Pakaro Mamilieh; Sawuak Saabih Gauang, Sawuak Ayie Mandikan Diri

Pakaro Mamilieh; Sawuak Saabih Gauang, Sawuak Ayie Mandikan Diri

Oleh TE Radjo Boedjang

Rabu, 9 Desember 2020 tingga babarapo ari lai. Kini ko lah di ujuang ari untuak bausao mangumpuaan suaro.

Cah lai ari tanang. Sagalo alek paragek musti turun. Agieh baangok rakyat bapikie. Nanang saribu aka, pikie palito ati.

Sungguahpun kecek banyak tukang ukue--lembaga survey--ka dakek ari mamilieh tu mayoritas urang lah punyo tampek tagak, namun sagalonyo masih bisa baubah!

Adu program di debat publik, misalnyo, masih bisa maubah arah pilihan. Paslon nan digadang-gadangan sagalo ebat, bisa bagalanggang mato rang banyak manampak an caro pikie jo kurenah. 

Galanggang debat publik tu, sungguahpun banyak nan mangecek idak banyak bapangaruah, tapi saketek banyaknyo musti jadi panimbang bagi urang nan masih maniliek manarenok. 

Kok basi tahan tapo. Ameh tahan uji. Kutiko diadok an ka situasi angek di debat publik tu, baa caro basilek lidah jo bakurenah, patuik ditiliek-tiliek bana. 

Apo lai nan layie manunjuak an nan batin. Kok urang pandareh, lah jaleh tampak di kecek jo kurenah. Kok urang panyaba, rimau dalam paruik tatek kambiang bakaluakan. 

Iyo bana dalam lawik dapek dikiro, dalam ati siapo nan tau? Tapi ado duo tando-tando nan bisa dipadomani. Partamo, kurenah. Urang panyaba tampak di kurenah nan tanang tapi dalam. Urang pandareh kurenahnyo sarupo ayam bakukuak dakek batino. Nyo lapie kukuak balenggek-lenggek. Manggareseh ka suok, manggareseh ka kida. Mampalagak taji jo pia nan bakilek. Mampacaliek an surai jo bulu nan balilin! Mandareh lah ka namoe.

Jikok banangkodo ka urang pandareh, alamek kapa lakeh karam.

Urang pandareh tak manarimo saran. Inyo nan bana, inyo nan ebat. Kok ado nan manyanggah, lansuang nyo cap mambangkang mambarontak. Main pecat. Sasudah tu, para ASN pun main aman, main manang se lai. Nyo opok-opok se nangkodo pandareh tadi. "Jan serius-serius bana, dak juo ka jaleh dek inyo tu doh," kecek para upeh mampakecek an rajo!

Baa pulo satantangan kurenah tong kosong nyariang bunyinyo jo kurenah diam itu ameh?

Dalam debat publik, tantu diam itu ameh idak manunjuak kurenah urang panyaba. Tapi lah jaleh dak ado nan ka dikecek an, sahinggo manyuruak dalam diam, sambie maangguak-angguak balam. Supayo tampak sarupo urang barisi!

Pun tong kosong nyariang bunyinyo, dak bisa dipakaikan dalam maukue jo maniliek "dalam ayie" si kandidat. Namonyo sajo adu program. Adu visi misi, tantu harus bisa disampaikan sacaro jaleh, sahinggo ditarimo dan tatarimo dek urang banyak. 

Mako, kok ado kandidat nan labieh banyak aniang daripado mangecek. Atau mangecek sarupo si bisu barasian. Atau manggumam-guman sarupo urang gaek kadipalakian, mako itu lah jaleh "baayie dangka" nah. 

Apo nan bisa diarok ka urang nan dak cukuik ilemu untuak mamimpin kito? Sungguahpun gubernur, bupati jo walikota adolah jabatan politik--nan dibantu dek para pejabat teknis nan lah tauji--tapi salaku nangkodo alias pilot, dak mungkin disarahan ka urang nan dak bisa mambaco peta. 

Cilako duobaleh kito kutiko pilot jo nangkodo dak tantu kamaa kapa jo kapatabang kadibao! Kok itu pun tajadi juo, lah ka jaleh banyak "gubernur" dakek gubernur nah. Banyak "bupati" dakek bupati. Banyak "wako" dakek wako. Lai namuah dipimpin dek saribu gubernur, saribu bupati, saribu wako?

Itu pakaro kurenah. Nan kaduo, nan bisa dipakai untuak maukue dalam-dangka galuak-galuak kandidat adolah parbuatan liau salamo ko. Track record kecek rang kini.

Saumpamo mambaok kapa, alah kok pernah liau ko balayie? Antah jadi nangkodo di kapa kaciek, atau jadi jurumudi di kapa gadang?

Kok hanyo jadi ABK sajo salamo nangko, atau jadi juragan kapa gulo, labieh rancak liau mulai dari kelasi daolu. Bantuaknyo murah jadi nangkodo, sasek mancaliek kompas angok tantangannyo. Sansai urang nan banyak. 

Mako, pakaro mamilieh pemimpin ko, tiliek tarenok elok-elok. Liek kurenah jo parbuatan. Sawuak sahabih gauang!

Sakali limo taun kito mamilieh. Sawuak ayie mandikan diri. Barasiehan mato, barasiehan ati. Jan ondong ayie ondong dadak. Jikok paralu bamunajat ka Nan Satu. Jan sampai kuniang dek kunik lamak dek santan. Apo lai pitih sarimih nan dipandang. Rugi limo taun!