HOME OPINI CELOTEH

  • Jumat, 10 April 2020
Covid-19 dan Rumah Gadang Tak Badindiang
TE Radjo Boedjang

Covid-19 dan Rumah Gadang Tak Badindiang

 

Kiro-kiro anam bulan lalu, dari diskusi di palanta jo baliau-baliau nan pakek darah Minangkabau, tibo-tibo kalua titah; Rumah Gadang Tak Badindiang.

Ampek bulan sasudahnyo, tibo kaba; Wuhan-Tiongkok dialah Corona--labieh lo daripadao nagari dialah garudo! Covid-19 urang namokan. 

Di pakan partamo bulan kapatang, WHO pun manyabuik wabah tu jadi pandemi. Lah saalam lebanyo dunia dipageh Corona. 

Hari-hari ka balakang, dan ka muko (antah pabilo kasudahnyo), kito pun disuruah di rumah sajo. Diam di rumah. Dak buliah baragak kian kamari. Jan malala juo!

Dunia pun barubah sakatiko. Covid-19 marevolusi jo caro yang dak pernah kito bayangkan. 

Bakarajo dari rumah. Sakola dari rumah. Sadonyo labieh banyak dikarajoan dari rumah. 

Musajik langang karano dilarang bajamaah. Baralek dak bulieh. Bahkan katiko akad nikah, kok bisa dak basalam. Cukuik basalam sacaro bathin sajo. Labieh afdhal, mungkin. 

Dak bulieh dakek-dakek. Jago jarak, sameter paliang kurang. Kok bisa satu satangah meter atau duo meter lah. 

Sapakan nan lalu, WHO pun manyorak an; Corona ko bisa iduik lapan jam di udaro. Masker nan ka jaweknyo. Tutuik muncuang tun. Jan maota juo. Aniang pageh dek Covid-19!

Jaleh, iko adolah kandak Alam--kandak Tuhan Nan Kuaso--untuak maubah zaman. Dulu nenek moyang nan mancancang malapah manaruko taratak, iduik di zaman batu. Sudah tu Rumah Gadang dibuek dari kayu. Kini zaman baubah dari zaman kayu ka zaman batu! Rumah Gadang ado nan dibuek dari batu. Tapi lah banyak Rumah Gaduang dari Rumah Gadang. 

Kandak Tuhan kah, jikok kini kito sadang baranjak ka zaman Rumah Gadang Tak Badindiang? 

Nan jaleh, Covid-19 dak ka talok mamutuih tali badunsanak. Dak ka mangkuih mamutuih tali adaik jo tali ameh. Apo lai maurak tali darah jo tali budi. 

Jadi, satantangan pakaro Covud-19, kok gabak di ulu tando ka ujan, cewang di langik tando ka paneh, sacaro bathin kito basuo. Badan kok iyo bajauhan, dunsanak di rantau tak usah pulang, nan bathin lai saliang manyapo. 

Kalaluan nyo bana, teknologi kini bisa mampadakek urang nan jauah. Bakucindan lah di Zoom, Skype atau video call di WA. Labieh dari cilalek dunsanak di ujuang dunia tu, bisa tampak. Kunun kok lai pakaro segeh jo galak manih, lah baiek tarupo dek maju teknologi. Itu lah Rumah Gadang Tak Badindiang. 

Satiok datiek satiok minik, kito bisa online jo anak kamanakan dan dunsanak. Pakaro hape jo pulsa atau wifi balangganan sajo nan kadiusaokan. Kito pun dak paralu kamano-mano, tapi bisa ado di mano-mano. 

Nah, Covid-19 lah marevolusi caro kito manjalin tali badunsanak. Mamak punyo wakatu nan banyak untuak maurus kamanakan, sambie maurus anak-bini di ateh rumah. Pangulu punyo banyak wakatu untuk maurus kaum, karib kerabat. 

Daripado gilo mamikie an pabilo Covid-19 ko bakirok jauah, rancak lah batanang di rumah; sambie maurus anak-bini, jalang lah dunsanak, tanyolah kamanakan, dari jauah malalui hape. 

Gak sakali sahari, sasudah mugarik, agah lah cucu jo videocall. Baraa lah ka nikmatnyo, dak paralu mambali tiket, dak paralu maasiangan hari, nan dunsanak ta sapo juo. Nan Corona ka pai juo, karano kito mamutuih mato rantai iduiknyo!

(TE Radjo Boedjang, Pemimpin Redaksi Minangsatu, Wartawan Utama)


Tag :#covid19 #rumahgadangtakbadindiang #celoteh