TRADISI MAKAN BAJAMBA

TRADISI MAKAN BAJAMBA

Oleh:

RONA ALMOS

Makan bajamba marupokan salah satu tradisi di Minangkabau. Tradisi makan bajamba atau ado juo yang manyabuiknyo jo makan barapak barasa dari Koto Gadang Agam, Sumatera Barat sajak abaik ka-7. Saring wakatu jo perekembangannyo tradisi makan bajamba ko manyebar dikalangan masyarakaik Minangkabau.

Biasony makan bajamba ko dilakukan diacara adaik, baralek, khatam Al-Quran dan lain-lain. Dalam tradisi makan bajamba ko, urang-urang nan talibaik didalamnyo akan marasoan raso kebersamaan.

Tradisi makan bajamba dilakukan oleh masyarakaik Minangkabau dalam ruangan. Dikuti dek banyak urang. Urang nan ado dalam ruangaan tu akan duduak dilantai sacaro bakalompok. Ciek kalompok biasonyo terdiri dari 5 s.d 7 urang nan duduk sacaro malingka. Posisi duduaknyo harus tagok luruih dan indak buliah mambungkuak. Duduaknyopun dipisahkan antaro laki-laki jo padusi.  Kamudian nan padusi duduak basimpuah samantaro nan laki-laki duduak baselo.

Disatiok kelompok nan duduak sacaro malingka tadi ado piriang gadang nan mampunyoi diameter kurang labiah 50 cm. Piriang gadang ko biasonyo disabuik jo pinggan. Dalam pinggan alah ado nasi dan macam-macam samba di tangahnyo.

Di Nagari Salo, Kecamatan Baso diacara baralek disatiok kalompok makan bajamba tadi akan ado tuan rumah nan akan mangawani tamu makan. Sudah nasi dalam jamba diidangkan ditangah kalompok, tuan rumah akan manambahkan samba ditangah nasi tadi. Sasudah tu baru tuan rumah mampasilahkan tamu untuak makan.

Katiko makan nasi nan buliah disuok anyolah nasi nan tapek barado dimuko awak. Indak buliah maambiak nasi kasampiang ataupun nasi jo nan ado dimuko kawan. Bagitu pulo wakatu maambiak samba. Samba nan diambiak anyolah samba nan ado dimuko awak. Disaat maambiak samba, samba tadi indak biliah digigik. Hanyo buliah dipipia atau dipatahkan. Salain itu adap nan paralu diparatian dalam tradisi makan bajamba ko iolah awak nan mudo indak buliah mandaului urang nan labiah tuo.

Nan paliang unik dalam tradisi makan bajamba ko iolah katiko manyuokan nasi. Caronyo iyolah nasi nan alah ditambahan jo samba, dibaean ka dalam muncuang jo tangan suok. Kamudian tangan kida siap-siap barado di bawah tangan suok tadi untuak manyambuaik nasi nan jatuah atau pun nan tacicia dan indak masuak ka dalam pinggan. Sainggo nan lain indak maraso jajok untuak mamakan nasi nan ado dalam pinggan. Sasudah tu nasi nan disambuaik ditangan kida tadi dipindahkan ka tangan suok dan lansuang dibaean ka dalam muncuang.  Kalau alah sudah makan, nasi nan ado dalam pinggan arus abis sadonyo indak buliah ado nan tasiso. Pado saat mambasuah tangan pun, kito arus manduluan nan labiah tuo daulu. Kalua nan tuo alah sudah mambasuh tangan barulah nan mudo maikutinyo.