Kaji Saok Ka Dalam

Kaji Saok Ka Dalam

Oleh TE Radjo Boedjang

Alhamdulillah, Allah Nan Maha Pangasiah lah mampatamuan kito jo Ramadan 1442 H. Allah Nan Rahman mangasiahi kito jo umue dan badan sehat. Allah Nan Rahim manyayangi kito jo iman dan tauhid. 

Tingga dek kito, apokah puaso taun kini kito isi jo ibadat-ibadat nan labieh banyak (kuantitas) dan labieh samparono (kualitas) dibandiang puaso-puaso nan daolu. Kok idak juo, tantu kito lah tamasuak urang nan marugi. Kanai sumpah demi maso.

Dalam pado itu, salamo sapakan ko banyak rahmat turun ka Sumbar. Wapres Ma'ruf Amin ka Piaman. Menteri Perdagangan ka Bukiktenggi jo Padang maliek pasa. Ado pulo Menteri Pertanian Syahrul Yasin Limpo, Menteri Kesehatan Budi Gunadi Sadikin dan Menteri PPN/Kepala Bappenas Suharso Manoarfa tibo dengan baragam agenda.

Hebat Sumbar. Yo hebat lah. Kan liau-liau tu tibo karano dakek jo pak anu, dst. Tibo-tibo urang-urang saliang klaim; Itu den yang mambao, dak inyo doh! Kok dak dek den, maa lo ka tibo liau tu?

Saliang klaim itu lah nan manjadi inspirasi tulisan pakan daolu; Barabuik Tuah, Ujian Ikhlas. Karano demokrasi lansuang ditantuan dek sia nan banyak dapek suaro, mako walau pilkada jo pileg masih taraso angeknyo, namun nan anggota legislatif (aleg) dan kepala daerah (kada) lansuang pijak gas supayo suaro jan ilang!

Sasuai jo judul tulisan pakan daolu tu, memang duo hal yang babeda; tuah jo ikhlas. Kok maajan tuah, ilang ikhlas. Kok ikhlas nan ka muko, bisa ilang tuah. Atau tuah diambiek urang lain.

Lalu, tak lamo sasudahnyo, babarapo bupati/walikota dibaok manamui sejumlah menteri. Anggota DPR RI Andre Rosiade (AR) nan mamfasilitasi pertemuan tu. 

Ebat AR ko. Co limbubu, AR manggarik subalik. Ka dapil tiok sabanta bantuan tibo. Ka pusat, jan disabuik lai, AR punyo banyak koneksi. Jo networking AR iyo kerek wak dek liau. Babarapo bupati/walikota lah marasoan lakek tangan AR.

Para kada tu, dek difasilitasi salah surang aleg kito banamo AR, lah daolu sakaki mambaok proposal ka babarapo kementerian. Ado proposal bidang kepariwisataan nan ditarimo lansuang dek Sandiaga Uno. Ado lo proposal pasa jo proposal UMKM. 

Baa nasib proposal-proposal tu isuek? Tantu masih paralu dinanti asienyo. Kok dabue ombak lah samo didanga. Samo-samo kito tunggu pasienyo. Ye dak?

Namun samantang pun baitu. Takaik pakaro tuah jo ikhlas tu masih takalang-kalang di lidah. Masih taguriah-guriah di ati.

Kalaluan nyo bana lah tu kini, iyo acok tajadi panyakik lupo di manose. Baa ikhlas ka tibo, samintaro manose banyak nan palupo. Lah sajaleh-jaleh he liau nan manaruko, tibo di manuai bisa se urang lain nan bulieh. Ebat dak?

Nan labieh ebat, manose nan banyak pun sapakek maiyoan. Iyo liau dulu nan bausao nah. Bukan urang itu! Ndehhh...

Baa ikhlas ka sungguah, karano tuah nan dikaja. Sadangkan tuah adolah pakaro kasapakatan nan rami. Dan sapakek tu paralu mobilisasi opini. Paralu media. Medpers atau medsos.

Itulah nan tajadi, kutiko AR co limbubu manggarik. Ka bawah, ka ateh. Bantuak dak pernah panek bro AR tu. Apokah idak ikhlas kutiko media maikuik i garik liau tu? Atau sabalieknyo, apokah karajo sarupo itu bisa disabuik mangaja tuah?

Nan pastinyo, tantu liau nan tau. Mangaja tuah jo bausao ikhlas--dalam konteks kajadian dikaik an jo demokrasi lansuang, paralu suaro--adolah duo hal nan samo-samo paralu.

Ikhlas, iko urusan Tuhan. Dalam kaji "saok ka dalam", sapanjang karajo lai basamo-Nyo (billah) in Sya Allah ikhlas asienyo. Nan tuah, adolah bonus dari "saok ka lua", karano-Nyo (lillah).