LABUAH SAMPIK

HOME LANGKAN CARITO


  • Selasa, 18 Februari 2020
LABUAH SAMPIK
Carito

LABUAH SAMPIK

Oleh: Hamza Afra Jonedi*

 

Ado nagari ketek di daerah Sumpur kudus, acok disabuik jo daerah Palo Koto. Banyak tadapek pakubuan suku Malayu di dakeknyo, dakek itu pulolah ado jalan ketek antaro duo paga rumah urang. Jalan ketek ko lah nan acok disabuik dek urang kampuang jo Labuah Sampik.

Labuah Sampik nan ado di daerah Palo Koto tu, lataknyo tapek di ilia rumah Mande Jari’ah. Di mudiaknyo rumah Mande Nubaya. Labuah sampik tu, hanyo diinjak dek tukang kubalo kabau, kok indak, amak-amak nan sadang mancari kayu untuak ka dapuanyo beko. Kalau siang labuah tu, lai sarupo jalan biaso. Tapi, iyo indak ba aspal mode jalan di kota Padang. Gadang labuah sampik tu hanyolah saratuih limo puluah sentimeter. Kurang labiah. Panjangnyo, sapanjang paga sampiang rumah Mande Jari’ah.

Labuah sampik nan indak bisa kalaluan honda dek jalannyo tanah kariang kareh bacilubuak di musim paneh, licin balunau katiko hujan, mambuweknyo jadi jalan nan tabilang jarang ditampuah urang. Tapi, ado kapicayoan aneh masyarakat di daerah Palo Koto tu, kalau ado labuah sampik, jan sakali-kali singajo untuak ditutuik. Karano urang disitu picayo, Labuah sampiak tu iolah jalan untuak Urang Tenggi. Kalau jalan Urang Tenggi tu ditutuik, beko, urang-urang nan ado di dakek jalan tu, bisa-bisa kanai panyakik, bisa tasapo, bisa mimpi-mimpi buruak, bisa pulo mancaliak makhluak aneh nan acok disabuik urang sarupo Hantu.

Kalau dijalehan sarupo itu, pasti indak talalu mayakinkan kito. Tapi, iko asal carito jak di Mande Jari’ah. Buliah kito picayo, buliah pulo indak. Nan jaleh, urang kampuang, apolai urang nan lah marasoan, tantu labiah tau jo labiah picayo.

Samanjak mande Jari’ah ketek, samanjak inyo tingga di rumahnyo nan dakek Labuah Sampik tu, urang gaeknyo bapasan, “Jari’ah,. Isuak, sampai bilo-bilo gei, jan sakali-kali manutuik Labuah Sampik nan ado di iliah rumah kito ko!”

“Ba a dek indak buliah, Pak?”

“Pokoknyo indak buliah, Jan sakali-kali maambek jalan Urang Tenggi”

“Apo Urang Tenggi tu, Pak?”

“Iyooo urang tenggi. Badannyo satinggi pucuak karambia, rambuiknyo sapanjang tali baruak, baju putiah, baunyo sarupo buah Torok”.

“Inyo urang atau apo di, Pak?”

“Namonyo nan Urang Tenggi. Inyo tu Hantu nan bajalan sakali sasudah acara Bakawuah di tampek kito. Jadi jan sakli-kali manutuik Labuah Sampik tu. Kok matipun kami isuak, jan sakli-kali ditutuik. Lai ngaroti?”.

“Lai, Pak”

Satangah tahun samanjak apak Mande Jari’ah mangecek mode itu, Tuhan lah mamanggienyo untuak pulang salamo-lamonyo. Urang kampuang ngecek “Inyolah dulu”. Sabalunnyo, mande Nubaya, alun ado tingga di ilia rumah Mande Jari’ah tu. Satahun sasudah apak Jari’ah maningga, Nubaya tibo, lalu tingga di ilia Rumah Jari’ah. Inyo mambuwek rumah ketek untuak tingga jo lakinyo, sarato duo anak padusinyo.

