang balambek-lambek, di ijo ciek-ciek tantang asa jo usua nagari kito. Nagari nan ka kito surah jo curitokan kiniko banamo Nagari Baringin dalam Luhak Tanah Data. Curito ko disampaikan dek Datuak Rajo Pangulu nan baumua lapan puluah tigo kutiko itu. Curito ko disampaikan ka beliau Zuriati tapeknyo tanggal 20 Mei 2007. Kutiko tu Liau Datuak Rajo Pangulu bacurito. Liau wakatu itu manjadi ketua KAN Nagari Baringin. Curito ko disampiakan di rumah baliau di Madahiliang Baringin.

Baa bana curito mako nagari banamo Baringin, biko curito liau wakatu itu. Kutiko inyiak moyang kito dari Pariangan mampalaweh daerah pamukiman, karano panduduak samakin banyak juo. Mako pai lah niniak kito dan manetap di sabuah tampek. Di tampek bamukim itu, niniak moyang kito mambuek pamukiman baru, manaruko liau di siko. Mambukak sawah jo ladang nan baru. Mambuek rumah lah, niniak kito di dakek Batang baringin. Mako dibari namolah tampek niniak mambuek rumah tadi jo Baringin.

Dakek baringin tu, ado daerah pabukitan nan bantuaknyo bak cando Gombak atau jambul kato Indonesia nyo. Mako bukik nan bagombak tadi di bari namo Bukik Gombak. Di tampek lain, niniak kito ko, juo mambukak lahan nan banyak tadapek hamparan batu bak cando lantai, mako dibarilah namo tampek tu jo Lantai Batu.

Di sakitaran bukik gombak jo lantai batu tadapek lah sabuah kampuang nan banyak ditumbuahi dek batang Jati, mako di barilah namo tampek tadi jo namo Jati, karano banyak batang jati di situ. Samantaro dearah nan dijadikan kabun, salain sawah nan banyak tumbuah batang kayu jua (Cassia siamea), mako banamolah daerah tu jo Parak Jua.

Salain itu, niniak kito juo mancari daerah nan bisa dijadikan tampek mandi jo mancuci, mako ditamukanlah ciek tampek nan ado pincuran untuak ka mandi, pincuran nan ado di tampek tu indak ciek tapi tujuah banyak nyo, Mako daerah nan ado pincuran sabanyak tujuah buah tu dibari namo Pincuran Tujuah inggo kini.

Ado pulo kampuang nan di buek dek niniak kito ko nan talatak di suduik nagari, mako dinamo-i lah kampuang tu jo Kampuang Suduik. Kutiko Zaman Ulando (Belanda), dibbek ciek kampuang lai nan talatak di balakang kantua pajak nan dibuek Ulando kutiko itu. Mako sampai kini kampuang tu banamo Balakang Pajak. Tarakir sakali Kampuang Baru, mako banamo kampuang baru karano kampuang ko lah kampuang nan paliang baru dibuek dek niniak kito daulunyo.

Mak Datuak Rajo Pangulu kutiko tu manjalehkan kabakeh Zuriati, baso curito ko lah ditarimo liau, dari urang nan tuo-tuo dahulu. Salain itu, liau juo bacarito di kampuang ko ado Suku Koto Baranjak, Suku Singkuang, Suku Patapang, Suku Jambak, suku Mandahiliang, Suku Bodi jo Suku Sungai Napa. Bitulah curito nan batarimo mudah-mudahan manjadi amal dek nan bacurito jo mandanga. Manjadi pangatahuan dek nan mambaco. Kalau pun, ado salah jo gawanyo ka urang banyak ambo mohon kan maaf ka kabeh Tuhan Allah ambo mamintak ampun.

*Dosen Sastra Minangkabau