HOME LANGKAN KATO

  • Sabtu, 24 Oktober 2020
Sataun Jokowi-Makruf; Dari Pandemi, Lompatan Gadang dan Demo
Unjuk rasa mewarnai setahun pemerintahan Jokowi-Makruf

Sataun Jokowi-Makruf; Dari Pandemi, Lompatan Gadang dan Demo

Oleh TE Radjo Boedjang

Duopuluah Oktober 2020 ko, ganok sataun Jokowi-Makruf manjadi nangkodoh Indonesia. Banyak nan lah dibuek, di tangah ujian barek dari pandemi Covid-19. 

Apo nan lah dilakukan sataun tu? Tantu sajo lah banyak. Sarupo dicuraikan dalam Laporan Tahunan 2020, nan disusun dek Staf Kepresidenan babarapo hari lalu, walau ado bacarito tantang kamajuan dalam arti kinerja pemerintah mangarajoan aspek kepemerintahan umum, melakukan pelayanan publik, manyadiokan infrastruktur dasar dan menyejahterakan rakyat, tapi labieh saparo dari laporan sabanyak 75 halaman, nan ditulih jo Power Poin itu bacarito tantang pandemi. Covid-19.

Kito bisa maklum, karano sajak dideteksi di awal Maret 2020, manuruik data resmi laman www.covid19.go.id--keadaan Rabu (21/10)--lah 373.109 urang nan terkonfirmasi positif. Sabanyak 62.743 kasus aktif, 297.509 (79,7 persen) nan lah cegak, dan 12.857 urang (3,4 persen dari terkonfirmasi) maningga. Adopun urang yang dicurigai (suspek) covif-19, dari laman yang samo, sabanyak 162.216 urang. 

Ibukota, Jakarta, adolah daerah nan paliang parah, dengan 97.217 kasus terkonfirmasi positif covid-19. Urang terkonfirmasi positif covid-19 di DKI Jakarta ko labieh dari saparampek total nasional. Tapeknyo 26,1 persen!

Diikuik dek Jatim sabanyak 49.801 (13,3 persen). Baturuik-turuik, nomor tigo sampai sapuluah kasus terkonfirmasi positif covid-19 di Indonesia adolah Jabar (31.907, atau 8,6 persen), Jateng (30.218, atau 8,1 persen), Sulsel (17.690, atau 4,7 persen), Riau (12.319, atau 3,3 persen), Kaltim (12.221, atau 3,3 persen), Sumut (12.212, atau 3,3 persen), Sumbar (11.652, atau 3,1 persen), dan Kalsel (11.508, atau 3,1 persen). 

Tigo provinsi nan paliang saketek kasus terkonfirmasi positif covid-19 adolah Kalimantan Utara (735, atau 0,2 persen), NTT (605, atau 0,2 persen). Dan nomor 34, atau provinsi nan paliang saketek kanai covid-19 adolah Babel. Di Provinsi Kepulauan Bangka Belitung ko hanyo 538 urang nan kanai. Atau 0,1 persen dari total terkonfirmasi positif covid-19 sacaro nasional.

Kok dibandiangan jo jumlah penduduk Indonesia--misalnya seperti dilansir Kompas.com pada 12 Agustus 2020--pada bulan Juni 2020 sebanyak 268.583.016 jiwa, mako hanyo 0,138 persen total rakyat Indonesia kanai korona. Sangat saketek untuak ditakuik-i sacaro balabiehan.

Sacaro global, Indonesia--manuruik Laporan Tahunan 2020 tu--barado di peringkat 19 dari 193 negara di dunia yang jadi anggota PBB. Nomor satu paliang banyak kanai koronan adolah Amerika Serikat (8.387.790). Diikuik-i dek India (7.547.762) dan Brazil (5.235.344). Samantaro Tiongkok, tampek virus partamo basuo, kini barado di nomor 43. Hebat yo?

Sungguahpun prosentase covid-19 di Indonesia sangaik saketek dibandiang jumlah total penduduk Indonesia, tapi pemerintah sangaik serius mamarangi korona ko! 

Kecek Presiden Jokowi dalam Pidato Kenegaraan, 14 Agustus 2020,“Jangan biarkan krisis membuahkan kemunduran. Krisis ini harus kita manfaatkan sebagai momentum untuk melakukan lompatan besar.”

Aratinyo, Jokowi nyio mamakai momentum pandemi ko untuak malompek maju! Baa caronyo? Samantaro nan gas ditakan, rem dipijak juo!

Kok disimak labieh dalam dari laporan nan ditandotangani Ka Staf Kepresidenan, Jenderal (Purn) Moeldoko, "lompatan besar" nan dimukasuik Jokowi--mungkin--antaro lain adolah pakaro refocusing anggaran negara, sahinggo ado pitih sabanyak Rp 695,2 Triliun untuak parang malawan korona!

Lompatan gadang lainnyo, babarapo aturan dibuek untuak ka sanjato mamarangi covid-19. Mulai dari mambuek Gugus Tugas Penanganan Covid-19, PSBB, penetapan status kedaruratan kesehatan dan Perppu Kebijakan Keuangan untuk Covid-19, sarato babarapo beleid lainnyo. Intinyo, pemerintah malakukan lompatan gadang untuak parang jo korona!

Iyo kok baitu du? Nan jaleh, karano korona ekonomi suruik. Pemerintah pun mambuek 12 program untuak mambuek dapua rakyat tatek barasok. Sabanyak 5,3 juta pengusaha kecil dan menengah dapek pinjaman modal. Ado Rp 100 Triliun pitih untuak bantuan modal tu. 

Ado pulo pitih untuak subsidi listrik, Bantuan Langsung Tunai (BLT), dll. Pokoknyo pemerintah lah malompek gadang, apo juo lai?!

Sungguahpun nan dikecek an malompek itu harus ditiliek labieh dalam, nan jaleh ado babarapo demo manandoi sataun Jokowi-Makruf di berbagai kota. Ribuan mahasiswa jo buruh manolak UU Ciptaker.

UU Ciptaker nan dibuek bagageh tu, apokah tamasuak lompatan gadang pulo? Mungkin paralu ditanyoan ka mahasiswa jo buruh tu. 

Atau labieh rancak kito anok-anok se lah. Sarupo covid-19 nan anok-anok manggiriek karongkongan!


Wartawan : TE Radjo Boedjang
Editor : sc.astra

Tag :#SetahunJokowiMakruf