Kalam Disigi, Lakuak Ditinjau

Kalam Disigi, Lakuak Ditinjau

Oleh: Eka Meigalia*

Kalau pernah mandanga istilah “cek dan ricek”, mako tapek bana disandiangan jo papatah nan ka kito kaji kini ko. Papatah tu babunyi “kalam disigi, lakuak ditinjau”. Pado papatah tu hanyo ado ampek kato, yaitu kalam, disigi, lakuak, sarato ditinjau.

Kato kalam dalam bahaso Indonesia dapek disamoan jo kato kelam atau gelap. Arati kato ko iolah ‘indak ado cahayo, indak tarang’. Kato gelap juo dapek baarati ‘malam hari’ atau ‘hal nan alun jaleh’.

Salanjuiknyo di papatah tu ado kato disigi. Kato disigi  ko dasarnyo iolah sigi. Arati sigi ado duo, yaitu ‘suluah’ sarato ‘maninjau sacaro rinci’. Karano kato nan mandahului disigi  ko iolah kalam, mako arati dari kalam disigi iolah ditarangi jo suluah keadaan nan indak ado cahayo tadi. Jikok alah diagiah cahayo, mako nan kalam tadi dapek manjadi tarang.

Barikuiknyo ado kato lakuak jo kato ditinjau. Kato lakuak aratinyo iolah ‘barongga babantuak cakuang ka arah dalam’. Sadangkan ditinjau nan kato dasarnyo iolah tinjau aratinyo ‘mancaliak, mamareso dari tampek nan tinggi’. Jadi arati lakuak ditinjau iolah mancaliak sarato mamareso ka bagian bawah tampek nan lakuak tadi. Jikok lah dipareso nan lakuak tadi, mako apo nan ado di bawah dapek dicaliak sacaro bana.

Nan tasurek dari papatah tu pado dasarnyo manyuruah manarangi nan kalam sarato maninjau tampek nan lakuak. Di baliak itu, kalam jo lakuak manganduang makna suatu nan indak jaleh sarato masih bayang-bayang sajo. Samantaro itu, kato disigi jo ditinjau ko manganduang makna mancari tau, meneliti, sarato manyidik. Mako hal nan indak jaleh sarato masih bayang-bayang tadi disuruah untuak mancari tau, manyidik, sarato maneliti nak nyo jaleh. Iko nyo nan disabuik “cek dan ricek” tadi.

Cek jo ricek ko dalam ajaran agamo Islam disabuik “tabayyun”. Tabayyun ko iolah kato dalam bahaso Arab nan aratinyo ‘mancari kajalehan sampai tarang jo bana’. Parintah untuak tabayyun ko ado dalam Alquran Surek Al Hujurat Ayat 6 nan aratinyo sarupo di bawah ko.

Hai orang-orang yang beriman, jika datang kepada kamu seorang fasik membawa suatu berita, maka bersungguh-sungguhlah mencari kejelasan agar kamu tidak menimpakan suatu musibah kepada suatu kaum tanpa pengetahuan yang menyebabkan kamu atas perbuatan kamu menjadi orang-orang yang menyesal (QS. Al Hujurat : 6)

 Pado surek tu disabuik jikok ado urang fasik manyampaiak kaba, mako sungguahlah mancari tau sampai jaleh supayo ndak mandapek marabahayo atau manyasa. Dari ayat tu kito sabananyo disuruah tabayyun ateh 2 hal. Partamu tabayyun ka sumber kaba atau siapo nan mambaok kaba. Kaduo tabayyun ka isi kaba nan disampaian. Ka sumber kaba atau si pambaok kaba, kito harus tau inyo sia sarato dapek kaba dari ma atau sia. Kalau kaba tu asanyo dari pambaok kaba itu surang, mako isi kabanyo paralu pulo dipareso sarato dikaik ka pambaoknyo. Apokah inyo adolah urang nan memang tau atau punyo ilimu sasuai jo kaba nan inyo baok tu. Bisa sajo inyo hanyo mangiro-ngiro sahinggo indak pulo dapek batangguangjawab. Ateh isi kaba tadi mako paralu pulo dipareso jo caro mancari dari sumber lain sarato mambandiang-bandiangan. Sarupo itulah kito disuruah ati-ati sarato mamareso bana jikok mandapek satu kaba.

Jikok sikap tabayyun iko ndak kito pakai, mako ado dampak buruaknyo nan ka tibo. Dampak utamonyo iolah tibonyo fitnah. Bisa sajo kito manjadi urang nan manuduah urang nan tanyato indak babuek buruak. Labiah jauah fitnah ko dapek mamacah balah umaik. Antaro sasamo saliang mamusuahi, saliang mambanci, bahkan bisa sampai baparang. Karanonyo dalam Islam fitnah ko dikatoan labiah kejam dari mambunuah karano bahayonyo memang sangaik gadang.

Dibaok pulo ka maso kini, apo nan disabuik dek papatah “kalam disigi, lakuak ditinjau ko” atau istilah lainnyo “cek dan ricek” sarato tabayyun, andaknyo tapakai bana. Sabaitu murah sarato banyak informasi nan kito tarimo kini ko sajalan jo kambangnyo teknologi. Sumber berita ko samakin baragam antah dari mano asa mulo nan partamunyo. Kadang kito ndak sempat mamareso langsuang sajo mambagi informasi tadi ka kawan atau di media sosial kito sahinggo dibaco pulo dek urang banyak. Akibaiknyo jikok kaba ko ndak bana, itu nan disabuik bisa tajadi fitnah tadi. Mako alah sapatuiknyo kita manjalanan parintah agamo nan sajalan pulo jo tuntunan dalam adat kito malalui papatahnyo.

*Dosen Sastra Minangkabau FIB Unand