HOME LANGKAN KATO

  • Selasa, 8 Juni 2021
MANCACANG LAUAK TANGAH ALEK
Carito

MANCACANG LAUAK TANGAH ALEK

Oleh: Eka Meigalia*

Alah masonyo pulo kini ko bamedia social. Ampia sado urang punyo media social. Anak nan baru lahia pun alah punyo pulo media social ko walaupun amak atau apaknyo nan maatua. Banyak nan elok bisa didapek dari media social ko. Antaro lain tuak manambah banyak kawan, juo bisa mandatangan pitih. Kalau caro mandatangan pitih ko, bisa sanak cari di google.

Nan ka kito bahas kini ko takaik media social ko adolah papatah Minang, “mancancang lauak tangah alek”. Kato mancancang asanyo dari kato cancang. Aratinyo ‘mamotong ketek-ketek’. Jadi mancancang adolah karajo untuk mamotong apo pun manjadi ketek. Kalau di papatah ko nan dicancang adolah lauak. Lauak ko samo jo ikan. Agak babeda jo bahaso Indonesia lauk nan aratinyo ‘sagalo jinih samba untuak kawan makan nasi’. Bisa sajo ayam, dagiang, sagalo jinih protein, salain sayua. Itu nan disabuik lauk. Tapi lauak dalam bahaso Minang hanyo jinih ikan.

Salanjuiknyo di papatah tu ado kato tangah jo alek. Katuo kato ko indak bisa dipisahan karano manjadi ciek mukasuik. Alek ko samo aratinyo jo ‘pesta’ dalam bahaso Indonesia. Sagalo jinih karajo nan marupokan ujuik raso syukur sarato babagi makanan jo urang kampuang. Mako tangah alek mukasuiknyo iolah pado maso alek tadi sadang diadoan. Labiah jauah, tangah alek juo dapek kito aratian di tangah urang nan tibo di alek tu. Mako arati nan kasan nan dapek dibaco dari papatah tu adolah urang nan sadang baralek, kutiko urang rami tibo, inyo cancang lauak di tangah urang rami tu.

Jadi baa kalau awak sadang baralek tapi wak cancang pulo lauak katiko itu? Salah indak, tapi indak patuik. Harusnyo karajo ko dikarajoan sabalum alek. Kutiko urang tibo, nan nampak hanyo lauak nan lah jadi untuak ka dimakan, tampek nan barasiah, sarato pamandangan nan rancak. Tapi jikok di situ pulo lauak ko dicancang, mako nan dicaliak dek urang nan tibo iolah baun busuak, darah, kumuah, sagalo nan indak rancak. Di siko dapek kito samoan jo mancaliakan nan buruak ka urang rami.

Alah kodratnyo pulo satiok urang tu punyo sisi baiak sarato buruaknyo. Ado nan paralu urang banyak tau, tapi ndak saketek pulo nan cukuik awak sajo nan tau. Itu bahaso lainnyo adolah aib. Ado aib awak sacaro pribadi, ado aib bakeluarga, ado pulo aib badunsanak. Alah pulo ado tuntunan dalam agamo untuak manjago aib ko jan sampai tabukak ka urang lain. Itu ado dalam hadist riwayat Tarmidzi, dari Rasulullah. Arati dari hadist tu “siapo nan manutuik aib saurang muslim samaso di dunia, mako Allah akan manuntuik aibnyo di dunia jo akhiraik.” Juo ado babarapo tuntunan lainnyo dalam Alquran jo hadist nan manuntun awak untuak manjago aib, indak mambukak baitu sajo.

Di siko jaleh, ado tuntunan dalam agamo supayo awak manjago aib. Baitu pulo dalam adat di Minangkabau. Papatah tu manjadi umpamo untuak urang-urang nan suko mambukak aibnyo di ka tangah nan rami. Ditambah pulo jo papatah “manjamua cirik ka ateh bukik”. Baitu bana umpamo untuak urang ko.

Takaik jo media social, itu bana nan acok nampak kini ko. Ndak saketek kito caliak urang mambukak aibnyo di media social. Bahkan barapo wakatu ka balakang, itu manimpo urang-urang nan kito pandang alim. Barangkali ado nan bapamahaman baso mambukak aib ko samo jo maagiah pelajaran untuak urang tu. Sahinggo karajo nyo nan indak bana bisa nyo hantian. Tapi baliak lo kito ka agamo, baso indak ado anjuran untuak mambukak aib untuak maagiah hukuman. Tugeh awak tatap untuak manutuik aib. Wajib malah. Mako basarah sajo ka Allah, akan tibo masonyo tabukak surang tanpa paralu awak nan mambukak aib tu. Ado papatah pulo, “sapandai-pandai tupai malompek, sakali wakatu ka gawa juo”. Sarato “sapandai-pandai manyimpan bangkai, akhianyo tabaun juo”. Mako, mari kito bijak bamedia social. Usah jadian tampek untuak mambukak aib, sarato mancari aib urang.

 

*Dosen Sastra Minangkabau Unand


Wartawan : Eka Meigalia
Editor : bahren

Tag :#Kato #Minangkabau#Carito