MANGUN

Mangun

Oleh: Hamza Afra Jonedi*

            Hujan paneh iolah hal nan dipicayoi cukuik aneh kalau di Minangkabau. Hujan paneh nan tajadi biasonyo manjadi patando dek urang Minangkabau nan ka tajadi bekonyo. Kadang-kadang ado nan mangiro hujan paneh tu iolah tando urang sadang jatuah balantak, ado pulo nan mampicayoi hujan paneh tu iolah tando kuciang sadang dimandian dek urang punyo-nyo.

            Ado sabuah nagari di Sumpur Kudus nan mambuek urang tacangang dek carito bahayonyo hujan paneh. Biasonyo, kalau lah sudah hujan paneh, pasti ado “Pelangi” nan ka tibo. Biasonyo Pelangi ko disabuik urang kampuang jo “Mangun.” Labiah tepeknyo mangun ko iolah pangka atau ujuang jak di pelangi nan nampak rancak tu.

            Pelangi tu tantunyo punyo pangka jo ujuang nan mambueknyo malangkuang di langik nan rancak tu. Pangka jo ujuang ko lah nan mambuek urang takuik katinyo ado di dakek kito.Karano di pangka jo ujuang pelangi tu, ado setan nan dipicayoi bisa mancucuik darah urang. Kalau lah kanai dek setan nan ado di mangun tu, nan sarupo kabuik bawarna-warni, beko bisa mambuek  wak gapuak indak elok, atau kalau lamo bana bisa jadi membuek wak maningga sakatiko. Biasonyo, kabuik mangun nan warna-warni tu babunyi sarupo garam nan dibaka. Acok pulo mangun ko mangaja urang, beko kalau lah takaja, kabuik tu kan mangaliliangan, katiko itulah awak bisa maningga atau gapuak indak elok dibuweknyo. Di situlah kapicayoan masyarakat lahia nan manyatokan mangun tu ado setannyo nan bisa mambuek  urang maningga karano darahnyo dicucuik atau gapuak indak elok.

            Di  Koto Gadang, lah pernah tajadi nan sarupo itu. Akibaiknyo, urang tu gapuak indak elok sampai nyo maningga. Tapi, kalau awak dikaja dek mangun tu, langsuang ajo lari ka tampek nan ado atoknyo. Karano mangun tu indak bisa mandakek ka tampek nan ado atoknyo, sarupo dangau sawah, dangau ladang, atau kandang kabau sakalian.

            Suatu katiko, ado urang Koto Gadang nan banamo Bujang Peto. Bujang Peto ko iolah patani nan ado di kampuang tu. Hampia satiok hari, kok lah sudahnyo manakiak, inyo pasti langsuang pai ka sawah, kacuali hari salasa karano dek hari mambangkik gatah. Dakek sawah nan indak talalu laweh bana tu, ado batang kayu gadang nan indak bisa ditabang pakai sinso urang kini. Karano umua kayu tu lah tabilang lamo bana untuak nyo hiduik. Acok disabuik jo Batang Situngkek dek urang kampuang.

            Jadi satiok hujan paneh di Batang Situngkek nan gadang tu, salalu ado mangun nan kalua. Jadi, kalau Bujang Peto tu sadang ka sawah, katiko hujan paneh, inyo pasti indak ka bakarajo sampai hujan tu taduah. Karano mangun nan acok kalua jak di Batang Situngkek tu, pernah pulo mangaja inyo sabalumnyo. Untuangnyo, Bujang Peto tu lai capek lari ka dangau sawahnyo. 

            Mujua nan sapanjang hari, malang nan sakijok mato. Katiko musim ka sawah tibo, Bujang Peto tu acok mancari urang untuak mambajak sawahnyo. Karano inyo indak ado punyo masin untuak mambajak sawah tu. Pas pulo katiko itu, urang nan didapeknyo tu, indak pernah pulo pai ka sawah Bujang Peto tu. Jadi, inyo indak tau kalau ado mangun di Batang Situngkek dakek sawah Bujang Peto tu.

            Hari nan siang hari, panuah dek angek jo paluah karajo. Itulah nan taraso dek tukang bajak peto nan acok di panggie joTamang Tujuah tu. Karano dek angek bana hari siang tu, minta dibalian aie dingin lah Tamang Tujuah, ka Bujang Peto. Karano hiduik lah ado jalannyo masiang-masing, pas pulo katiko itu Bujang Peto indak mambawok es batu. Jadi pulanglah Bujang Peto ka rumah pai manjapuik es batu tu. Lupo lah dek Peto manyampaian pasan kalau ado mangun di Batang Situngkek tu.

