Mamilah Atah Jo Bareh

Pepatah Minang manyuruah awak pandai mamilah, maa nan atah - maa nan bareh.
Iko karajo rutin atau nan bisa basuo tiok hari dek umaik. Atah untuak dibuang, bareh untuak dimasak. Sudah tu dimasak, jadi nasinyo. Sudah tu dimakan, sehat badan jo batanago awak.

Tapi baa mangko di jaman kini urang labiah suko jo atah, nan jaleh bana ndak paguno. Kok banyak takumpua atah, kasudahannyo cuma untuak dibaka, co sarok.

Bitu bana perumpanaan nan basuo dek kito dalam keseharian. Sarok tu bana nan baserak di grup-grup WA (WhatsApp) di hape awak. Banyak video, foto jo carito-carito tak baguno nan babega. Dari satu grup, tabang malayang pulo ka grup nan ciek lai. Isinyo itu juo baru, sarupo bana barangnyo.

Apolah nan tajadi di umaik kini ko.?

Apo dek sadang candu mamacik 'hape cadiak' (istilahnyo, smart phone), atau dek ndak mangarati baso barang nan diserakan di grup-grup WA tu barang tak baguno, samo jo atah. Nan jaleh jatah paket capek habih, sudah tu bali paket baliak. Kok lai manumpang di wifi punyo urang lain, amanlah. Tapi kok pakai paket surang, pitih juo nan ka kaluanyo.

Ado nan maagiah resep dalam mamainkan hape cadiak ko. Bilo awak manarimo pasan, tanyo dulu ka hati jo pikiran. Kan lah ado pepatah urang tuo kita, raso dibao naiak - pareso dibao turun. Diinok-manuangkan agak sajawak, sabanta.

Sabalun mangirim bahan ka grup-grup WA, dikaji dulu isinyo :
1. Apo info, foto, video nan masuak ko lai sabana batua, bukan editing (nan lah dikarek-karek).?
2. Kalau iyo batua, tanyo juo ciek lai. Apokoh lai paguno dek urang banyak.?
3. Tambah pertanyaan ciek lai, iko babannyo bara mega di hape. Kalau banyak mamakan tampek, ndak usah.
4. Kalau awak ndak mangarati isinyo, ndak usah dibagi juo.
5. Bilo nomor satu sampai ampek ndak masuak, elok info, foto atau video nan awak tarimo tu dihapuih sajo.

Kan ndak sulik mamilah nan atah jo bareh do. Kalau awak lain batanang-tanang mambaco isi di grup-grup WA tu, mungkin ndak banyak nan sabana boneh isinyo. Saketek sajo nan barehnyo. Nan banyak tu, yo atah sansai sajo.


(Batuah)