HOME LANGKAN KATO

  • Jumat, 16 April 2021
PUASO DAN KESEHATAN
Carito

PUASO DAN KESEHATAN

OLEH: BAHREN*

 

            Kaji dari buya tadi malam yo sabana sero dan rancak untuak didanga jo dikarajokan dalam kasaharian kito tarutamo di bulan sabulan kini ko, bulan puaso. Kaji nan biasonyo kalau di minggu minguu paratamo bulan puaso ko indak jauah dari  anjuran bapuaso sarato sia sajo nan dianjurkan untuak bapuaso. Tapi malam tadi buya manyurah parakaro puaso jo kesehatan.

            Indak lamo sasudah mambukak kato jo salam sarato sambah kapado tuhan Allah, sarato basalawat ka Nabi kito Muhammad. Buya pun mamulio kaji sijarah nabi nan tajadi sakitaran tahun 642M. Maso kutiko itulah awa mulo islam dikambangkan sacarao labiah diplomatis. Nabi mulai bakiriim surek untuak rajo-raji sarato sultan-sultan nan ado di sakitaran Makkah jo Madinah. Mako wakatu itu, dibalehlah surek nabi dek rajo Mesir, sarao mangirimkan babagai macam hadiah untuak nabi tandonyo bakawan, dalam hadiah nan dikirim rajo tu sarato pulo surang tabib diutus untuak mangawani nabi dalam badakwah.

            Singkek curito, abih ari babilang minggu, abih minggu baganti bulan. Bulan pai tahun baganti. Tabib nan dikirim dek rajo Mesir ko nyaris indak ado karajo nan dikarajokannyo. Salamo liau bajalan kian kamari jo nabi ko, nan nabi ko indak pernah mangaluah sakik, jan kan ka sakik panek-panek sajo bia bisa untuak di uruik-uruik indak doh parnah. Dek mancaliak nan bak kian, mako batanyo lah tabib ka Nabi kito Muhammad baa kok bisa Baliau bisa sihaik sajo dalam kasahariannyo. Dangan singkek wakatu itu manuruiik sijarahnyo nabi bakato jikok nak sihak dan indak sakik mako “Puaso lah angkau mako angkau akan sihaik”

            Baa kok puaso bisa mambuek urang sihaik, tanyato sasudah sakian ratuih tahun balalu sajak nabi manyuruah kito puaso supaya kito sihaik kini ciek-ciek mulai tabukti, baa kok puoso bisa mambuek kito sihaik. Dari kajian ilmu kesehatan tanyato manamukan baso makanan nan kito makan, mulai dari disuok ka muncuang sampai tibo dipalapesan kito manjadi buang aia ketek ataupun buang aia gadang mamakan wakatu labiah kurang lapan jam. Aratinyo satiok suok makanan nan kito makan sasudah lapan jam baru sempurna prosesnyo. Tapi nan tajadi salamo sabaleh bulan ka balakang babeda, wakatu pagi kiro-kiro pukua tujuah sabalun barangke karajo kito lah makan. Tibo di kantua atau sabalun manjalang ladang alah ado pulo kok lapek bugih jo katan goreang jo sacangkia kopi nan disajikan urang di kantua atau di lapau.

            Indak lamo sasudah itu, datang pulo tamu maajak makan, pai pulo baliakuntuak maiisi lambuang kito untuak makan. Sasudah itu, sudah sumbayang luhua lah tibo pulo jadwal makan siang, makan juo baliak akianyo. Bitu lah kikiro nan tajadi salamo sabaleh bulan ka balakang, sainggo nan tajadi usus kito indak baranti bakarajo untyuak mamproses makanan nan masuak ka lambuang kito. Mako dek lambuang indak baranti karajo itulah babagai-bagai macam panyakik mulai kalua, karano manuruik urang kasehatan hampia sado panyakik bamjlo dari lambuang nan indak normal.

            Mako, kutiko bulan puaso tibo, mako dimulai lah proses perbaikan lambuang nan kkarajo indak baranti salamo sabaleh bulan ko. Usus mulai bakarajo sacaro normal baliak, proses nan dikarajokan di lambuang kumbali takah nan saharusnyo, mamproses makanan salamo lapan jam, walaupun kito puaso ampia tigo baleh jam, mako di limo jam nantasisio tadi lah usus mulai mangaluakan sel-sel nan tusah untuak dipobaki. Mako buya pun maajalk kito untuak indak baranti-ranti untuak basyukur kabakeh kito untuak salalu basyukur manjadi orang islam, karano diagamo kitolah ado dijadikan dek tuhan Allah taala sabulan panuah wakatu untuak mampobaki usus kito. Mako dari situlah kito tau baa bana puoaso itu sangaik arek hubungannyo dengan puoaso. Mako jikok nak sihaik mako puosolah. Itu bana pasan kaji dari Buya di musajik malam tadi. Mudah-mudahan ado mumpaiak nyo untuak kito kasadonyo. Aamiin.  

*DOSEN SASTRA MINANGKABAU UNAND


Wartawan : Bahren
Editor : bahren

Tag :#Langkan #Kato #Carito