            “Indak usah banyak-banyak bana es batu tu Peto, bawok ajo sagalo nan ado” Kecek Tamang Tujuah sambia bagarah.

            “Hahahahaha, kalau angku lah hawih bana, baranti kajo dulu sampai ambo tibo beko” Jawek Peto.

            “Jadi, jadi. Beko sabanta lai lah. Sudahan bana sawah  nan salupak ketek ko dulu. Pai manjapuik es batu tu kan lai dak lamo bana Peto do kan” Jawek sarato tanyo jak di Tamang Tujuah.

            “Indak ka lamo gei do. Kayaknyo sabanta lai urang sambahyang luhua lo lai mah. Sasudah luhua ambo kasiko beko liak. Sambahyang beko ciek dulu” Jawek Bujang Peto.

            Pulang lah Peto ka rumahnyo pai manjapuik es batu tu. Hari nan sabana angek tadi tantunyo mambuek  siapopun capek latiah katiko bakarajo. Tapi indak untuak Tamang Tujuah. Karano sawah salupak ketek tu alun salasai, pantang pulo baranti rasonyo dek Tamang Tujuah.  Karano, dek Tamang Tujuah karajo tu indak elok tagantuang-gantuang. Jadi, ditaruihan lah dek Tamang Tujuah karajo tu.

            Siang hari nan angek tu, dilaguan pulo dek bunyi masin bajak Tamang Tujuah. Mambuek  sawah nan tadinyo indak “bakilek” kini lah jadi bakilek bak kato urang di situ. Tapek sawah tu tingga tigo kaliliang bajak lai, malasau lah hujan jak di puncak bukik imak-imak, taruih ka bukik batu palampeh. Malaweh ka Batu janjang mandakek ka sawah Peto. Tapi Tamang Tujuah indak juo baranti. Karano, salamo Tamang Tujuah ko jadi tukang bajak, karajo sambia hujan-hujan tu indak bapangaruah dek inyo do. Labek lah hujan siang tu, nan disabuik hujan paneh. Hujan labek nan bacakak jo cahayo matohari mambuek  badan angek tadi takajuik sakutiko bagi nan indak tabiaso. Tapi indak untuak Tamang Tujuah.

            Di sikolah mulai malang nan sakijok mato, tapi masih mujua sapanjang hari. Pas di tangah hujan labek tu, peto samakin capek bakarajo. Katiko itu pulo lah, Si Mangun kalua jak di rumahnyo nan di Batang Situngkek tu. Mambuek  bunyi sarupo garam dibaka. Sawah nan dikarajoan dek Tamang Tujuah tu, indak pulo jauah jak di Batang Situngkek tu. Kanailah Tamang Tujuah dek Mangun katiko itu. Bunyi masin bajak nan kareh tu, manghilangan bunyi garam dibaka jak di Mangun nantun. Sampailah kabuik bawarna warni tu mengalilian peto nan sambia bakarajo.

            Katiko itulah Tamang Tujuah mulai payah marongok dibuweknyo. Dek kabuik nan samakin taba jo samakin rapek ka badan Tamang Tujuah, takana lah dek Tamang Tujuah itu iolah mangun.  Balarilah Tamang Tujuah ka dangau sawah peto nan bajarak 45 meter kurang labiah jak di tampeknyo karajo. Pas balari tu, ongok Tamang Tujuah samakin sasak, kuliknyo jadi putiah pucek, kakinyo barek dek tanggalam di luluak sawah. Tapi, Tamang Tujuah untuang dek lai tamasuak urang nan kareh dek bakarajo. Kalualah inyo jak di Sawah tu, barulah bisa agak kancang larinyo katiko maniti pamatang sawah. Sampailah inyo di dangau sawah peto.

            Katiko Tamang Tujuah sampai di dangau sawah tu, badannyo mandingin sajadi-jadinyo, matonyo merah, kuliknyo putiah pecek sarato bangkak-bangkak. Pingsanlah Tamang Tujuah katiko itu juo. Sasudah kajadian itu, Tamang Tujuah badannyo lah gapuak dek bangkak-bangkak dek mangun tu, badannyo lamah indak kuwek sarupo dulu. Salero makannyo kian mangurang dari hari ka hari samanjak dapek di Mangun tu. Sampai kudiannyo, Tamang Tujuah maningga dek keadaan sarupo itu.

*Mahasiswa Sastra Minangkabau Unand