Sumando Di Minangkabau

Sumando adolah laki (suami) dari dunsanak padusi (perempuan). 

Di Minangkabau, sumando ibaraik abu di ateh tunggue. Nasibnyo tagantuang baa kurenah inyo di rumah urang. Kok lai elok laku, jadilah inyo "Sumando Niniek Mamak". 

Kok nan jayie, banyak pulo. Antaro lain, "Sumando Kacang Miang", "Sumando Langau Ijau", dan "Sumando Lapiek Buruak".

Kok "Sumando Kacang Miang", iyo mamacah balah di korong urang. Namonto sajo miang, gata-gata urang dibueknyo. Ciek nyo mangecek, lansuang jadi virus nan mambuek gata-gata urang sakuliliang.

Ati-ati jo tipe sumando sarupo iko. Muluiknyo manih, kucindan murah. Batanam tabu di bibie. Tapi saiknyo aluih, ujuangnyo maadu, mamacah balah!

Langau Ijau (lalat hijau)  adolah sejenis serangga. Namonyo langau, acok inggok di nan busuak. Baputa-puta se di ateh nan buruak. Sudah tu nyo inggok di ateh nan barasieh. 

Baa kiro-kiro nan barasieh dicampue dek nan kumuah? Satitiek nan kumuah, rusak nan barasieh kasadonyo. Dek nila satitiek, rusak santan sabalango!

Itulah ibaraiknyo. Kok ado sumando nan sarupo iko, itulah kurenah langau ijau. 

Bukan dibuek-buek sajo parumpamaan iko. Sacaro turun tamurun dicuritokan dek mamak ka kamanakan nan mintak izin ka babini.

Sang mamak manunjuak ajari kamanakannyo pakaro taratik di rumah urang (di rumah bini). Bausaolah jadi "Sumando Niniek Mamak", jaan sampai sarupo langau ijau.

(basambuang)