CAPEK KAKI RINGAN TANGAN

Capek Kaki Ringan Tangan

Oleh: Bahren*

Sore ko Si Alan lah datang pulo manjingau rumah Mamak e. Gayuang basambuik, mamak e sadang indak pulo pai ka sawah, dek alah saminggu labiah ujan indak turun, sainggo alah abih kariang tanah sawah tu kini. Limbak nan dari pado itu, kabuik asok sajak duo bulan nan lampau ko mambuek urang banyak nan anggan turun ka sawah jo ka ladang.

Ka pambukak kato, bacurito lah Si Alan tadi tantang Si Syukur anak Malin di kampuang subarang, nan lah subana coga sarato barasil di usaho e kiniko. Dari curito si Alan ka Mak Anan, Si Syukur kini lah kayo rayo. Tiok usaho nan dibukak manjadi. Tiok karajo nan dikakok e manjadi. Bitu bana cideh e Si Syukur kini ko Mak. Sambia maangguak-angguak kaciak bakato lah Mak Anan ka Si Alan. Alhamdulillah… manjadi juo Si Syukur ko. Dari kaciak lah tampak anak ko ka manjadi urang. Si Syukur ko sangaik capek kaki ringan tangan anak e. Bitu nampak di Den sajak ketek e. Capek kaki ringan tangan baa lo tu Mak.  A pulo makasuik e tu Mak?  Bukan nyo urang nan capek kaki tu ancak e untuak manjadi atlit olah raga, kancang lari e Mak. Kok nan ringan tangan ko indak cocok ka jadi laki atau ka dipabini? Karano tangan e ringan, mudah sajo malakek an tangan e ka anak jo bini e.      

Iyo… kok mamangan tu diaratian ka nan buruak, mako buruak lah jadi e. Tapi dek urang awak ko suko bakieh jo ba ibaraik mako mamangan adaik tu indak buliah diaratikan ka nan buruak do Lan. Mako dari mamangan itu bisa di maknai  jo diaratian co iko Lan. Capek kaki ko biaso diaratikan dek urang awak Minangkabau ko untuak urang nan panamuah di suruah jo di sarayo. Urang nan capek kaki ko biasonyo indak mamantang samo apo sajo karajo nan diagiahkan ka inyo. Salagi inyo bisa mangarajokannyo mako inyo akan sugiro mangarajoannyo.  Sarupo nan di karajoan dek Si Syukur tu wakatu kaciak dulu. Inyo anak nan sangaik panamuah, indak mamantang apo sajo nan disuruah ka inyo. Sainggo Si Syukur ko acok di suruah jo di sarayo dek urang-urang di kampuang subarang tu. Jadi kalau kiniko inyo lah santiang sarato sukses lah dimulai e sajak kaciak.

            Tu, kalau ringin tangan tu baa lo arati e Mak? Kato Si Alan, manyemba surah mamak e tadi. Ringaan tangan ko kalau diaratikan sarupo nan Ang katoan tadi memang aratie jadi indak elok. Ringan tangan diaratikan urang nan suku manangani bini atau anak jo keluarganyo. Tapi, kumbali kito ka sipaik urang awak nan biaso bakieh jo baibaraik. Mamangan tu harus diaratikan sacaro baibaraik pulo. Ringan tangan ko dalam adaik jo kabiasoan urang awak ko diaratian untuak urang nan suko babagi jo manolong. Urang nan ringan tangan ko, indak bisa mancaliak urang susah, indak bisa mancaliak urang dalam masalah. Urang-urang nan ringan tangan ko capek sarato arif samo keadaan di sakitar nyo. Indak sagan-sagan urang nan ringan tangan ko untuak mambatu sasuai jo kadar dan kamampuannyo. Jadi… Si Syukur tu kiniko tingga manuai a nan di tanam e sajo lai nyo Lan. Karano sajak kaciek nyo lah tabiaso capek kaki ringan tangan mako kini a sajo nan liau pabuek jo liau usahoan manjadi.

            Makoyo… indak salah pulo urang tuo-tuo kito nan daulu ko maagiah ibaraik jo mamangan. Khususnyo capek kaki ringan tangan ko. Salain itu ado pulo mamangan lain nan saruo jo mamangan tadi. Mamangan nyo kiro-kiro bunyi e takah ko A nan di tanam itu nan di tuai. Baik di tanam mamo baiak lah nan dituai. Ooooo. Kok nan iko apolo aratie  tu Mak? Kok nan iko, bilo ang kamari sakali lai lah Lan. Bia mamak surah jo curaikan pulo tantang mamangan itu.

*( Dosen Jurusan Sastra Minangkabau FIB Unand)