Dek Nubaya ko indaklah urang asli Palo Koto, jadi Nubaya indak tau pulo samo Labuah Sampik nan ado di mudiak rumah nyo tu. Katiko indak tau tu lah, pantangan balangga, kok sarupo janji lah baungkie. Nubaya indak pulo batanyo ka Jari’ah. Jari’ah indak pulo ma agie tau ka Nubaya. Ditutuiklah Labuah Sampik tu dek Nubaya, supayo parak rumanyo bisa batambah laweh.Paganyo kini jadi ciek jo Paga Mande Jari’ah. Katiko jalan tu ditutuik, Mande Jari’ah indak pulo ado di rumah karano pai ka Tamparungo baralek dunsanak kanduangnyo.

Saminggu lai lah balalu, lai indak tajadi apo-apo. Siang tu, nampaklah dek mande Jari’ah, Labuah Sampik pasan apaknyo dulu kini lah batutuik. Pantangan lah balangga. Pagi bisuaknyo, pai lah mande Jari’ah ka rumah Mande Nubaya untuak manyabuikan pantangan apak nyo katiko dulu tu.

“Nubaya, ba a dek batutuik Labuah Sampik tu?” Tanyo Nubaya

“Nyo bakpo tu Jari’ah? Kan lai ndak ba a do kan?” Baleh Nubaya

“Iyoooo. Apak aden dulu, malarang manutuik Labuah Sampik tu. Masalahnyo, labuah tu jalan bake Urang Tenggi”

“Kalau ditutuik, ado baleh buruak ka awak tu?” Tanyo Nubaya.

“Kecek apak aden dulu iyo. Beko kok kanai kau dibuweknyo”.

“Lah sapakan lo lamo ma ‘Ah. Lai indak do ba a den dek e do!”

“Kini kok indak, bisuak tu kok iyo? Manyasa kau beko!”

“Indak raso den ‘Ah. Isuak kok iyo, mak aden bukaan di laki den isuak”

Lah duo pakan, tigo pakan, sampai sabulan. Lai indak tajadi apo-apo do samo Nubaya, sampailah musim padi, sampai tigo bulan hinggo padi tu disabik. Nan Nubaya lai masih sehat-sehat sajo. Kini masuaklah musim bakawuah, wakatu basyukur ateh padi nan di dapek. Urang-urang rami bajalan, anak-anak mamakai baju rayo, tampek Pakawuan lah sarupo balai dalam sahari tu. Tamasauk Jari’ah jo Nubaya di dalamnyo. Acara syukuran tu salasai dalam sahari, patang hari, Nubaya pulang ka rumahnyo. Baitu pulo jo Jari’ah.

Kini tibolah masonyo Urang Tenggi nondak lalu, jan sampai jalannyo ditutuik urang. Kini, Labuah Sampik di Palo Koto lah bahilangkan, lah batutuik. Malam tu, Laki Nubaya mimpi buruak bahwasanyo inyo dicakiak dek tangan nan sangek dingin jak dibalakang. Cakiak tu samakin kareh, samakin kareh, Laki Nubaya indak bisa marongok. Untuang lah malam tu, Nubaya tajago dek galonjang lakinyo nan sadang mimpi buruak. Di jagoanlah dek Nubaya lakinyo nan lah hampia mati dek mimpi tu. Alhamdulillah lakinyo tajago, tu nyo caritoan pasal mimpi buruak tu ka Nubaya.

Dek baru sakali mimpi buruak, Nubaya jo lakinyo indak talalu mamikikannyo. tigo hari sasudah itu, Nubaya mandamam sarupo urang tasapo. Saminggu lamonyo. Nan Nubaya indak juo mambukak Labuah Sampik tu. Duo hari sasudah Nubaya cegak, anaknyo kanai-kanai kada. Lamo mangkonyo cegak, hinggo taulah soboknyo dek apo. Dukun ngecek, anak Nubaya kanai baleh dek Labuah Sampik nan batutuik tu. Mangko dibukalah baliak Labuah Sampik nan tu, limo hari sasudah itu, anak Nubaya cegak lah baliak.

 

*Mahasiswa Sastra Minangkabau Unand


Wartawan : HAMZA AFRA JONEIDI
Editor : bahren

Tag :# Langkan # curito #minang  

SASAMPIK-SAMPIK BALAI ANAK RAJO LALU JUO
MADA
Maminteh ka ulu, mangaja ka balakang
Maminteh ka ulu, mangaja ka balakang
PITUAH KUCIANG II
PITUAH KUCIANG I
PADUSI ALANG-ALANG
TUO ADAIK
PADUSI LAWAH-LAWAH